“Татан буугдсан банктай холбоотой шийдвэрүүдийн хэрэгжилт, үр нөлөө” сэдэвт аудитын нээлт боллоо

Улсын Их Хурлын Төсвийн байнгын хорооны “Аудитын сэдэв батлах тухай” 2022 оны 09 дүгээр тогтоол, Монгол Улсын Ерөнхий аудиторын 2023 оны А/03 дугаар тушаалаар баталсан “Төрийн аудитын байгууллагын 2023 оны гүйцэтгэлийн төлөвлөгөө”-г тус тус үндэслэн Төрийн аудитын байгууллагын бүрэн эрхийн хүрээнд “Татан буугдсан банктай холбоотой шийдвэрүүдийн хэрэгжилт, үр нөлөө” сэдэвт гүйцэтгэл-нийцлийн аудитын нээлтийг зохион байгууллаа.

Аудитын нээлтэд Монгол Улсын Ерөнхий аудиторын орлогчийн албан үүргийг түр орлон гүйцэтгэгч Ц.Наранчимэг, Үндэсний аудитын газрын Аудитын нэгдсэн удирдлага, зохицуулалтын газрын захирал, тэргүүлэх аудитор Я.Самбууням,  аудитын багийн гишүүд болон Сангийн яам, Шүүхийн шийдвэр гүйцэтгэх ерөнхий газрын Банкны өр барагдуулах газар болон Төрийн банк, Зоос банк, Хадгаламж банкны төлөөлөл оролцов.

Тус аудитад Монголбанк, Хууль зүй, дотоод хэргийн яам, Сангийн яам, Улсын бүртгэлийн ерөнхий газар, Шүүхийн шийдвэр гүйцэтгэх ерөнхий газар,  татан буугдсан банканд томилогдсон бүрэн эрхт төлөөлөгч болон эрх хүлээн авагч болон бусад холбогдох байгууллагын үйл ажиллагааг хамруулах юм.

Аудитаар банкийг татан буулгах шийдвэр нь зохих хууль тогтоомжид нийцэж буй эсэх болон эрх бүхий байгууллагаас гарсан шийдвэрийн хэрэгжилт үр нөлөөтэй эсэх зэрэг асуудлыг хамруулах бөгөөд аудитын үр дүнд гарсан тайлан, дүгнэлт, зөвлөмжийг Улсын Их Хурал болон холбогдох байгууллага, албан тушаалтанд танилцуулж, олон нийтэд мэдээлэхээр төлөвлөсөн байна.