"Ам асууя": Нийслэлийн Засаг дарга Д.Сумъяабазарын 132 зорилтот “алсын хараа”-г шинжихүй

 Нийслэлийн Засаг дарга Д.Сумъяабазар 2020-2024 оны үйл ажиллагааны хөтөлбөртөө 6 бүлэг, 22 тэргүүлэх зорилт,  132 зорилтыг дэвшүүлэн НИТХ-ын 2020 оны 12 дугаар сарын 04-ний өдрийн 02/10 тогтоолоор батлуулсан байдаг.

Ирэх  жил буюу 2024 онд биелэлтийг нь тооцох үйл ажиллагааны хөтөлбөрийг уншигч танд эргэн нэг сануулья.

Нэгдүгээр бүлэг нь Ковид-19 цар тахлаас үүдэлтэй эдийн засаг, нийгмийн хүндрэлийг даван туулах бодлого. Энэ бол Засгийн газрын ажил учраас хойш тавья. Мэдээж дэлхийн хамарсан халдварт өвчин учраас нийслэлийн хүлээсэн үүрэг чамгүй их байсныг хүндлэх нь зүй.  Тусгаарлах байр, хяналтын цэг, ариутгал, халдваргүйжүүлэлт, хорио цээрийн дэглэм тогтоох гээд улс даяараа эрвийх дэрвийхээрээ л хөдөлсөн.

Тэгвэл Хоёрдугаар бүлэг буюу Хүний хөгжил зорилтын хүрээнд дэвшүүлсэн зорилттой танилц.

Эрүүл мэнд хэсэгт нь Эрүүл мэндийн яамны үүрэгт ажлыг жагсаасан мэт л сэтгэгдэл төрнө. Тухайлбал,  Халдварт бус өвчний эрт илрүүлэг, оношилгоо, эмчилгээг сайжруулна, Халдварт өвчнөөс сэргийлэх, илрүүлэх, хянах, танадах, эмчлэх үйл ажиллагааг сайжруулж, өвчлөлийн бууруулна, эмнэлгийн мэргэжилтнийг мэргэшүүлж, чадавхжуулан, нийгмийн баталгааг хангана гэх мэт.

Биеийн тамир бүлгийг нь уншвал Биеийн тамир, спортын сайдын үүрэгт ажилтай давхцана.

Боловсрол гэх дэд зорилтын хүрээнд, Багш нарын мэргэжил, ур чадварыг дээшлүүлэх сургалтыг үе шаттай зохион байгуулна, Төгсөх ангийн сурагчдын сурлагын амжилтыг ахиулах зорилгоор уралдаан зохион байгуулна, ЕБС, цэцэрлэгийн сургалтын хэрэглэгдэхүүн тоног төхөөрөмжийг сайжруулж, хүүхдэд ээлтэй эрүүл, аюулгүй орчин бүрдүүлнэ гэх мэт “амлалт” өгчээ.

Нийгмийн халамж, хөдөлмөр эрхлэлт бол НХХЯ-ны ажил. Энэ салбарыг хамаарах төрийн байгууллага уг нь зөндөө. Гэтэл манай хотын дарга зорилтот бүлгийн өрх, иргэдийн нийгмийн хамгааллын суурь үйлчилгээнд хамруулна, хөгжлийн бэрхшээлтэй иргэдийн эрхийг дээдэлж, нийгмийн харилцаанд тэгш хүртээмжтэй оролцох оролцоог нэмэгдүүлнэ гээд зөндөө зорилтууд бичсэн байдаг.

Үндэсний бахархал, өв соёл гээд бас нэг дэд бүлэг бий. Үндэсний номын сангийн хуучин барилга, Дуурь бүжгийн эрдмийн театр, Драмын эрдмийн театрын барилгуудыг сэргээн засварлана. Үндэсний урлагийн их театр, Үндэсний номын сан, Хүүхдийн номын сан, Хүүхэлдэйн театр, Хүүхдийн соёлын өв, хөгжлийн төв, Хүүхэд залуучуудын барилгыг шинээр барих газрын асуудлыг шийдвэрлэнэ гэж 2.6.1.2 гэсэн хэсэгт бүүр тод байсан.

Эдгээр барилгын засварын мөнгө хаанаас гардаг юм бэ. Хот гаргадаг бил үү.

Гэр бүлд боловсрол, зөвлөгөө өгөх төв байгуулна, гэр бүлийн боловсрол олгох сургалт, сурталчилгаа нөлөөллийн ажлыг зохион байгуулна гэсэн байсан шүү. Хаана хаана ийм төв ажиллаад хэн зөвлөгөө мэдээлэл авсныг олон нийтийн дунд хэлэлцүүлэг өрнүүлж болох юм.

