Улс төрчид, олигархууд шоронд хоригдохоороо өвдөг тохой нь янгинаж, тархи толгой нь ангалзаж, сахарын өвчин нь сэдэрч, савны амсраар хатгалаа гэх нь холгүй “янгуучилдаг” моод дэлгэрээд удаж байна. Заль гэх үү, жам гэх үү нэг тийм шалтгаан шоронд орсон, цагдан хоригдсон бүх л олигархуудад байдаг болж. Ингээд бодохоор манай төрийн өндөр алба хашигчид, төрийн ажлыг залгуулж, түмний төлөө зүтгээд амралт чөлөө, агаар салхинд гарах завгүй гүйсээр, өөрийнхөө эрүүл мэндийг хөсөр хаячихсан байдаг юм болов уу. Эсвэл хорих ангиуд, 461 дүгээр анги шахалт дарамт ихтэй, хоол унд нь эрүүл ахуйн байдлыг хангадаггүй юм болов уу. Хэрэв тийм бол ШШГЕГ-т гомдлоо гаргаад, ХЭҮК-оос тусламжаа хүсэх хэрэгтэй гэж хүртэл бодогдов.
ШШГЕГ-ын харъяа Хорих 461 дүгээр ангийн дарга, Хурандаа Б.Нямгомбо нь Мааньтын шоронгоос Хорих 461 дүгээр ангид томилогдон ирсэн нь анхаасаа цагаан захтнуудад үйлчлэхээр ирсэн юм биш биз гэх хардлагыг төрүүлэх болсон баримтуудаас ганц жишээг дор дурдъя. Өчигдөрхөн нэг том шуугиан яг энэ сэдвийн хүрээнд болоод өнгөрөв. Нүүрсний гэх хэргийн яллагдагч “Эрдэнэс Тавантолгой” ХК-ийн захирал асан Б.Ганхуяг энэ дуулианы эзэн байлаа. Юу гэхээр “Б.ГАНХУЯГ МЭДҮҮЛЭГ ӨГЧ ЧАДАХАА БОЛИЛОО. Өдрийн 15 цагийн алдад 461-р ангид хоригдож байсан "Эрдэнэс Тавантолгой"компанийн захирал Б.Ганхуяг ухаан алдан унаж эмнэлгийнхнийг сандаргаад байна. Тэрээр одоо хүртэл ухаан ороогүй бөгөөд түүний тархины хаван, ходоодны хавдар сэдэрсэн мэдээ байна. Амьд үлдлээ гэхэд мэдүүлэг өгч чадахгүй л болов уу” зэрэг айхтар мэдээллүүд ар араасаа хөврөв. Гэвч энэ нь худал болох нь удалгүй албан ёсны мэдээллээр үгүйсгэгдэж, ар гэрийнхэн нь “манай хүний толгой нь өвдөөд байна гэнэ. Эмнэлэгт хэвтүүлээч” гэж хүссэн төдий зүйл байв.
Улмаар хорихын эмнэлгийн ор луу шилжүүлсэн байгаа юм. Хорих 461-р ангийн дарга, Хурандаа Б.Нямгомбын хэлснээр бие нь муудаж, ухаан алдаад сүйд болсон зүйлгүй, биеийн байдал нь хэвийн байгаа гэдгийг бусад эх сурвалжууд ч хэлэв. Тэгвэл өчигдрийнхөө “сценартай” төстэй байдлаар өнгөрсөн 4 дүгээр сард Б.Ганхуяг Хорих 461 дүгээр ангиас гарч яваад, Интермэд гэх өндөр төлбөртэй, хувийн эмнэлгийн зөөлөн орон дээр хэд хоног “ямбархаж” хэвтээд, хөөрхий хэдэн жирийн хянагчдыг ээлжлүүлэн эмнэлгийн коридорт гөлийтөл суулгаж байгаад буцсан байдаг. Тэр ийнхүү хорихоос гарахдаа ямар ч онцын зовиур байгаагүй гэдэг. Улмаар Интермэд эмнэлэгт хэд хоног хэвтэхдээ витамины дусал, аскорпинийн хүчлээс давсан үйлчилгээ бараг аваагүй шахам байж байгаад явсан гэдгийг тус эмнэлгийнхэн ч хэлнэ. Яг энэ процесс нь Хорих 461-р ангийн удирдлагууд, тус хорих ангийн эмнэлгийн удирдлагууд улс төрчид, эрх мэдэлтнүүд, хэн нэгэн мөнгөтэй этгээдэд үйлчлээд, давуу байдлыг олгоод байна гэх хардлагыг төрүүлж байгаа юм. Хорих 461 дүгээр ангийн дарга, хурандаа Б.Нямгомбо арай энэ байдлыг гаргаад байгаа юм биш биз... Тодруулбал, Хорих ангийн эмнэлэг нь 2-р шатлалд хамаардаг бөгөөд, эмнэлэг комиссын шийдвэр нь 401-р ангийн эмч нарын дүгнэлтээр дараагийн шатлалд шилжүүлэн хэвтүүлэх үү үгүй юу гэдгийг шийддэг журамтай. Өөрөөр хэлбэл, тус эмнэлэг нь эмчилгээ, үйлчилгээ үзүүлэх боломжгүй, өвчнийг нь оношлох боломжгүй байвал өнөөх дүгнэлтийг нь үндэслээд өвчтөнөө буюу цагдан хоригдож буй этгээдийг өөр эмнэлэг рүү явуулдаг гэсэн үг л дээ. Тэгэхээр 2-р шатлалын эмнэлэг байж онцын зовиургүй, эрүүл хүнийг манай эмнэлэг эмчилж чадахгүй гээд жирийн нэг эмч шууд дүгнэлт гаргаад, ийм том хэргийн яллагдагчийг явуулчихна гэж байхгүй. Тиймээс энэ асуудалд дарга нарынх нь оролцоо байх нь зүйн хэрэг. Учир нь тэдний гарын үсгээр гарах эсэх нь шийдэгддэг.
