Сэтгүүлч Н.Өнөрцэцэгийг баривчилсан асуудлаар Мөрдөн байцаах албанаас мэдээлэл өгч байна.
Мэдээлэлд "Цагдаагийн байгууллагад нэр бүхий иргэн, хуулийн этгээдээс иргэн Н.Өнөрцэцэгт холбогдуулан 2022 оны 7 дугаар сарын 22-ны өдөр, мөн 2023 оны 6, 7, 9, 10 дугаар саруудад Эрүүгийн хуульд заасан гэмт хэргийн шинжтэй гомдол мэдээлэл ирүүлснийг хүлээн авч хуульд заасан үндэслэл журмын дагуу мөрдөн шалгах ажиллагаа явуулж байна.
Өнөөдрийн байдлаар түүнд холбогдох Шүүхийн ерөнхий зөвлөл болон иргэд, хуулийн этгээдээс шүүхийн хараат бус байдалд нөлөөлсөн, хувь хүн иргэний нэр төрд халдсан, худал мэдээллийг олон нийтийн цахим сүлжээ ашиглан тараасан, мөрдөн байцаалтын нууц задруулсан, бусдын эд хөрөнгийг авахаар заналхийлэх гэх хэргүүдэд холбогдуулан шалгаж байна.
Дээрх дурдсан гэмт хэргийн шинжтэй үйлдлүүдийг цагдаагийн байгууллага өөрийн санаачлагаар шалгаагүй. Иргэд, хуулийн этгээдээс өргөдөл гомдол гаргасан учраас Эрүүгийн хэрэг хянан шийдвэрлэх тухай хуульд заасны дагуу хүлээн авч шалгаж байна.
Иргэн Н.Өнөрцэцэгт холбогдох хэрэг бүртгэлт мөрдөн байцаалтын хэргүүдэд энэ оны 6 дугаар сарын 8-ны өдрөөс хойш сэжигтэн, яллагдагчаар мэдүүлэг авах зорилгоор Эрүүгийн хэрэг хянан шийдвэрлэх тухай хуулийн 12.1 дүгээр зүйлд заасан дуудан ирүүлэх өөрийнх нь ашигладаг дугаар бүхий утас руу удаа дараа холбогдон дуудсан боловч хүндэтгэн үзэх шалгаангүйгээр ирээгүй.
Мөн түүнд яллагдагчаар татагдсан тогтоолыг танилцуулахаар прокурорын дуудан ирүүлэх хуудас удаа дараа гардуулсан боловч хүрэлцэн ирээгүй, мөрдөгчийн зүгээс утсаар холбогдоход хүндэтгэн үзэх шалтгаан хэлэлгүйгээр очиж чадахгүй, тогтоолтой танилцахаас санаатайгаар зайлсхийж, мөрдөн шалгах ажиллагаанд саад учруулсан.
Иймд Эрүүгийн хэрэг хянан шийдвэрлэх тухай хуулийн 19.4 дүгээр зүйлд заасан үндэслэл буюу шүүх прокурорын мэдэгдэх хуудсаар дуудахад хүндэтгэн үзэх шалтгаангүй ирээгүй тул цагдан хорих таслан сэргийлэх арга хэмжээ авах үндэслэл болсон.
Цагдаагийн байгууллагаас сэтгүүл зүй болон сэтгүүлчийн мэргэжлийн үйл ажиллагаатай холбогдуулан шалгаагүй. Иргэн Н.Өнөрцэцэг гэдэг хувь хүнийг шалгаж байгааг үүгээр мэдэгдэж байна.
Цагдаагийн байгууллагад сэтгүүлч нартай холбоотой гомдол мэдээлэл ирдэг. Тухайн сэтгүүлч нар хууль шүүхийн байгууллагаас дуудсан хугацаанд ирж холбогдох асуудлаа хуулийн хүрээнд шийдвэрлүүлээд явдаг. Хүн бүр хууль шүүхийн өмнө тэгш эрхтэй байх ёстой. Ийм ч зарчимтай. Н.Өнөрцэцэгийг мөрдөгч, прокурор, шүүхээс дуудахад ирэхгүй байх давуу эрх түүнд байхгүй.
Тухайлбал, өнгөрсөн сард нэр бүхий төрийн өмчит компанийн удирдлага хоёр сэтгүүлчийн эсрэг гомдол гаргасан. Үүнийг хуулийн дагуу шалгаж, сэтгүүлч нарыг шалгаад тухайн асуудал нь гэмт хэрэг зөрчлийн үндэслэлгүй байна гэдэг үндэслэлээр хэрэг бүртгэлтийн хэрэг нээхээс татгалзаж шийдвэрлэсэн. Тухайн хоёр сэтгүүлч дуудсан цагт ирж мэдүүлэг тайлбайраа өгч байсан.
Дахин хэлэхэд иргэн Н.Өнөрцэцэг гэдэг хувь хүнтэй холбоотой асуудлыг шалгаж байгааг мэдэгдье. " гэв.
Сэтгэгдэл (1)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.
худалаа цагадаад итэгхээ байсан байгаа