Хотын дарга Д.Сумъяабазар гурваас уруудсан дүн авч, “Түгжрэл”-ийн сайдтай хамт “таалагддаггүй”, “сонгохгүй” жагсаалтад оров

Улаанбаатар хотын сонгуулийн насны 1008 иргэнээс санамсаргүй түүврийн аргаар авсан судалгаанд намын жагсаалтад оруулбал намаа “татаж унагаах” улс төрчдийг онцолсон байна.

МАН-ын хувьд Сү.Батболд, С.Баяр, Д.Сумъяабазар, Ц.Нямдорж нар манлайлсан бол АН-ыг С.Баярцогт, С.Эрдэнэ, Ц.Элбэгдорж, Лу.Гантөмөр нар тэргүүлжээ.

 МАН-ын намын дарга нь энэ жагсаалтад багтаагүй. Харин АН-ын “шинэхэн” дарга толгой эгнээнд явна. Мэдээж энэ бол санамсаргүй түүврийн аргаар авсан “MEC “ агентлагийн судалгаа. Агентлагт эргэлзэж ч болох. Гэвч АН-ын дарга Лу.Гантөмөр түүний тэргүүн дэд дарга С.Баярцогт нар энэ жагсаалтын тэргүүн эгнээнд бичигдсэн нь АН “шинэчлэгдсэн” гэх пиартаа тайвшрах болоогүйн тод илэрхийлэл.

“Нэг бүдэрвэл долоо бүдэрнэ” гэгчээр нийслэлийн Засаг дарга Д.Сумъяабазар “сонгохгүй” гэх улс төрчдийн жагсаалтын тэргүүн эгнээнд орохдоо “түгжрэл”-ийн сайд Ж.Сүхбаатарыг хань татсаныг харж болно. Энэ талаас нь харвал “хар” жагсаалт бас ч гэж голтой гарсан байж болох.

Жагсаалтад, мөн нийслэлийн Сонгинохайрхан дүүрэгт МАН-аас УИХ-д сонгогдсон Н.Учрал, П.Анужин, Б.Жаргалмаа гишүүн оржээ. Ерөнхий сайд Л.Оюун-Эрдэнийн танхимаас Н.Учрал, Ж.Сүхбаатар, Ч.Хүрэлбаатар нар багтсан байгаа юм.

Тэгвэл АН-аас Ерөнхийлөгч асан Х.Баттулга болон түүний далбаан дор Баянхонгороос УИХ-д сонгогдсон Д.Ганбат, А.Адъяасүрэн нарыг болон УИХ-ын гишүүн Ж.Батсуурь, Н.Алтанхуягийг иргэд онцолсныг харж болно.

Гэхдээ үйл ажиллагаа нь таалагддаг улс төрч дунд экс Ерөнхийлөгч Х.Баттулга болон УИХ-ын гишүүн АН-ын дарга асан Н.Алтанхуяг хоёр байр сууриа алдахгүй жагссан хэвээр байна. Ерөнхий сайд Л.Оюун-Эрдэнэ 30 хувийн саналаар тэргүүлсэн бол У.Хүрэлсүх 22 хувиар удаалж, Х.Баттулга 17 хувиар гуравт явна. ХҮН-ын ганц “лидер” УИХ-ын гишүүн Т.Доржхандын хувьд өнгөрсөн сарынхаас -2-хувиар үзүүлэлт нь буурчээ.

Судалгаанд оролцсон иргэд УИХ-ын үйл ажиллагаанд 10 онооноос 3-ыг өгсөн байна. Эерэг гэж болох ганц дүгнэлт нь “Байж л байгаа” гэсэн бол сөрөг нь “үр дүнтэй шийдвэр байхгүй”, “Хөгжлийн банк дээрэмдсэн”, “нүүрсний хулгайтай холбогдсон” гэх дүгнэлтүүд.

Ерөнхий сайд Л.Оюун-Эрдэнэд 10-аас 6.8 оноо өгсөн нь судалгааны хамгийн өндөр, хамгийн сайн үзүүлэлт харагдаж байна. Авлига, нүүрсний хулгайтай тэмцдэг гэх ойлголт иргэдийн дунд байгаа нь түүний рейтингийг дээш өргөх гол үзүүлэлт болжээ.

Гэвч үнийн өсөлт, Хөгжлийн банкны хулгайчдад хариуцлага ногдуулж чадаагүй, Нүүрсний хулгайг шийдэж чадахгүй байна гэж иргэд үзсэн хэвээр байна.

Ерөнхийлөгч У.Хүрэлсүхийн хувьд энэ жилийн хамгийн өндөр үзүүлэлт буюу 10-аас 6,2 оноо авчээ. Үүнд, Монгол Улсын гадаад харилцаа онцгой байр суурь эзэлсэн бололтой. Гэхдээ судалгаанд оролцсон иргэдийн 12 хувь нь түүнийг “амлалтандаа хүрдэггүй” гэжээ.

Манай хотын даргын рейтинг өмнөх сараасаа муужраагүй ч бас сайжраагүй. Тэр 10-аас 2.9 оноо авчээ. Ер нь л гурваас дээш оноо ховорхон авдаг хүн. Газар чөлөөлөлт, хот тохижилтын зарим ажилд түүнд эерэг оноо өгсөн ч Улаанбаатарын хотын түгжрэл, дугаарын хязгаарлалт гээд доош чангааж, хойш татах зүйл бишгүй. Тиймээс ч үйл ажиллагаа нь таалагддаггүй улс төрчийг 28 хувиар манлайлжээ. Араас нь Ерөнхийлөгч шил дарж, Ерөнхий сайд Л.Оюун-Эрдэнэ гурвалж, “Түгжрэл”-ийн сайд Ж.Сүхбаатар эрчтэйгээр нэхэж явна.

Энэ жагсаалтад Ерөнхий сайд Л.Оюун-Эрдэнэ Засгийн газрын танхимынхаа хэд хэдэн сайдтай багтжээ. ХЗДХ-ийн сайд Х.Нямбаатар, ЦХХХ-ны сайд Н.Учрал, “Түгжрэл”-ийн сайд Ж.Сүхбаатар.

Харин намуудын рейтингийн хувьд өнгөрсөн 6 сард төдийлэн өөрчлөлт гараагүй байна.