Б.Очирваань Олд Траффордод зочилж, Уэйн Рүүнитэй уулзжээ

“Өнгөрсөн оны тавдугаар сард Очирваань анх удаагаа Олд Траффордод зочлох мөрөөдлөө биелүүлэхийн тулд Монголоос дугуйн аяллаа эхлүүлсэн юм.

Тэр бол Манчестер Юнайтедын шүтэн бишрэгч бөгөөд хамгийн хайртай тоглогч, урам зориг нь Уэйн Рүүни.

Манчестерт Очирваанийг ирэхэд хэзээ ч мартагдахааргүй гэнэтийн бэлэг угтсан” гэх мэдээлэл бүхий видео контент “Premier League” албан ёсны пэйж хуудсанд өчигдөр нийтлэгдэж, нэгэн Монгол залуугаараа бид бахархлаа.

Багаасаа хөл бөмбөгийн спортыг сонирхож хичээллэж, мөрөөдлийнхөө төлөө дугуйгаар Олд Траффорд цэнгэлдэх хүрээлэн Манчестер Юнайтэдийг зорьсон Б.Очирваань Уэйн Рүүнитэй гар барин уулзжээ. Энэ тухайгаа тэрээр өөрийн пэйж хуудсанд “ Туурга тусгаар эх орныхоо алтан соёмбот төрийн далбаагаа дэлхийд мандуулах амлалтандаа хүрсэн шүү. Монгол дээлээ өмсөөд, Монгол хэлээрээ яриад, Монголынхоо тугаа намируулав. Миний ард өдийг хүртэл бат зогссон бүх хүмүүстээ чин сэтгэлээсээ баярлалаа. Ээжээ та бол миний хүсэл мөрөөдлийг үргэлж бадрааж, хамгаалж, хайрлаж хүүдээ сайн хүн байж, хийж байгаа бүх зүйлдээ сэтгэлээ шингээхийг заасан болохоор хүү нь энэ бүхнийг хийж чадсан шүү !

Магадгүй өнөөдөр, маргаашдаа Монголдоо шуураал өнгөрөх байх. Гэхдээ би нэг зүйл та нараасаа хүсье !

Сошиал хаягуудыг маань сайн дагаарай. Миний ард хэр олон хүн зогсохоос шалтгаалж гоё боломжууд өшөө нээгдэх боломжтой байгаа юм” хэмээн бичжээ.