ОХУ: Экспортын хязгаарлалт хийсний дараа бирж дээр бензин, дизель түлшний үнэ огцом унав

-Экспортын хязгаарлалтын дараа бензин, дизель түлшний биржийн үнэ 10-15 хувиар буурчээ-

ОХУ-ын Засгийн газар шатахууны экспортод хязгаарлалт тавьсны дараа бирж дээрх бензин, дизель түлшний үнэ 10 гаруй хувиар уналаа. Энэ мэдээг Санкт-Петербургийн олон улсын түүхий эдийн биржийн мэдээллээс иш татжээ.

Тухайлбал, нэг тонн АИ-95 шатахууны үнэ 10.76 хувиар буурч, нэг тонн нь 59,362 рубль болжээ. АИ-92 бензин 9,63% буурч тн нь  55,925 рубль,  зуны дизель түлш 14,52% буурч нэг тн нь 61,431 рубль  болж хямдраад байна.

Есдүгээр сарын 21-нд ОХУ-ын Засгийн газар автобензин, дизель түлшний экспортод түр хязгаарлалт тогтоосон. Хязгаарлалт хэрэгжих хугацааг тодорхой заагаагүй байна. Засгийн газар энэ шийдвэрээ ОХУ-д шатахууны үнийг тогтворжуулах шаардлагатай холбон тайлбарласан.

Түр зуурын хязгаарлалт нь "шатахууны зах зээлийг дүүргэхэд тусалж, улмаар хэрэглэгчдийн үнийг бууруулна" гэж засгийн газар онцлон тэмдэглэв.

Түүнчлэн шатахууны зах зээлийн нөхцөл байдлыг тогтворжуулах зорилгоор Засгийн газраас хөрөнгийн биржид нийлүүлэх шатахууны стандартыг нэмэгдүүлж, хөдөө аж ахуйн үйлдвэрлэл эрхлэгчдийн хэрэгцээнд зориулан шатахууны худалдан авалтад өдөр тутмын хяналт шалгалтыг зохион байгуулж, хэмжээг нь шуурхай тохируулж байсныг тэд мөн тодрууллаа.

Есдүгээр сарын 20-нд Росстат-ын мэдээгээр 9-р сарын 11-18-ны хооронд ОХУ-д бензиний дундаж үнэ 44 копейкээр нэмэгдэж, литр тутамдаа 55.65 рубльд хүрсэн тухай мэдээлсэн юм. Түүнчлэн АИ-92 бензин 39 копейкээр нэмэгдэж 51,41 рубль, АИ-95 47 копейкээр нэмэгдэж 56,24 рубль, АИ-98 шатахуун 52 копейкээр нэмэгдэж, литр тутамдаа 67,89 рубль болжээ. Долоо хоногийн турш дизель түлшний үнэ хамгийн их буюу 1.32 рублиэр нэмэгдэж, нэг литр нь 63.96 рубль болжээ.

Түүнчлэн Өмнөд Осет, Абхаз руу нийлүүлэх болон Байконур, Шпицберген рүү тээвэрлэх, мөн хувь хүмүүсийн хувийн хэрэгцээнд зориулж экспортолж буй шатахуунд хязгаарлалт хамаарахгүй.

Эх сурвалж: gazeta.ru