Тарвас яагаад палестинчуудтай эв нэгдлээ илэрхийлэх бэлэг тэмдэг болсон бэ? 

Израйль ХАМАС-ын эсрэг одоогийн дайн эхэлснээс хойш тарвасны дүрс нь дэлхийн өнцөг булан бүрт палестинчуудыг дэмжсэн жагсаалын бэлэг тэмдэг болсон юм. Гэхдээ тарвас Палестины бэлэг тэмдэг болсон нь шинэ зүйл биш юм. 1967 оны дайнаар Израиль баруун эрэг, Газын зурваст хяналтаа тогтоосны дараа тарвас эсэргүүцлийн билэг тэмдэг болон анх гарч ирсэн юм.

Дараа нь Израилийн эрх баригчид хяналтаа тогтоосон нутаг дэвсгэрт Палестины далбааг байрлуулахыг хориглож, зөрчвөл эрүүгийн гэмт хэрэг болгожээ.

Палестинчууд энэ хоригийг тойрон гарахын тулд тарвас хэрэглэж эхэлжээ. Учир нь зүссэн тарвас нь Палестины төрийн далбааны улаан, хар, цагаан, ногоон өнгийн бүх өнгийг агуулдаг аж.

Израиль 1993 онд Ослогийн хэлэлцээрийн хүрээнд Палестины далбааг ашиглахыг хориглосон хоригоо цуцалж, туг нь Газын зурвас болон Баруун эрэгт хяналтаа тогтоосон Палестины эрх баригчдын бэлгэ тэмдэг болсон юм.

Эдгээр үйл явдлын дараа дэлхийн уран бүтээлчид палестинчуудыг дэмжин тарвасны урлагийг бүтээсээр байв. Хамгийн алдартай бүтээлүүдийн нэг нь Халед Хуранигийнх юм. 2007 онд тэрээр "Палестины субьектив атлас" номонд зориулж зүсэм тарвас зурсан нь ихэд алдаршжээ.

"Тарвасны түүх" гэж нэрлэсэн энэ зураг дэлхий даяар аялж, 2021 оны тавдугаар сард Израиль болон Хамас хоорондын мөргөлдөөний үеэр олны танил болсон юм. 

Энэ оны 1-р сард Израилийн Үндэсний аюулгүй байдлын сайд Итамар Бен Гвир олон нийтийн газар Палестины тугийг буулгахыг цагдаа нарт тушаасан бөгөөд туг далбаагаар даллах нь терроризмыг дэмжсэн үйлдэл гэж мэдэгджээ.

Үүний хариуд Израилийн сөрөг хүчний жагсаал дээр тарвасны зураг дахин гарч ирэв. Палестины далбааг Израилийн хуулиар хориглоогүй ч олон нийтийн хэв журамд заналхийлсэн тохиолдолд цагдаа, цэргүүд үүнийг буулгах эрхтэй.

7-р сард Иерусалимд болсон эсэргүүцлийн жагсаалын үеэр Израилийн жагсагчид тарвасны зураг, "эрх чөлөө" гэсэн үгтэй самбар барьжээ. Мөн өнгөрөгч наймдугаар сард Ерөнхий сайд Бенжамин Нетаньяхугийн шүүх засаглалыг шинэчлэх төлөвлөгөөг эсэргүүцэн Тель-Авив хотод цугларсан хэсэг бүлэг жагсагчид тарвасны зурагтай  цамц өмссөн байв.

10-р сарын 7-нд эхэлж өнөөг хүртэл үргэлжилж байгаа дайны үеэр тарвасны зургууд дэлхийн өнцөг булан бүрт палестинчуудыг дэмжих жагсаалын салшгүй хэсэг болж, Газын зурвасын оршин суугчдын эрхийн төлөөх тэмцлийн бэлгэдэл болжээ.

Олон нийтийн сүлжээний зарим хэрэглэгчид өөрсдийн хаягийг хаахаас болгоомжилж, Палестины далбааны оронд тарвас байршуулж байна.

Эх сурвалж. ВВС news