Казахстаны анхны ерөнхийлөгч Нурсултан Назарбаев Владимир Путинд “Миний амьдрал. Хараат байдлаас эрх чөлөө рүү" гэж нэрлэсэн өөрийн намтар номыг бэлэглэжээ. Харин Путин дурсамж номыг уншсан эсэх талаархи сэтгүүлчдийн асуултад Ерөнхийлөгчийн хэвлэлийн албаны дарга Песков ийн хариулжээ.
“Нурсултан Абишевич номоо Владимир Владимировичид илгээсэн, түүнийг ерөнхийлөгчид гардуулан өгөх болно" гэж Песков тэмдэглэв.
Назарбаевын ном арванхоёрдугаар сарын 1-нд хэвлэгдсэн. Номын бүхэл бүтэн нэг бүлэг нь Владимир Путинд зориулагдсан бөгөөд "Удирдагч" гэж нэрлэжээ. Үүнд Казахстаны анхны ерөнхийлөгч ОХУ-ын тэргүүнийг хэлсэн үгийнхээ эзэн, хамт олондоо амласан амлалтаа үргэлж ухамсартай биелүүлдэг хүн гэж үздэгээ онцолсон байна.
Назарбаев мөн Барууны орнуудын системтэй явуулж байгаа Оросын эсрэг бодлогын талаар болон НАТО-г ОХУ-ын хил рүү улам бүр ойртуулах боломжийг олгосон талаар байр сууриа илэрхийлжээ. Түүний бичсэнээр үүний шалтгаан нь ЗСБНХУ-ын анхны ерөнхийлөгч Михаил Горбачевын Умард Атлантын холбоог өргөжүүлэхгүй гэсэн амлалтаа баримтжуулаагүй нь алдаа байсан гэж экс төрийн тэргүүн номондоо дурджээ.
Гэхдээ номонд бичигдсэн дурсамжууд нь зөвхөн ойрын хөршүүдтэйгээ харилцах харилцааны тухай биш юм. Н.Назарбаев намтартаа төмөрлөгийн үйлдвэрийн ажилчнаас төрийн тэргүүн хүртэлх амьдралынхаа замнал, Казахстан улсын тусгаар тогтнол, олон улсын тавцанд гүйцэтгэсэн үүргийн тухай өгүүлжээ.
Тэрээр Владимир Путин, Ши Жиньпин, Касым-Жомарт Токаев, Маргарет Тэтчер, Жак Ширак, Герхард Шрөдер, Тургут Озал, Режеп Эрдоган, Сильвио Берлускони, Ангела Меркель болон бусад олон улстөрчтэй хувийн харилцаагаа тодорхойлсон байна.
Эх сурвалж: Gazeta.ru
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.