ЭРДОГАН ГЕРМАНД: Берлин Туркийн удирдагчийг урьсандаа харамссан уу?

Туркийн Ерөнхийлөгч Режеп Тайип Эрдоган Берлинд айлчилж, Германы Ерөнхийлөгч Франк-Вальтер Штайнмайер, Канцлер Олаф Шольц нартай уулзав. 

Талууд  юуны тухай ярилцав?
Ойрхи Дорнодын дайнтай холбоотой Герман, Туркийн байр суурь эрс тэс зөрж байна. Герман Израилийг дэмжиж байгаа бол Турк үүнийг "террорист улс" гэж нэрлэж байна.

Айлчлалын үеэр олон нийтийн өмнө үг хэлэх, хамтарсан хэвлэлийн бага хурал хийхээр төлөвлөөгүй тул талуудын мэдэгдэл мэдээллийн агентлагууд болон олон нийтийн сүлжээгээр гарчээ.

Эрдоганы хэвлэлийн алба Израиль ХАМАС-ын дайчдын эсрэг явуулж буй цэргийн ажиллагааг нэн даруй зогсоож, гал зогсоохыг зөвшөөрөх ёстой гэж мэдэгдлээ. “Ерөнхийлөгч Эрдоган Палестины нутаг дэвсгэрт Израилийг дайралт хийхээ зогсоох ёстой, тэдний хүний ​​эрхийн зөрчилд дэлхий нийтээрээ  хариу арга хэмжээ авах нь маш чухал" гэж мэдэгдсэн талаар дурджээ. Түүнчлэн гал зогсоох хэлэлцээрийг нэн даруй байгуулах ёстой гэв.

Харин Германы Ерөнхийлөгч Франк-Вальтер Штайнмайер Израилийн оршин тогтнох, өөрийгөө хамгаалах эрхийг дахин онцоллоо.

"Ойрхи Дорнодын мөргөлдөөний талаарх Туркийн сүүлийн мэдэгдэлтэй холбогдуулан Ерөнхийлөгч Франк-Вальтер Штайнмайер Германы байр суурийг тодорхой илэрхийлсэн" гэж түүний хэвлэлийн нарийн бичгийн дарга Х. олон нийтийн сүлжээнд бичжээ.

 Эрдоганы Берлинд уулзсан анхны хүн нь тус улсын Ерөнхийлөгч Штайнмайер байв.  Уулзалтаар Ойрхи Дорнодоос гадна “Турк, Германы хоёр талын харилцаа, дэлхийн асуудлууд”-ыг хэлэлцсэн гэж мэдээлсэн. Орой нь Эрдоган Канцлер Олаф Шольцтой уулзжээ.

Турк-Германы харилцаа

Энэ оны тавдугаар сард Туркийн Ерөнхийлөгчөөр улиран сонгогдсоныхоо дараа Эрдоганыг Берлинд айлчлахыг Германы канцлер Олаф Шольц урьсан бөгөөд  олон тоймчдын бичиж байгаачлан үүнийхээ төлөө  тэр одоо харамсаж байж мэдэх юм.

Германы зарим улстөрч Эрдоганы айлчлалыг цуцлахыг уриалсан ч Шольц хэт туйлширсан арга хэмжээ авахгүй байхаар шийдэж, айлчлалыг ганцхан хаалттай уулзалт, үдийн хоолоор хязгаарлав.

Берлин хотын төвд урьд өмнө байгаагүй аюулгүй байдлын арга хэмжээ авсан нь АНУ-ын Ерөнхийлөгчийн айлчлалын үеийн аюулгүй байдлын түвшинтэй дүйцэхүйц хэмжээнд хүрсэн байна. Туркийн удирдагчийн айлчлалыг аль болох нам гүм байлгахыг Германы эрх баригчид хүсэж байсан нь тодорхой юм.

Германд эрх баригчид хэн байснаас үл хамааран хоёр улсын харилцаа олон жилийн турш  хэцүү төвөгтэй хэвээр байна. Германы улс төрчид Эрдоганыг хэцүү хамтрагч гэж удаа дараа хэлж байв.

Эх сурвалж: ВВСnews