Автобусны тендер шалгаруулахдаа 200 хүүхдийн багтаамжтай 9 цэцэрлэг барих хөрөнгийг үл хайхрав

-Автобусны тендерт хамгийн бага үнийн санал өгсөн Хятадын төрийн өмчит компанийг хасч нийт дүнгээр 18 тэрбум төгрөгөөр  илүү  саналтай “Yutong Bus”-ыг шалгаруулжээ-

Саяхан зарлагдаж хаагдсан Нийтийн тээврийн автобус /Улаанбаатар/ тендер буюу нийслэл хотод нийлүүлэх 600 автобусны тендер шалгаруулалтыг шударга бус өрнөсөн гэж үзэж байна. Ингэж үзэх хангалттай үндэслэл бий.

Хэрэв энэ тендер шударгаар явагдсан бол шалгарах хамгийн өндөр магадлалтай Xiamen King Long United Automotive Industry Co., Ltd. нь БНХАУ-ын 100% төрийн өмчит компани бөгөөд Евро стандарт хангасан, дэлхийн 5 тивд экспортлогддог олон улсад хүлээн зөвшөөрөгдсөн автобус үйлдвэрлэгч юм.

Тендерт дурдсан техникийн шаардлагыг хангаж үнийн доод саналыг өгсөн тэднийг хасаж нийт дүнгээр 18 тэрбум төгрөгөөр илүү Yutong Bus Co., Ltd.-ийн саналыг шалгаруулсан нь татвар төлөгчдийн мөнгийг хэн нэгний ашиг сонирхолд нийцүүлэн шамшигдуулж байгаа ноцтой асуудал юм. 18 тэрбум төгрөгөөр 200 хүүхдийн багтаамжтай 9 цэцэрлэг барих боломжтой.

Мөн түүнчлэн тендерийн нээлтийн өдөр буюу 2023.11.24-ний өдөр  Нийслэлийн Засаг даргын хэвлэлийн төлөөлөгч Н.Сугар "2023 он дуусахаас өмнө эхний ээлжийн 300 гаруй автобусыг оруулж ирнэ. Үлдсэн автобуснуудыг 2024 оны нэгдүгээр улиралд багтаан авна" гэх мэдэгдэл хийсэн ба уг мэдэгдэл нь өмнөх ямар ч тодруулга дээр тусгагдаагүй бөгөөд тендерт оролцогчдын хувьд шинэ мэдээ байсан. Гэтэл тендерт шалгарсан Yutong Bus Co., Ltd.-ийн нийлүүлэлтийн хуваарь нь урьдчилан тохиролцсон мэт уг мэдэгдлийн дагуу байхаар төлөвлөсөн байна.

Xiamen King Long United Automotive Industry Co., Ltd. нь төрийн өмчит байгууллага тул хуулиараа болон дотоод ёс зүйн дүрмээр аливаа авлига, хээл хахууль, ашиг сонирхлын зөрчлийг ямар ч нөхцөлд хатуу хориглодог тул энэ компани энэхүү тендерт ямар нэгэн хээл хахууль, урьдчилан тохиролцсон зүйлгүйгээр оролцсон гэдэгт эргэлзэх зүйл алга.

Тэд ашгийн хувь хэмжээг хамгийн бага түвшинд тавьж 71,000 ам.доллароор нэг бүрийг нь нийлүүлэх санал өгсөн. Гэвч тендерийн үнэлгээний хороо 80,000 ам.доллараар санал өгсөн Yutong Bus Co., Ltd.-ийг шалгаруулжээ. Xiamen King Long United Automotive Industry Co., Ltd.-ын  санал болгосон автобус нь техникийн шаардлагыг хангаж байгаа атал, шалдар булдар зүйлээр халхавчилж, баримт бичгийн шаардлага хангаагүй хэмээн үнээр өрсөлдөх боломжийг хааж хассан байна.Үүнийг тодруулбал:

