С.Баярцогт: Би ганцхан газар шалгагдаагүй. Монголд, Швейцарьт, Хонгконгт, Австралид гээд олон хүчний байгууллагын шалгалтад ороод гарсан

АН-ын тэргүүн дэд дарга С.Баярцогт өөрийнх нь нэр дээр нээгдсэн Эрүүгийн хэргийн талаар мэдээлэл өгсөн юм.

 С.Баярцогт “Монгол Улс 1992 онд Ардчилсан Үндсэн хуулиа батлахдаа, гүйцэтгэх засаглал, хууль тогтоох засаглал, шүүх эрх мэдлийг тэнцүү хуваарилсан. Энэ тэнцүү эрх мэдэлтэй байгууллагууд нэг нэгнээ шүүдэг байдал бий болбол Монголд ардчилал үгүй болно. Шүүх засаглал бол хэнээс ч хараат бусаар үйл ажиллагаа явуулах ёстой. Энэ бол Үндсэн хууль баталсан миний үзэл баримтлал. Хэрвээ үнэхээр нээлттэй сонсгол болдог бол миний хувьд туйлын баяртай хүлээж авна.

Бидний хэргийг шүүсэн, хянасан нийслэлийн прокурор авлигын хэргээр ял авсан. Биднийг анхан шатны шүүх дээр ялласан шүүгч нь авлигын хэргээр ял авсан. Яг үнэндээ эрх мэдлийн хонгил гэж яригдаад гурван давхарт ялын бодлого нь төлөвлөгдөж шийдэгдэж байна гэж Х.Нямбаатар сайдын хэлж байсан тэр бүх зүйл бол бодитой үнэн зүйл. Энэ бүх зүйл бол ил тод болно оо. Дээрээс нь энэ асуудлаар маш олон түвшинд хандсан. Монголын дөрвөн түвшний шүүхээр ороод шийдэгдсэн. Хилс хэрэг байсан гэдгийг энд ч Швейцарийн холбооны улсад ч шийдсэн байгаа. Би бол ганцхан газар шалгагдаагүй. Монголд, Швейцарьт, Хонгконгт, Австралид гээд олон хүчний байгууллагын шалгалтад ороод гарсан. Дээрээс үүнтэй холбогдуулаад Үндсэн хуулийн цэцэд Х.Баттулга ерөнхийлөгч өгсөн. Үндсэн хуулийн цэц шүүхийн зүгээс хууль зөрчсөн шийдвэр алга гэсэн шийдвэр гаргасан. Сахилгын хороонд өгсөн. Авлигатай тэмцэх газарт өгсөн. Бүх шатанд шалгагдсан. Хэрвээ үнэхээр нээлттэй сонсгол хийдэг бол хаанаас , хэрхэн улстөрийн зорилгоор ийм зүйл болсон илүү тод мэдэгдэнэ. Миний эсрэг үйл ажиллагааг зохион байгуулж байгаа хүмүүс нь маш ойлгомжтой. Манай хуучин Ерөнхийлөгчийн зүгээс зохион байгуулалттайгаар хэвлэл мэдээллийн хэрэгслээр хийдэг. Үйл ажиллагаа идэвхжих үед дандаа ийм дайралт хийдэг.

Шаардлагатай бол нэлээн дэлгэрэнгүй хэвлэлийн хурал хийдэг байсан. Удахгүй нээлттэй мэдээллийг цаг тухайд нь өөрийн сошиал хуудсаар дамжуулан хийнэ” гэв.