Г.Жаргал: Бүсийн хөгжлийг хангахад нэн шаардлагатай зүйл бол хүн өөрөө

Монголын эдийн засгийн форум “Бүсчилсэн хөгжил” сэдвийн хүрээнд хоёрдугаар сарын 1,2-ний өдрүүдэд Төрийн ордонд болж байна. Өнөөдрийн салбар хуралдааны нэг нь “Төвийн бүсийн холболтын дэд бүтэц-тээвэр логистик, боомт, эрчим хүч, харилцаа холбоо” сэдвийн дор хэлэлцүүлэг өрнөж байгаа юм.

Удирдлагын академийн УСУТ-ын тэнхимийн багш, доктор Г.Жаргал “Бүс нутгийн холболтын дэд бүтэц гэдэг асуудал харьцангүй сүүлд яригдаж байна. Өмнө нь бид, дэд бүтэц гэж ярьдаг байсан бол өнөөдөр холболт гэдэг ойлголт бий болсон. Уламжлалт тээвэр, ложистик, эрчим хүч, харилцаа холбоо, боомт гэсэн таван материаллаг хүчин зүйлээс гадна энэ бүгдийг хэрэглэдэг, бүтээдэг хүнийг бас нэмэх хэрэгтэй. Тэгэхээр орон нутагт инженер, техникийн ажилтнуудын хэрэгцээ шаардлага маш их байна. Удирдлагын академи дээр болсон хэлэлцүүлгийн үеэр Төвийн бүсэд нэн шаардлагатай гурван зүйл юу вэ гэсэн асуултад нэгт, мэргэжилтэй ажиллах хүчний хангамжийг нэмэгдүүлэх, мэргэжилтэн бэлтгэх гэж дийлэнх олонх нь хариулсан байсан. Хоёрт, Улаанбаатар хотын төвлөрлийг сааруулах хүрээнд Төв аймаг, Дархан хотод суурьшлын бүс бий болгох, гуравт, хөдөө аж ахуйн бүтээгдэхүүнийг бэлтгэн нийлүүлэлтийн сүлжээ байгуулах буюу ложистик хөгжүүлэх гэжээ.

Ер нь, Хүний нөөцийн хангамжийг нэмэгдүүлэх ямар боломж байна вэ гэхээр нэгдүгээрт аймгийн төвүүдээ хот болгохоо албан ёсоор зарлах. Өөрөөр хэлбэл, Зуунмод, Дархан хот гээд. Хот болох эрхзүй болоод дэд бүтцийг нь байгуулж өгөх ёстой. Өнөөдөр хүн суманд амьдарч байгаа гэдгээ доор байгаа юм шиг бодоод байдаг. Хот гэдгийн цаана эдийн засаг, нийгэм соёлын дэд бүтэц нь бий болж байдаг. Тэгэхээр хүн өөрөө аяндаа татагдаж ирдэг.

Жишээ нь, Дорноговь аймаг багш болон эмч мэргэжлээр ирж байгаа хүмүүсийг тогтвортой таван жил ажиллавал орон сууцаар хангана гэснээр 1000 гаруй хүн ирсэн гэж байна билээ. Сайн мэдээ шүү. Тиймээс тухайн бүс нутагт хэнийг татах вэ, ямар ажлын байраар хангах вэ гэдэг бодлогоо тодорхойлж, өөр дээрээ мэргэжилтнээ бэлтгэх хэрэгтэй. Жишээлбэл, Дарханд техник шинжлэх ухааны сургууль, лаборатор, парк нь байгаад орон сууц, хүүхдийн сургуулийн асуудлыг цогцоор нь шийдээд өгвөл залуус аль ч аймагт очих дуртай байгаа шүү.  Мөн нэн тэргүүнд боомтуудын төвөө хот болгоод хөгжүүлээд явах ёстой” гэв.