Өнөөгийн эрх баригчдын улс төрийн өнгө будагт “СОНСГОЛ” хэмээх шинэ нэршил хандлага сүлэлдэн орж ирээд буй.
Хөгжлийн банзнаас эхэлсэн сонсгол Нүүрсний хулгайгаар үргэлжилсэн. Үүнээс үлдсэн мөр, үр дүн гэвэл одоогоор төрд бугшсан хулгай хуйвалдаан, эрх мэдэлтнүүдийн өөрсөддөө тогтоосон эрх дарх эх орны баялгийг хэрхэн хууль бусаар хувааж хүртэх хэрэгсэл болж байсныг Монголын нийгэм мэдэж авлаа. Ерөөсөө Монголын төр ямар нууцлаг хуйвалдааны үүр уурхай болж байсныг эндээс анзаарч болно. Энэ хэлэлцүүлгээр гэм буруу нь нэгэнт тогтоогдсон хүмүүст хуулийн хариуцлага хүлээлгэхийг нийгмээрээ хүлээж байгаа. Энэ нь эрх баригчдын шударга ёсны хүлээлт хэр байгаагийн бас нэг илэрхийлэл шалгуур болох ёстой.
Олон хүний амийг авч одсон галын аюулын дараа Нийслэлийн газрын наймааны асуудлаар хэлэлцүүлэг зохион байгуулахыг Ерөнхий сайд үүрэгдэж ажлын хэсэг байгуулсан. Энэ парламентын хаврын сүүлчийн чуулган үүнийг олон нийтэд хүргэх байх.
Гэвч Ерөнхий сайдын зүгээс дээрх гурван сонсголоор хяналт шалгалтыг хязгаарлахыг хүсэхгүй байна. Ерөнхийдөө хэлэлцүүлэг хийж олон түмний хараа хяналтад оруулах олон асуудал байгаа гэж тооцож байгаа бололтой.
Тухайлбал, өнгөрөгч Лхагва гарагийн Засгийн газрын хуралдаан дээр Ерөнхий сайд Л.Оюун-Эрдэнэ баялгийн лицензийн сонсгол, нийслэлийн газрын сонсгол, нийтийн тээврийн сонсголыг хийлгэхээр холбогдох албан тушаалтнуудыг шахаж эхэлсэн гэх мэдээлэл байна. Мөн тэрбээр “...Газартай холбоотой асуудлыг тэр чигт нь АТГ-т шилжүүл гэжээ.
Ерөнхий сайдын өгсөн үүрэг даалгавраас анхаарал татах өөр нэг чухал сэдэв байна. Тэр нь энэ цаг үед монголчуудыг хуйгаар нь бухимдуулж байгаа Гадаадын хөрөнгө оруулалтын тухай хуультай холбоотой. Тодруулбал, Ерөнхий сайд дээрх хуралдааны үеэр “Хөрөнгө оруулалтын эх хуульд оролцсон бүх хүн, тухайн үед тэр хуулийг дэмжсэн УИХ-ын гишүүд, сая Хөрөнгө оруулалтын хуулийг боловсруулсан нөхдүүд гээд бүгдийг нь АТГ-т шилжүүлээрэй” гэсэн тухай зарим эх сурвалжууд мэдээлж байгаа юм.
Энэ үеэр тэрбээр “...Иргэдийн мэдэх эрх хангагдах тусам мундаг зүйл яриад байгаа хүмүүсийн бодит үнэн илчлэгдэх болно. Баялгийн лиценз, нийслэлийн газрыг хэн хэн авсан талаарх мэдээлэл ил болсоор байна. Нөгөө л бүлэглэл өнөөдрийн тэгш бус байдлыг үүсгэснийг эндээс ойлгох болно. Ойлгох тусам олон нийтийн дэмжлэг нэмэгдэнэ. Энэ бүхнийг хамгаалж, цаг хожиж байгаа хязгаарлалтын эрх мэдлийн далангууд сэт цохигдоно. Усны түвшин өдрөөс өдөрт өндөрсөж, нэмэгдэж байгаа шүү. Иргэд, сонгогчид намайг зогсоох эсэхээ сонгуулиар өөрсдөө шийднэ биз ээ. Үүнээс өөрөөр хэн ч миний тэмцлийг зогсоож чадахгүй. Алхсаар л байх болно. Алхсаар л дуусах болно” гэжээ.
Ерөнхий сайдын өгсөн үүрэг даалгвараар бол газрын наймаанаас гадна баялгийн лиценз олголт, нийтийн тээврийн хөшигний цаадах нууцууд олон нийтэд ил тод болох магадлал өндөр байна. Энд дурдсан асуудал бүхэн шударга бус, Но-той ноцтой гэдгийг иргэд ярьж хэлэлцсээр өдий хүргэсэн. Гэвч иргэдийн маань энэ дуу хоолой одоо л “тэнгэрт” хүрэх нь үү гэсэн итгэлийн гэрэл үүнтэй зэрэгцэн сүүмэлзэж эхэлж байна.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.