Нийслэлийн АН-ын даргыг маргааш сонгоно

Ардчилсан намын 4/11 мэдээллийн цагаар нийслэлийн Ардчилсан намын даргын сонгууль, батлан хамгаалахын салбарт гарч буй хүний эрх зөрчсөн асуудлуудын талаар мэдээлэл хийлээ. 

Нийслэлийн АН-ыг удирдаж, ирэх оны сонгуульд оролцох хүнийг сонгохоор бүртгэл эхэлсэн байна. Энэ талаар АН-ын ХЭГ-ын дарга Н.Лхагвадорж "АН өнгөрсөн нэг сарын хугацаанд дунд шат, 21 аймаг, есөн дүүргийн намын хорооны даргыг сонгосон. Нийслэлийн АН-ын даргад нэр дэвшигчдийн бүртгэл өнөөдөр эхэллээ. Бүртгэл өнөөдөр 18:00 цаг хүртэл үргэлжилнэ. Сонгуулийг АН-ын дотоод сонгуулийн хорооноос зохион байгуулдаг. Нийслэлийн АН-ын даргад нэр дэвшигчид ямар нэгэн цензур байхгүй. Харин намын дотоод дүрэм, журмын хүрээнд сахилгын, хуулийн хүрээнд ял шийтгэл авч байгаагүй хүн байх ёстой. Нийслэлийн АН-ын даргын сонгууль маргааш болно" гэв. 

Мөн "Өрийн дарамтгүй Монгол" үндэсний хэлэлцүүлгийн талаар АН-ын УТЗ-ийн гишүүн Д.Батсайхан "Хэлэлцүүлгийн хүрээнд би Завхан аймагт ажиллаад ирлээ. Өргүй хүн гэж алга. Улс нь ч өртэй, ард иргэд нь ч өртэй, аж ахуйн нэгжүүд нь ч өртэй байна. Улсаас цалинждаг, тендер авдаг байгууллагууд, уул уурхайн компаниуд л өргүй байна. Бид  баялгаа зөв зохистой ашиглаж чадахгүй байна. Төсвийг хумих, данхар бүцтийг бууруулах нэн тэргүүний шаардлагатай. Төрийн өмчийн бүх компаниудыг хувьчилж, хувийн хэвшлийг дэмжиж, өрсөлдөөнийг бий болгомоор байна. Иргэдийн өрийн ачаалыг бууруулахын тулд орлогыг нэмэх хэрэгтэй. 

НИТХ-ын төлөөлөгч Д.Энхтуяа: Ардчилсан нам 2012-2016 онд Улаанбаатар хотод 33 уулзвар хийсэн. Улс даяар 3000 км авто замаар бүх аймгаа холбосон. "Найрсаг Улаанбаатар" хөтөлбөрийг эхлүүлж байсан. Үүнийг МАН-ынхан "Аз жаргалтай Улаанбаатар" хөтөлбөр болгосон. Гэхдээ бид аз жаргалтай Улаанбаатар хотод амьдарч чадаж байна уу, цаашид амьд явах уу гэдэг асуудлыг иргэд, олон нийт хөндөж байна. Зөвхөн шахмал түлшний хорт бодисноос үүсэлтэй шинэ төрлийн элэгний вирус гарчихлаа. 

ҮБХ-ны гишүүн Х.Номингэрэл: Цэргийн алба хааж байх үедээ амь насаа алдсан асуудалд ямар нэгэн хариуцлага алга. Энэ бол тогтолцоо, системийн шинжтэй хүний эрхийн зөрчил юм. Дөнгөж 18 нас хүрсэн хөвгүүд маань цэргийн дэг, дүрмийн бус харилцааг туулдаг нь жендерт суурилсан эрэгтэйчүүдийн хүчирхийлэл болоод байна. Хүний эрхийн талаас “ХЭҮК” тасралтгүй ярьсаар ирсэн ч сүүлийн 10 жил цэргийн ангид 463 гэмт хэрэг гарч 20 хүн амь насаа алдаж, дүрмийн бус харьцааны зөрчил 150 гаруй бүртгэгдсэн байна. Цэргийн албанд байхдаа учир битүүлгээр амь насаа алддаг, амиа хорлосон гэдэг мэдээллүүд ирдэг. Амиа хорлоход хүргэнэ гэдэг маш том гэмт хэрэг. Мэдээлээгүй, ил гараагүй, дараад өнгөрсөн тохиолдол ч олон байх. Бэлгийн хүчирхийлэлд өртсөн зөрчлүүд ч мөн илэрсээр байна. Тиймээс одоо Цэргийн хуульд өөрчлөлт оруулж, дэглэлтийг хүчирхийллийн хэлбэрт оруулмаар байна" гэлээ.