Н.Учрал: Бизнесийн 10 зөвшөөрлийг цахимжуулж байгаа нь авлигын хөрс болсон хүнд суртлыг халах эхний алхам болж байна

 ЦХХХ-ны сайд Н.Учрал "Иргэд зөвшөөрөл авахын тулд төрийн байгууллагын үүд сахих, хэн нэг албан тушаалтад авлига өгөх, хүнд сурталтай нүүр тулах шаардлагагүй болж байна. Тухайлбал, хүнсний дэлгүүр, ресторан, ая тухтай дэлгүүр, мини маркет, бар караоке, цайны газар, супермаркет, хүнсний мухлаг, хүнсний зах, худалдааны төв, зочид буудал эрхлэх бизнесийн зөвшөөрлийг И Монголиа болон И Бизнес платформоос цахимаар авах боломжтой боллоо. Өөрөөр хэлбэл, та ямар ч төрийн байгууллагад очиж, хэн нэгэн албан тушаалтантай нүүрэлдэх шаардлагагүйгээр цахимаар зөвшөөрлийн маягт, хүсэлтээ бөглөж, зөвшөөрлөө 30 хоногийн дотор цахимаар авч, хадгалах боломж нээгдэж байна.

ЦХХХЯ цаашид нийт 360 зөвшөөрлийг үе шаттайгаар цахимжуулж, И Монголиа болон И Бизнес  платформд нэгтгэнэ. Энэ нь технологийн тусламжтай авлигатай хийх тэмцэл хий хоосон яриа бус бодит үр дүнд хүрч байна. Бизнесийн энэхүү 10 зөвшөөрлийг цахимжуулж байгаа үйл явдал нь авлигын хөрс болсон хүнд суртлыг халах эхний алхам юм. Шилэн, ил тод, нээлттэй байдал ийнхүү хий хоосон яриа биш амьдрал дээр биеллээ олж, авлигыг бууруулах бодит үр дүнд хүрч байна" гэв.