Г.ЗАНДАНШАТАР "Гадаадын иргэнд газрыг 100 жилээр эзэмшүүлж, ашиглуулах" заалтыг хүчингүй болгох хуулийн төслийг хэлэлцэнэ

УИХ-ын дарга Г.Занданшатар Хөрөнгө оруулалтын тухай хуулиас 12.1.1 буюу Газар эзэмших, ашиглах заалтыг бүхэлд нь авч байгаа талаараа мэдээлэл хийлээ. 

Энэ үеэр УИХ-ын дарга Г.Занданшатар "Биднийг ажиллаж байх хугацаанд газрыг 100 жилээр эзэмшүүлэх хууль батлагдах ёсгүй гэж үзэж, бүр мөсөн хаалт хийх хуулийн төслийг батлуулна.

2013 оны Засгийн газрын үед батлуулсан Хөрөнгө оруулалтын тухай хуулийн энэ заалтыг хүчингүй болгох шаардлагатай. Энэ асуудлаар Ерөнхийлөгч, УИХ-ын дарга, Ерөнхий сайд нар нэгдмэл байр суурьтай байгаа" гэлээ.

2013 онд батлагдсан "Газрыг гадаадын иргэнд эзэмшүүлэх,  ашиглуулах тухай хууль"-ийг хүчингүй болгох санал, санаачилгыг иргэн Номун-Эрдэнэ d.parliament.mn хаягт байршуулсан. Уг санаачилгыг долоо хоногийн дотор 100 мянга гаруй иргэн дэмжиж гарын үсэг зурсан. 

УИХ-ын Дэгийн тухай хуульд заасны дагуу иргэдийн санал, санаачилгыг заавал авч хэлэлцэх, холбогдох байгууллагад уламжлах хуультай. Ингээд УИХ-аас иргэн Номун-Эрдэнийн санал, санаачилгыг дэмжээд, Хөрөнгө оруулалтын тухай хуульд орсон "Газрыг гадаадын иргэнд 100 жилээр ашиглуулж, эзэмшүүлэх" тухай заалтыг хүчингүй болгох хуулийн төслийг боловсруулаад УИХ-ын даргын дэргэдэх зөвлөлөөр хэлэлцүүлсэн. Байнгын хорооны бүх дарга нар дэмжсэн. Засгийн газраас санал авахаар хүргүүлсэн бөгөөд хаврын чуулганаар хэлэлцүүлэх бэлтгэл байдлыг хангаад байна. Үүнтэй холбоотойгоор Газрын тухай хууль болон Ашигт малтмалын тухай хуулийн хэрэгжилтийг зайлшгүй шалгах шаардлага байна гэж үзэж байна. Зарим иргэд 0.07 га газраа авч чадахгүй байхад гадаадын иргэд 100 жилээр газар эзэмших асуудлыг хөндөж байна. Өмнөговьд ийм асуудал гарсан. Газрыг танил тал, эрх мэдэлтэй нь аваад байгааг шалгах Хяналт, шалгалтын түр хороо, ажлын хэсгийг байгуулж байна.

Гадаадын иргэнд 100 жилээр газар эзэмшүүлэх заалтыг хүчингүй болгох хуулийн төслийг боловсруулж, Байнгын хороодын бүх дарга нар дэмжсэн. Хаврын чуулганаар хэлэлцүүлэх бэлтгэл ажлыг бүрэн хангаад байна" гэлээ.