Дэлхийд Монголоо сурталчилдаг урлагийн авьяастнуудын тэргүүн эгнээнд циркчид багтана. Циркийн урлаг үзүүлбэрийг дэлхийд сурталчилж, Монголынхоо нэрийг тив дэлхийд гаргаж явсан үе үеийн циркчид өөрийн гэсэн байргүй болоод олон жилийн нүүрийг үзэж байна. Тодруулбал, цэнхэр дээвэртэй Циркийн байр Д.Долгосүрэн зааны "том" толгойтой хүүхдүүдийн гараар ороод устсан гэж хэлж болно доо.
Тухайлбал, Д.Сумъяабазар, Д.Дагвадорж нар циркийн барилгыг авсан. Уг нь улсын өмч байх ёстой. Гэтэл яаж яваад тэдний гарт орсон ээдрээ төвөгтэй. Тиймээс ч өнгөрсөн жил Соёлын яам эзэн нь юмаа мэдэж эрэг нь усаа хашина гэгчээр авна гэж яваад ч амжилт олоогүй. Барилгыг нураагаад засвар хийнэ, хийц хэв маягийг алдагдалгүйгээр цирк хэвээрээ үлдэнэ хэмээн ярьж байсан асуудал сүүлдээ өөр загвараар яригдаж, гадны хөрөнгө оруулалтаар том барилга байгууламж барихаар болжээ гэсэн мэдээлэл цацагдаж эхэлсэн. Сингапурын хөрөнгө оруулалттай, томоохон үйлчилгээний байгууллага болгохоор улайрч шийджээ гэсэн мэдээлэл цацагдсан.
Тэртээ 1971 онд одоогийн Монголын Үндэсний циркийн барилгыг Румын улсын тусламжаар барьж, ашиглалтад оруулсан түүхтэй. Гэвч Монголын Үндэсний циркийг тойруулан хашаа татаж, барилгын дотор талыг нураасан. Циркийн удирдлагын зүгээс “Иж бүрэн засвар хийж байна” гэх мэдэгдлийг хэд, хэдэн удаа гаргасан байна. Засвар хийгдэж, шинэчлэгдэж, үйл ажиллагаагаа нээсэнгүй. Гадны циркчид Монголд ирэхэдээ Бөхийн өргөөг нь түрээслэж тоглолтоо толилуулна. Монголын циркчид ч мөн ялгаагүй.
Циркийн барилгын хэв шинжийг хэвээр хадгалан засвар хийж байгаа гэх боловч эсрэгээрээ, уламжлалт хэв шинжийг нь өөрчилж, манежийг нь нурааж, дотоод хэв загварыг нь алдагдуулсан байдаг гэх.
Гурван жилийн өмнө циркчдийн төлөөлөл “Алтан манежийг нь битгий нураагаач гэсэн ч нураасан байсан. Хувьчилж авсан компани нь яагаад 13 жилийн турш засвар хийгээгүй юм. Энэ бол капитал засвар биш, Румын улсаас барьж өгөхдөө 100-150 жилийн хугацаатай гэсэн. Гэтэл 50 жил ч болоогүй байж бүх өнгө төрхийг нь өөрчилж, манежийг нь нураалаа. Циркийн амин судас, хийморь сүлдийг үндсээр нь тасалсан үйлдэл гэж харж байна. Сайхан болгоно гэж байгаа ч заавал ингэж хэв шинжийг нь алдагдуулан нураах хэрэг байсан юм уу. Монголд шоу хийх газар мундахгүй их байна шүү дээ. Гэтэл гэр бүлээрээ хамт үзэх үзвэрийн газар байхгүй байна" гэж ярьж байсан удаатай.
Тэгвэл цикрийн барилга циркээрээ үлдэх үү, зүс царайг нь өөрчлөөд байна уу гэдэг дээр Хотын дарга асан Д.Сумъяабазар өчигдөр тайлбар хийжээ.
Тэрбээр "Циркийн барилгыг тавдугааор сарын 1 гэхэд ашиглалтад оруулахаар мэргэжлийн залуус өдөр шөнөгүй ажиллаж байна. Компанийн удирдлагуудаас асууж тодрууллаа. Циркийн барилга байгууламжийн ажил нь хийцлэл, үндсэн хэв маяг, загварчлалаа өөрчлөхгүйгээр хэвийн явагдаж байгаа бөгөөд одоо дотоод заслын ажил хийж байгааг хэлж байна" гэжээ.
Тэгэхээр тавдугаар сарын 1-нд л худлаа үнэн эсэхийг харах нь. Өөрсдийгөө өмгөөлж хамгаалж тайлбар хийж байгаа ч өнгөн цаанаа циркийн барилгаар тоглосон байх вий гэсэн болгоомжлол иргэдийн дунд байгаа юм. Тэгвэл бүгдийг цаг хугацаа харуулах нь ээ.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.