Гурав дахь зорилтоос нь нийслэлийн Засаг даргад хамааралтай асуудлууд гарч ирнэ. Эдийн засгийн бодлого гэх энэ зорилтын хүрээнд, нийслэлийн өмч хөрөнгийн зах зээлийн бодит үнэлгээг тогтоож, өмч ашиглалтыг эргэлтэд оруулна гэж эхэлсэн байдаг. Энэ талаар ганц нэг ажил хийгдсэн. Харин Улаанбаатар хөрөнгө оруулалтын сан, үнэт цаасны тухайд байдал ямар түвшинд явааг уншигчид сайн мэдэх биз. Ямартай ч цаасан дээр шийдвэрүүд баталгаажуулж авсан.

Төсвийн төлөвлөлтийг боловсронгуй болгох замаар төсвийн алдагдлыг бууруулж, сахилга батыг сайжруулна гэх зорилтын хувьд магадгүй хамгийн үрэлгэн төсөвтэй нь Улаанбаатар хот. 2023 онд нийслэлийн төсөвт 1 их наяд 742.3 тэрбум төгрөгийн орлого төвлөрүүлэхээр төлөвлөсөн бөгөөд үүнээс 370 тэрбум 226 сая төгрөгийг төсөвт “тушаах” ёстой ч саяхан гарсан мэдээллээр 0 гэсэн дүнтэй байсан.

Орон нутгийн сонгууль болтол жил хүрэхгүй хугацаа үлдэж байгаа болохоор ийнхүү хэн хүнгүй Нийслэлийн Засаг даргынхаа үйл ажиллагааны хөтөлбөрийг нэг сонирхоод үзэхэд гэмгүй.

Хэрвээ биелсэн бол гоё гоё зүйл бий. Наад зах нь эрүүл ахуйн шаардлага, стандартад нийцсэн мах махан бүтээгдэхүүн бэлтгэн нийлүүлэх малын зах, мах боловсруулах цогц үйлдвэртэй болно. Мөн Ажлын байрыг хадгалсан, нэмэгдүүлсэн бизнес эрхлэгчдийг дэмжиж ажиллана хэмээн амласан учраас манай бизнесийнхэн түүнээс ам асуухад гэмгүй л болов уу.

Магадгүй овоо биелэлттэй байгаа нь мэдээллийн технологийн ухаалаг шийдлүүдийг ашиглан хотын цогц үйлчилгээг иргэдэд хүртээмжтэй, нээлттэй, чирэгдэлгүй хүргэдэг ухаалаг хотыг бий болгоно гэх өгүүлбэр биз. Гэхдээ энэ бол Цахим хөгжил харилцаа холбооны яамны хариуцах ажилтай бас давхцана аа.

Ногоон хөгжлийн бодлогоос нь онцолж нэхэх зүйл бол “хот суурин газрын хөгжлийн ерөнхий төлөвлөгөөтэй уялдуулан цэцэрлэгт хүрээлэн байгуулж, олон нийтийн амралт зугаалгын талбайг нэмэгдүүлнэ” гэх мөрөөдөл. Бид чинь  амралт зугаалгын хэдэн талбайтай болсон билээ...

“Хөрс, орчны бохирдолгүй хот”-ыг бол энэ зуны борооноор харчихсан. Экосистемийн тэнцвэрт байдлыг хангасан хот гээд гоё өгүүлбэртэй зөндөө таарна.

Хамгийн сүүлийн зорилт нь Нийслэл ба бүс орон нутгийн хөгжлийн бодлого. Энэ бүлэг зорилтыг л дөрвөн жилдээ чухалчлах ёстой байтал манай хотын дарга өөрийгөө Ерөнхий сайдтай дүйцүүлж бодоод 4 жилийн үйл ажиллагааны хөтөлбөрөө 30 жилийн “Алсын хараатай” дүйцүүлж хийснийг эндээс анзаарч харж болно.

Удахгүй үйл ажиллагааны хөтөлбөрийн биелэлтийг тооцно. Бас нийслэлчүүд Засаг дарга Д.Сумъяабазар түүний багтай “тооцоо нийлнэ”.

 Нийслэлийн Засаг дарга Д.Сумъяабазарын 2020-2024 оны үйл ажиллагааны хөтөлбөр

 https://zdtg.ulaanbaatar.mn/uploads/posts/file-1644458884293.pdf

http://stu.ub.gov.mn/news/372/