Б.Ононхангай: "Оюутолгой" ХХК цэнхэр хашаан дотроо дураараа хууль зөрчиж байна

“Оюу толгой” ХХК-ийн гэрээлэгч зарим компанийн ажилчдын төлөөлөл цалин хөлс ялгавартай олгодог асуудлаар мэдээлэл өглөө. 

Мэдээлэлд "Оюутолгой ХХК нь туслан гүйцэтгэгч компанид ажиллаж байгаа монгол ажилчдын илүү цагийн хөлсийг олгодоггүй, хүнд хортой нөхцөлийн нэмэгдэл олгохгүйгээс гадна ялгавартай цалин олгож байгааг мэдэгдсэн. Үүнд ил болон гүний уурхай, баяжуулах үйлдвэрт тоостой, хүнд нөхцөлд ажилладаг ч ажилтнуудад хэвийн бусын нэмэгдлийг өгдөггүй. Ижил ажил эрхэлж буй гадаад, монгол ажилчдад ижил цалин олгодоггүй. Гадаад ажилчин 100 сая төгрөгийн, монгол ажилчин 5-10 сая төгрөгийн цалин авдаг. Гэрээт компанийн ажилтнуудын цалин хоёр саяас давахгүй байна. Тендерийн шалгаруулалт шударга явахгүй байна. Хууль зөрчсөн үйлдлээ гэрээлэгч компаниудаар хийлгэж байна" гэсэн юм.

Мөн "Оюу толгой" ХХК-д ажлаа хийж байгаад бэртэж гэмтсэн олон тохиолдол байдаг ч үүнийг нуун дарагдуулдаг гэсэн юм. Жишээ нь 100 орчим ажилчид угаартсан. 15 хүн амьсгалын аппараттай байсан. Гэхдээ үүнийг нуун дарагдуулсан. Энэ мэт олон асуудал гардаг ч нуун дарагдуулдаг. " гэлээ. 

Иргэн Б.Ононхангай "Энэ сард 100 орчим уурхайчин гүний уурхайд угаартсан. 65 уурхайчин хөнгөн угаартаж, үлдсэн нь хүчилтөрөгчийн аппарат зүүж эмчилгээ хийлгэлээ.

Тэд надад эмнэлгийн өрөөнийхөө зургийг ч явуулсан. Ажилчдаас авсан мэдээллээ олон нийтийн сүлжээнд мэдээлсэн. Арга ядаж, хэвлэлийнхэнд ч хандсан. Гадаад ажилтан өрөөндөө нас барсан, галзуурсан гэх мэт тохиолдлууд байгаа. Энэ бүхнийг "Оюу толгой" компани нуудаг, мэдээлдэггүй. Ажилчдын олон нийтийн сүлжээнд тавих мэдээллийг хатуу хянана гэж сүрдүүлдэг. Тус компанид үйлдвэрчний эвлэл байхгүй. Ажилтны эрх ашгийг хамгаалах байгууллагагүй гэсэн үг. Ажилчид эрх ашгийнхаа талаар өргөдөл өгөхөөр шийдэж өгдөггүй, судалж байна л гэж хэлдэг. Амь эрстсэн, осолд орсон, бэлгийн хүчирхийлэлд өртөх эрсдэл үүссэн гэх мэт олон асуудал уурхайд гарсан.

"Оюутолгой" ХХК цэнхэр хашаан дотроо дураараа хууль зөрчиж байна" гэлээ.