12 настай охины аминд хүрсэн Г.Гантулгад бүх насаар нь хорих ял оноож магадгүй

Цагдаагийн байгууллагаас Дорноговь аймгийн Сайншанд сумын ерөнхий боловсролын сургуулийн сурагч охиныг хулгайлж, амь насыг нь санаатай хөнөөсөн хэргийг шалгаж дуусган, прокурорт хүргүүлжээ. 

Мөрдөн байцаах албанаас иргэн Г-д холбогдуулан 2023 оны 10 дугаар сарын 03-ны өдөр насанд хүрээгүй хүнд хүч хэрэглэж, биеэ хамгаалах, эсэргүүцэл үзүүлэх чадваргүй байдлыг ашиглаж эрхшээлдээ оруулан хүн хулгайлсан.

Улмаар 2023 оны 10 дугаар сарын 04-ний өдөр онц харгис хэрцгийгээр, өөр гэмт хэргийг нуун далдлах, хялбарчлах зорилгоор, хохирогчийн биеэ хамгаалж чадахгүй бага насны хүүхэд болохыг мэдсээр байж амь насыг нь хохироосон үйлдэлд Эрүүгийн хуулийн 10.1 дүгээр зүйлийн 2 дахь хэсгийн 2.1, мөн хэсгийн 2.4, мөн хэсгийн 2.7, мөн хуулийн 12.1 дүгээр зүйлийн 4, мөн хуулийн 13.2 дугаар зүйлийн 2 дахь хэсгийн 2.1-д тус тус зааснаар эрүүгийн хэрэг үүсгэн, яллагдагчаар татаж, мөрдөн шалгах ажиллагааг дуусган, хэргийг шүүхэд шилжүүлэх саналтай Нийслэлийн Прокурорын газарт хүргүүлжээ.

Тэгвэл прокурорын байгууллагаас түүнийг бүх насаар нь хорих ял төлөвлөж магадгүй байна. Учир нь өмнө хүчингийн хэрэгт холбогдож байсан, мөн насанд хүрээгүй хүүхдийг санаатай хулгайлж, амь насыг нь хохироосон гэдэг үндэслэлээр яллаж, шүүх юм байна.

Харин хохирогчийн өмгөөлөгчийн хэлж байгаагаар "Энэ хэргийг цагаан сараас өмнө шийдчих байсан ч амжсангүй шүү. Ямар ч байсан хэрэг шалгагдаж дуусаад прокурорын байгууллагад шилжүүлсэн. Сэжигтэн этгээд өмгөөлөгч авсан байгаа юм билээ" гэв.