Малчдад туслах үндэсний аян: Хожуухан эхэлсэн ч хойших үр өгөөж нь хэр байх бол...

Энэ өвлийн их цасыг ойрын жилүүдэд тохиолдоогүй гэж тодотгож байгаа. Зундаа  газар нь улайстал гандаж байсан говийн аймаг, тэр дундаа Өмнөговь аймгийн зарим сумдад өвөл нь орсон цас гэртэй нь чацуу болтлоо зузаарчээ. Тэрчлэн өвгөдийн домог мэт ярьдаг байсан "мөсөн зуд" гэгч энэ жил Монголын энд тэндгүй тохиож байгааг хэвлэлүүд мэдээлж байна.  Хэдийгээр өвлийн сар шувтарч цагийн үзүүр эргэж байгаа ч одоо үргэлжлээд шар усны үер  аюул хот хөдөөгүй нүүрлэж болзошгүй байна. 

Цагийн ороо бусгаа энэ байдалтай холбоотойгоор өчигдөр Улсын онцгой комисс хуралдсан. Эндээс дуулдсан шинэ соргог шийдэл гэвэл "Малчдад туслах үндэсний аян" юм. Үндэсний хэмжээнд ийм аян урьд хожид зохион байгуулж байсныг хэлж мэдэхгүй.  

УОК-ын хурлын шийдвэрийн талаар Шадар сайд С.Амарсанаа "Хүнд цаг үеийг хамтдаа туулна. Өвс тэжээлийг хөнгөлөлттэй үнээр аймаг орон нутагт нийлүүлэхээр боллоо. Зудад нэрвэгдсэн малчдын ар гэрт тусална. Ядуурлаас урьдчилан сэргийлнэ. Бог малын мялцан өвчин гарах магадлалтай учраас хаврын отроос өмнө урьдчилан сэргийлнэ.

Малчдад эмнэлгийн тусламж, эрт илрүүлгийг давхар зохион байгуулахын тулд Засгийн газраас сумдын эрүүл мэндийн төвүүдийн машиныг шинэчлэхэд есөн тэрбумыг зарцуулна.

Хаврын нөхцөл байдал амаргүй байна. Ус, цаг уур, орчны судалгаа мэдээллийн хүрээлэнгийн мэдээгээр энэ оны хоёрдугаар сарын 10-ны байдлаар нийт нутгийн 80 гаруй хувьд цастай, Алтай, Хангай, Хэнтий, Хөвсгөлийн өндөрлөг уулархаг нутаг, Хан Хөхий, Хантайшир, Монголын Дорнод тал болон говийн нутгийн зарим хэсгээр 10-36 см, бусад нутагт 1-9 см, хунгарлаж шуурсан газартаа 60 см, гуу жалгандаа 100 см хүртэл зузаан цастай байна" гэсэн мэдээллийг өгсөн. 

Түүнчлэн Засгийн газрын 286 дугаар тогтоолын дагуу зудын байдалд үнэлгээ хийхэд таван аймгийн 21 суманд төмөр буюу шилэн, 17 аймгийн 89 суманд цагаан зудын байдалтай, 17 аймгийн 82 сум цагаанаар зудархуу нөхцөлд байна.

Улсын хэмжээнд мөн өдрийн байдлаар 508039 толгой мал хорогдсон, Сүхбаатар, Хэнтий, Дорноговь, Архангай, Дорнод зэрэг аймагт хорогдол ихтэй байна.

Мал аж ахуйн салбарын өвөлжилт, хаваржилтын нөхцөл байдал хүндэрч байгаатай холбогдуулан Засгийн газрын хуралдаанаас Улсын хэмжээнд гамшгаас хамгаалах өндөржүүлсэн бэлэн байдлын зэрэгт шилжүүлэх шийдвэрийг гаргасан. Мал аж ахуйн салбарт үүсээд буй хүндрэлийг эрсдэл багатай давахад шаардлагатай бүхий л арга хэмжээг авч ажиллана.

Шар усны үерт өртөж болзошгүй айл өрхийг нүүлгэн шилжүүлэх, цасанд боогдсон зам, давааг чөлөөлөх, малчдад туслах аяныг аж ахуйн нэгж болон олон улсын байгууллага, гадаадын төсөл хөтөлбөртэй хамтран зохион байгуулж, олон нийтэд уриалга гаргах, малчдыг эрт илрүүлэг, үзлэг оношилгоонд бүрэн хамруулах, амьжиргааны эх үүсвэрээ алдаж, малгүй болсон малчдын судалгааг гаргаж, малжуулах, нийгмийн хамгаалал болон халамжийн төсөл, хөтөлбөрүүдэд хамруулах, орон нутгийн төсвийн давсан орлогыг малчдад туслах арга хэмжээнд зарцуулах зэрэг ажлыг зохион байгуулах шаарддагатай байна" гэлээ.

Зудын нөхцөл байдалд онцгой арга хэмжээ авахаар  гаргасан энэ шийдвэр үр дүнгээ өгөх нь дамжиггүй ч  цаг хугацааны хувьд оройтсон гэх шүүмжлэлийг зарим эх сурвалж хэлж байгаа юм. Тодруулбал, бүр өмнө нь буюу хэд хэдэн удаа цас дараалан орж, хүйтний эрч чангарч хүчтэй шуурга маналзаж адуу мал хэдэн мянгаараа уруудаж осгож байсан тэр хүнд өдрүүдэд энэ онцгой арга хэмжээг хэрэгжүүлж эхэлсэн бол зудын гарз гарлагыг багасгах боломж байсан гэжээ.