Вагнерын Беларусь дахь "аялан тоглолт" өндөрлөж байна

Мягмар гарагт хоёр талын иж бүрэн сургуулилт Беларусь улсад өндөрлөж байна. Беларусийн цэргүүд болон Вагнерчууд хамтран Польштой зэргэлдээх бүс нутгуудыг оролцуулан байлдааны идэвхтэй бэлтгэл хийв. Гэсэн хэдий ч хамгийн ойрын хөрш орнуудын хувьд Вагнер бүлэг нь тэдний санааг зовоохоо хэдийнэ больсон. Беларусийн аюулгүй байдлын хүчний байгууллага болох BYPOL-ийн мэдээлснээр түүний хэдхэн зуун гишүүн Беларусь улсад үлджээ. Түүнчлэн тус бүгд найрамдах улс дахь Оросын цэргийн албан хаагчдын тоо мэдэгдэхүйц цөөрсөн гэж ажиглагчид тэмдэглэж байна.

Вагнерын шийдэлд Ерөнхийлөгч Александр Лукашенко алдаа гаргаж, үүнийхээ төлөө улс төрчийн хувьд нэмэхээс илүүтэй хасах оноо цуглуулсан гэж шинжээчид үзэж байна. 

Бүгд Найрамдах Беларусь Улсын Зэвсэгт хүчний хоёр талын иж бүрэн сургуулилт нь опертив тактикийн түвшний байгууллагуудын бэлтгэлийн хүрээнд өндөрлөв. Сургуулилт Брест, Гродно, Минск мужуудад явагдсан. Беларусийн БХ-ын тэргүүн дэд сайд, Жанжин штабын дарга Виктор Гулевич хөрш орнуудын санаа зовнилыг зогсоож, “Энэхүү сургуулилт манай хөрш орнуудад ямар ч аюул занал учруулахгүй. Энэ нь улс орноо батлан хамгаалах цэргийн бэлтгэлийн түвшинг дээшлүүлэх зорилготой” гэж тайвшруулав.

Энэ зуур Польш, Балтийн орнуудын санаа зовоох гол шалтгаан болж байсан Вагнер бүлэглэл Беларусийн нутаг дэвсгэр дээр улам бүр уусч бүдгэрч байна. Сөрөг хүчний талд орсон хуучин хамгаалалтын албаныхны мэдээлснээр Осиповичийн ойролцоох майхан хуаранд зуу гаруйхан Вагнерийн дайчид үлдсэн. Мөн өөр 200-300 хүн бүгд найрамдах улс даяар тархсан. Хэдийгээр ажиглагчид Вагнерийнхан дээрх хоёр талын хамтарсан сургуулилтад оролцож байгааг үгүйсгээгүй ч тэд бие даасан хүчний төлөөлөл байхаа больсон гэж тэмдэглэжээ.

Үүний зэрэгцээ, наймдугаар сард Александр Лукашенко энэ нэгжийг хадгалахыг хүсч байгаагаа мэдэгдсэн юм. Ерөнхийлөгч тэднийг Африкт ашиглахаар төлөвлөж байсан гэж улс төр судлаач Дмитрий Мицкевич үзэж байна.

“Лукашенко Вагнерчуудыг оруулж ирсэн ч үйл ажиллагааг нь төсөвтөө тохирсон байдлаар зохион байгуулж чадаагүй. Түүний харилцаа холбоо, боломжууд хангалтгүй байв. Түүний  мэргэжил нэгт дарангуйлагч Экваторын Гвинейгээс ирсэн ч энэ асуудлыг шийдвэрлэхэд тус болоогүй" гэжээ.

Александр Лукашенко улс төрийн буруу тооцоо хийсэн гэж улс төр судлаач Александр Класковский  мөн үзэж байна. 

Вагнерын бүлэглэл Беларусийн нутаг дэвсгэрт шилжсэн нь хөрш орнууд өдөөн хатгалга гарахаас эмээж, хурц хариу үйлдэл үзүүлээд зогсохгүй тус улсад ч тэднийг таатай хүлээж аваагүй. Беларусийн өөрчлөлтийг хянах төслийн хүрээнд хийсэн хамгийн сүүлийн үеийн социологийн судалгааны зохиогчид: "Дэглэмийг тууштай дэмжигчид ч гэсэн Вагнерын бүлэгт итгэхгүй байгаагаа илэрхийлж, эерэг үнэлгээ өгөхгүй байна" гэжээ.

Судлаачид энэхүү цэрэгжсэн бүтцийг тус улсад байршуулах нь Украины нутаг дэвсгэр дэх мөргөлдөөнд оролцохоос татгалзах  Беларусийн нийгмийн цорын ганц тогтвортой зөвшилцөлийг   эвдэж байна гэж дүгнэжээ.

Үүний зэрэгцээ одоогийн цэргийн сургуулилт нь өмнөх сургуулилтаас ялгаатай нь Оросын бүрэлдэхүүн хэсгүүдийн оролцоогүйгээр зохион байгуулагдаж байна. Ерөнхийдөө Беларусь дахь тэдний оролцоо мэдэгдэхүйц буурсан гэж ажиглагчид тэмдэглэж байна. Бие даасан мониторингийн төслүүдийн дагуу одоогоор зөвхөн нисэх онгоцны буудал болон бусад цэрэг-техникийн байгууламжид үйлчилдэг бүрэлдэхүүн тус улсын нутаг дэвсгэрт байна гэжээ.

Эдгээр мэдээлэлтэй холбогдуулан сөрөг хүчний төлөөлөгчид, тэр дундаа олон улсын тавцанд сүүлийн үед идэвхтэй сурталчилж буй "Беларусийг Орос эзэлсэн" тухай яриа анхаарал татаж байна. Тодруулбал, өнгөрсөн долоо хоногт гадаадад байгаа Беларусийн сөрөг хүчний удирдагч Светлана Тихановская НҮБ-ын Ерөнхий Ассамблейн чуулган дээр хэлсэн үгэндээ “Лукашенко 2020 оны сонгуульд ялагдаж, бүх л хууль ёсны байдлаа алдахад Кремль Беларусь дахь хяналтаа чангатгахаар шийдсэн.  Орос улс Беларусийг Европын орнуудтай сөргөлдөх утсан хүүхэлдэй болгон ашиглаж байна” гэжээ.

Улс төр судлаач Александр Класковский  дээрх мэдэгдлийн хариуд "Лукашенко, түүний коридор улам нарийссан ч дотоод, гадаад бодлогын салбарт маневр хийсээр байна. Заримдаа болхи харагддаг ч зарим тохиолдолд чадварлаг харагддаг. Аливаа дэглэмийг эсэргүүцэгчид удирдагчдыг нь гутаан доромжлох хүсэл эрмэлзэлтэй байдаг тул эзлэн түрэмгийлэл, хүүхэлдэйн жүжиг, тусгаар тогтнолоо бүрмөсөн алдах тухай дахин дахин давтаж байх шиг байна. Ийм үзэл бодол нь улс орны болон эргэн тойрон дахь нөхцөл байдалд бодитой дүн шинжилгээ хийхэд саад болж байна. Эцсийн дүндээ төрт ёс алдагдаагүй  байгаа нь өөрчлөлтийн хувь заяанд чухал ач холбогдолтой юм” гэлээ.

Эх сурвалж:.ng.ru