1. Энэ зураг дээрх албан бичигт дурдагдсан Автын инженерээр санал болгосон Зен Ган нь тус компанид 29 дэх жилдээ ажиллаж байгаа (29 жилийн НДШ төлсөн баримтыг хүргүүлсэн), 2000 гаруй ажилтнаас сонгож оруулсан шилдэг ажилтан юм. Мөн тендерийн шаардлагад нийт 5 инженер техникийн ажилтантай байна гэсэн боловч, манайх 10 инженер техникийн ажилтны мэдээлэл буюу шаардлага бүр дээр 2 хүнийг санал болгосон. Тиймээс нөгөө ажилтны ажлын туршлага ч шаардлагад заасны дагуу 5-аас дээш жил байна.
2. Аль ч автомашин үйлдвэрлэгчид цахилгаан тээврийн хэрэгслийн дизайн, загвараар өрсөлддөг болсон. Бид хамгийн сүүлийн үеийн загвар дизайн бүхий автобусны платформуудынхаа каталогийг илгээсэн. Хамгийн сүүлийн онуудын загварууд буюу хамгийн шинэ загвар, моделиуд. Цахилгаан гэдэг маань доторх технологи болохоос биш, загвар хийц ижил доторх тэжээл нь дизель, бензин, газ байх боломжтой. Гэтэл үүнийг зөвхөн цахилгаан автобусны каталог ирүүлсэн. Үйлдвэрлэгчийн каталог ирүүлээгүй гэж дүгнэсэн байна. Хэрэв үнэлгээний хороо хүсвэл www.kinglong-bus.com/products гэж ороод бүх загварыг харах нь нээлттэй.

Кинг  Лонггийн зүгээс уг шударга бус шалгаруулалтын  үр дүнг хүлээн зөвшөөрөхгүй бөгөөд холбогдох байгууллага нь энэ ноцтой зөрчлийг шударгаар шуурхай шийдвэрлэнэ гэж найдаж байгаа гэдгээ илэрхийлжээ.

Оноос өмнө 300 автобус нийлүүлнэ гэдэг нь эргэлзээтэй

Нийтийн тээврийн автобус  нийлүүлэх тендерт ялсан Хятадын Yutong Bus Co., Ltd. Компани оноос өмнө 300 автобус нийлүүлэх боломжтой юу гэдэг нь эргэлзээтэй  асуудал юм.

Тендерийн нээлтийн үеэр 2023.11.24-ний өдөр  Нийслэлийн Засаг даргын хэвлэлийн төлөөлөгч Н.Сугар  "2023 он дуусахаас өмнө эхний ээлжийн 300 гаруй автобусыг оруулж ирнэ. Үлдсэн автобуснуудыг 2024 оны нэгдүгээр улиралд багтаан авна." гэх мэдээлэл хийсэн. Тендерт оролцогчдын зүгээс уг мэдэгдэл нь өмнөх ямар ч тодруулга дээр тусгагдаагүй байсан гэж үзэж байгаа юм. Гэтэл тендерт шалгарсан Yutong Bus Co., Ltd.-ийн тендер дээр нийлүүлэлтийн хуваарь нь урьдчилан тохиролцсон мэт уг мэдэгдлийн дагуу байхаар тааруулж төлөвлөсөн байгаа гэдгийг дээр дурдсан.

2023 ондоо буюу ганцхан сарын дотор амжуулж 20 хоногт 300 автобус нийлүүлнэ гэдэг нь өмнө нь тохиролцож үйлдвэрлэж эхлээгүй л бол амжихааргүй амлалт бөгөөд  өдөрт 15 автобус үйлдвэрлэж нийлүүлэх нь боломжгүй зүйл гэдгийг тендерт оролцогчдын зүгээс илэрхийлж  байгаа юм. Энэ нь “бушуу туулай борвиндоо баастай”  гэдэг шиг түргэн шүүрхий, дахиад  чанаргүй автобус нийлүүлэгдэх вий гэсэн болгоомжлолыг төрүүлж байна.

Тендертэй холбоотой хоёр дахь гол агуулга нь Автобусны тендер хуулийнхаа дагуу явсан бол төсөвт өртгөөс 35 тэрбум хэмнэгдэх ёстой гэсэн шударга ёсны хүсэмжлэл.

Хуулийнхаа дагуу харьцуулах үнийн шалгуурыг баримталж шаардлага хангасан хамгийн бага үнийн санал өгсөн оролцогчийг шалгаруулах ёстой атал шалдар булдар шалтаг олж хамгийн өндөр оноотой оролцогч болох Хятадын төрийн өмчит, олон улсад нэр хүндтэй автобусны үйлдвэр болох Кинг Лонгийг хассан. Хэрэв журмынхаа дагуу шалгарсан бол төсөвт өртгөөс 35 тэрбум хэмнэгдэх байв. Ийм хэмжээний хөрөнгөөр 200 хүүхдийн багтаамжтай 18 цэцэрлэг барих эсвэл тус үйлдвэрийн өгсөн үнээр нэмж 146 автобус авах боломжтой төсөв юм.

Харамсалтай нь тендерийг шалгаруулахдаа энэ бүхнийг үл хайхарч татвар төлөгчдийн мөнгөнд хүндэтгэлгүй үрэлгэн байдлаар хандаж, Засгийн газраас хэрэгжүүлж байгаа хэмнэлтийн бодлогыг сөрлөө.