Хорих ангийн эмнэлэг өвчтөнөө дараагийн буюу 3-р шатлалын эмнэлэгт шилжүүлэхдээ гэрээт эмнэлэгүүд буюу зөвхөн улсын тодотголтой цөөн хэдхэн эмнэлэг рүү л шилжүүлэх ёстой. Гэтэл гэрээгүй, хувийн эмнэлэг рүү хүнээ шилжүүлсэн нь өөрөө хардлага төрүүлэх, шалгагдах ёстой содон асуудал... Хэрвээ Интермэд эмнэлэгтэй Хорих 461 дүгээр ангийн эмнэлэг чинь гэрээтэй юм бол ил гаргаад тавина уу, Б.Нямгомбо дарга аа.
Нөгөөтэйгүүр Б.Ганхуягийг өөр эмнэлэг рүү гаргах шийдвэрийг 401-р ангийн эмнэлгийн комиссоос гаргаад Хорих 461 дүгээр ангийн дарга, удирдлагад нөлөөлчихсөн үү? Эсвэл “нүүрсний хэргийн талаар бүхнийг мэдэгч, би гараад бүгдийг хэлээд өгье” гээд байгаа Б.Ганхуягийг ингэж сүртэй мэдэгдэл хийж магадгүй гээд цаана нуугдаж буй нүүрсний том хулгайчид, эрх баригч МАН-ынхан ШШГЕГ-т, Хорих 461-р ангийн удирлагад нөлөөлж, МCS -ийн Интермэд эмнэлэг рүү тухайн үед гаргаж авав уу. Цаашилбал MCS-ийнхэн нүүрсний хэрэгт холбоотой юу гэх олон асуулт байна. Аль эсвэл энэ эмнэлэг мөнгөтэй л бол хэвтүүлэн эмчлүүлэх шаардлагагүй хүнийг аваад хэвтүүлчихдэг хэрэг үү...
Өдгөө Хорих 461 дүгээр ангид хоригдож байгаа тэр олон аавын хөвгүүдээс яагаад ганц Б.Ганхуяг Интермэд эмнэлгийн зөөлөн оронд тухлав. Бусад хоригдож байгаа хүмүүс ер нь энэ мэт бусад эмнэлгүүд рүү яагаад гардаггүй юм. Тэдний өмгөөлөгч, ар тал хүчгүйдээд байна уу? Эсвэл ардын хүүхдүүд өвддөггүй, албан тушаалтан, цагаан захтнууд л өвдөж зовоод, эвийлүүлж, эрхлэхгүй бол болдоггүй юм уу. Үндсэн хуульд заасан хүн бүр амьд явах эрхтэй. Эрүүл мэндээ хамгаалуулах, эмнэлгийн тусламж авах эрхтэй гэсэн заалт хаалттай хашааны цаана яаж хэрэгжээд байна вэ? Эцэст нь хэлэхэд булгийн эх нь булингартай бол адаг нь булингартай гэж үг бий. Аль эртнээс л ШШГЕГ-ын өмнөх удирлагууд байс гээд л янз бүрийн асуудалд холбогддог, шалгагдаж байсан түүх бий. Энэ байдал одоо ч арилаагүй юм биш биз.
Ер нь бол ШШГЕГ-ын удирдлагууд байс гээд солигддог, тогтож өгдөггүй сонин онцлогтой. Шулуухан хэлэхэд хурандаа цолтнуудын Генерал болох дамжаа аятай л явж ирсэн. Заримдаа ШШГЕГ-ынхны шийдвэр нь шүүхээс дээгүүр эрх мэдэлтэй болчихсон юм уу гэлтэй л аяглах болж. Шүүхээс цагдан хорь гээд шийдвэрээ гаргаад явуулсан хүнийг зүгээр байхад нь хувийн эмнэлгийн хөвөн дэрийг дэрлүүлчихсэн байх жишээтэй. Ер нь энэ мэт байдлаар ШШГЕГ-ынхан цагаан захтнуудын орыг дэвсэж өгсөөр байх уу...
Үргэлжлэл бий...
Сэтгэгдэл (5)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.
Unuruu,Otgon,Budragchaa gesen shudraga setguulch nar ene hunii bichsen sedviig anhaaraldaa avch,ene tuhai ard tumend olon jil nuugdaj haagdaj irsen ene gazriin bulhaig il tod bolgoj survaljij ugnu uu! Jiriin ard yalaa uurdeg,tsagaan zahtnuud shorond ch tarvalzaj,hedhen sar bolood sullagdgiig bugd hardag shuu dee,shorongiin udirdlaguudiin avilga herees heterlee,tsaana ni mash ih buzar ajillagaa yavagddag bhoo,edgeeriig ard tumend il bolgoj ugnuu shudraga setguulchdee!!!.
Zail zail
Tsoloo avsan bol zailaachee tsgadaa naraa
Tsagdaagiin novshnuud shuuhiin shiidverees zailah heregtei
Хүрэлсүхийн суга Амарсанаагийн хийж байгаа үйлдэл. Нямгомбо юу мэдэхэвдээ