"Сунжирсан Ковид"-оор өвчлөгсдийн MRI зураг нь дотоод эрхтэн доголдож байгааг нотлов

Урт удаан хугацааны турш буюу "Сунжирсан ковид"-оор шаналж буй хүмүүсийн гуравны нэгд нь эрдэмтэд эмнэлгээс гарснаас хойш хэдэн сарын дараа дотоод эрхтний үйл ажиллагаа доголдож байгааг илрүүлжээ. 

Энэ нь  Ковид-19 халдвар авснаас хойш хэдэн сарын турш хэвийн амьдралдаа эргэж орох гэж тэмцэж буй хүмүүст зориулсан эмчилгээг олоход туслах зорилготой шинэ судалгааны үр дүн юм.

Дашрамд тодотгоход, COVID-19-ээр өвчлөөд эдгэрсэн ч зарим шинж тэмдэг илэрсэн хэвээр байгаа бол COVID-19-ийн дараах нөхцөл байдал буюу үүнийг заримдаа "Сунжирсан COVID" /long COVID/ гэж нэрлэдэг.

"Lancet" сэтгүүлд нийтлэгдсэн судалгаанд дурдснаар эрдэмтэд анх удаа вирусын халдвар авснаас хойш удаан хугацаанд өвчнөөсөө салж чадаагүй Ковидтой өвчтөнүүдийн MRI зургийг судалжээ.

Эрдэмтдийн MRI зурган дээр дүн шинжилгээ хийсэн судалгаа  "Сунжирсан ковид" өвчтэй хүмүүсийн уушиг, тархи, бөөр гэмтэх магадлал Ковид-19-өөр өвчлөөгүй хяналтын бүлгийн хүмүүстэй харьцуулахад гурав дахин их байгааг харуулж байна.

Энэ судалгаанд ковидтой 259 өвчтөн хамрагдсан бөгөөд бүгдийнх нь өвчний хүнд явцтай байдал нь эмнэлэгт хэвтэхэд хүргэсэн. Тэд эмнэлгээс гарснаас хойш таван сарын дараа үндсэн эрхтнүүдийнхээ MRI шинжилгээг хийлгэсэн байна. Эрдэмтэд эдгээр зургуудыг ​​хяналтын бүлгийн 52 хүний MRI-тай харьцуулсан байна.

Удаан хугацааны туршид Ковидын шинж тэмдэг бүрэн арилаагүй өвчтөнүүдийн дунд уушгины гэмтэл бараг 14 дахин их байсан бол бөөр, тархины хэвийн бус байдал хяналтынхтай харьцуулахад 3, 2 дахин их байжээ.

Олон хүний ​​эрхтнүүдийн эмгэгийн хэмжээ нь халдварын хүнд байдал, нас, бусад өвчний илрэлээс хамаардаг.

Оксфордын их сургуулийн зүрх судасны мэргэжилтэн, судалгааны тэргүүлэх зохиогч Бетти Раман хэлэхдээ, олон эрхтэний өөрчлөлттэй хүмүүс сэтгэцийн болон бие махбодийн ноцтой асуудлуудын улмаас өдөр тутмын ажил амьдралаа хэвийн явуулахад нь саад болж байгаа талаар гомдоллох нь дөрөв дахин их байна гэжээ.

"Сунжирсан Ковид"-ыг ойлгох нэг алхам
Судалгааны үр дүн нь Ковид-19-тэй өвчтнүүд эмнэлэгт хэвтсэний дараа "хэд хэдэн эрхтэнд гарсан өөрчлөлтийн тодорхой нотолгоо" болж байна гэж судалгааны хамтран зохиогч, Лестерийн их сургуулийн амьсгалын замын анагаах ухааны профессор Кристофер Брайтлинг хэлэв.

Гэхдээ тэр болон түүний хамтран ажиллагсад энэ мэдээллийг түгшүүр төрүүлэх шалтгаан гэж үзэхгүй, харин "Сунжирсан Ковид"-той хүмүүсийг эмчлэх арга замыг хөгжүүлэх, урагшлах боломж гэж харах ёстой гэдгийг онцолжээ. 

Мэргэжилтнүүдийн тооцоолсноор дэлхий даяар сая сая хүмүүс вирусын халдвар авснаас хойш долоо хоног, хэдэн сарын дараа хэвийн амьдралдаа эргэж орох боломжгүй хэвээр байна. Ихэнх нь амьсгал давчдах, ядрах, тархины манан зэрэг шинж тэмдгүүдтэй хэвээр байгаа бөгөөд зарим хүмүүсийн хувьд Ковид нь хүнд хэлбэрийн архаг өвчин болж хувирсан байна.

Ковид нь ийм өргөн хүрээний шинж тэмдгийг яг яаж үүсгэдэг нь тодорхойгүй хэвээр байна.

Эх сурвалж: ВВСnews