Ерөнхийлөгч, Ерөнхий сайдын тойрогт МАН залууст итгэл хүлээлгэх бол АН говийн бүст Засаг дарга голцуу горилогчтой байна

Намууд УИХ-ын 2024 оны сонгуульд сойх нэр дэвшигчдээ тодруулах ажиллагаа өнөөдрөөр дуусна. Өнгөрсөн долоо хоногийг хувьд жагсаалтад хэнийг оруулж, тойрогт хэнийг “зоох” вэ гэх намуудын дотоод тохиролцоо хийгдсэн өдрүүд өнгөрөв. Харин өнөөдөр энэ бүхнийг эцэслэж, хууль ёсоор 00:00 цаг гэхэд  жагсаалт болон тойрогт нэр дэвшигчид тодорч, 23-ны дотор Хөрөнгө орлогын мэдүүлгээ АТГ-т өгнө. Сонгуулийн ерөнхий хороо зургадугаар сарын 1-ний дотор нэр дэвшигчийг бүртгэх эсэхийг шийдвэрлэх юм. Одоогийн байдлаар тойрогт нэр дэвшигчийн нэрс МАН, АН-ын хувьд үндсэндээ гараад буй бололтой. Орон нутагт буюу Сонгуулийн 1-7 дугаар тойрогт одоогоор нэр нь тодроод тойрог “услах” ажиллагаагаа эхлүүлсэн горилогчдын талаар мэдээллийг хүргэе.

1-р тойрог: Архангай, Өвөрхангай, Баянхонгор

МАН-аас Эрүүл мэндийн сайд С.Чинзориг, УИХ-ын гишүүн Г.Ганболд, Хотын дарга асан Д.Сумъяабазар, УИХ-ын гишүүн Г.Тэмүүлэн, Батлан хамгаалахын сайд Г.Сайханбаяр, УИХ-ын дарга Г.Занданшатар, ГХ-ны сайд Б.Батцэцэг, Ерөнхийлөгчийн зөвлөх Б.Даваадалай нар тунасан аж.

Харин АН-ын хувьд хуульч О.Алтангэрэл, АЗХ-ны ерөнхийлөгч Б.Ган-Очир, УИХ-ын гишүүн Д.Ганбат, А.Адъяасүрэн,  С.Ганбаатар  болон П.Нүрзэд нарын нэр тодорхой болж.

2-р тойрог: Завхан, Увс, Ховд, Говь-Алтай

МАН-аас УИХ-ын гишүүн Ц.Цэрэнпунцаг, Б.Баярсайхан, Завхан аймгийн Засаг дарга Г.Өнөрбаяр, УИХ, Засгийн газрын гишүүн Ч.Хүрэлбаатар, Б.Чойжилсүрэн, БОАЖ-ын сайд асан Н.Цэрэнбат, УИХ-ын гишүүн С.Бямбацогт, ХХААХҮ-ийн сайд асан З.Мэндсайхан, Ховд аймгийн Засаг дарга Э.Болормаа нарын нэр тод байна.

АН-ын хувьд УИХ-ын гишүүн З.Нарантуяа, Завхан аймгийн Засаг дарга асан Д.Батсайхан, УИХ-ын гишүүн асан Я.Санжмятав, УИХ-ын гишүүн О.Цогтгэрэл, Ардчилсан эмэгтэйчүүдийн холбооны дэд дарга асан Ц.Одонтунгалаг, УИХ-ын гишүүн Ш.Адьшаа, Б. Пүрэвдорж, УИХ-ын гишүүн асан Д.Батцогт, Говь-Алтай аймгийн Засаг дарга О.Амгаланбаатар нар яригдсаар байна.

3-р тойрог: Баян-Өлгий

Тус тойргийн хувьд гурван мандаттай учраас МАН, АН-ын хувьд нэр дэвшигчид нь аль хэдийнэ тодорхой болсон аж.

МАН-аас УИХ-ын гишүүн Т.Аубакир, ХНХ-ын дэд сайд С.Зулпхар, АН-аас УИХ-ын гишүүн Б.Бейсен, АН-ын дэд дарга Ш.Жандос нар тодорхой бол УИХ-ын гишүүн асан Д.Мурат горилогчдын дунд нэр нь яваа гэнэ.

4-р тойрог: Булган, Хөвсгөл, Орхон

Тус тойрогт намын дотоод өрсөлдөөн ч багагүй байгаа аж. Одоогоор МАН-аас УИХ, Засгийн газрын гишүүн Л.Энх-Амгалан, Ц.Даваасүрэн, УИХ-ын гишүүн Л.Мөнхбаатар, Ж.Бат-Эрдэнэ, Д.Батлут нараас гадна БОАЖ-ын сайд Б.Бат-Эрдэнэ, Батлан хамгаалахын дэд сайд Б.Баярмагнай нар нэв дэвших нь бололтой.

АН-ын хувьд УИХ-ын гишүүн Н.Алтанхуяг, ХАҮТ-ын дарга асан О.Амартүвшин бий.

5-р тойрог: Төв, Сэлэнгэ, Дархан-Уул

МАН-аас УИХ-ын гишүүн Г.Дамдинням, Ч.Ундрам, Ж.Батжаргал, Сангийн сайд Б.Жавхлан, Боомтын сайд Б.Тулга болон ҮАБЗ-ийн нарийн бичгийн дарга асан Ерөнхийлөгчийн зөвлөх Ж.Энхбаяр, УИХ-ын гишүүн Ж.Эрдэнэбат нарын нэр шигшигдсэн бол АН-аас УИХ-ын гишүүн Ц.Туваан, Эрчим хүчний дэд сайд асан Д.Доржпүрэв, АЗХ-ны ерөнхийлөгч асан С.Эрдэнэболд, Ардчилсан эмэгтэйчүүдийн холбооны дэд дарга асан Д.Үүрийнтуяа, АН-ын Тамгын газрын дарга асан Д.Эрдэнэсувд гэх танил нэрс жагсчээ.

6-р тойрог: Хэнтий, Сүхбаатар, Дорнод

МАН тус тойрогт УИХ-ын гишүүн Ц.Идэрбат толгойтой  ХЗДХ-ийн дэд сайд Б.Солонгоо, ХХААХҮ-ийн дэд сайд М.Ганхүлэг, Ерөнхийлөгч У.Хүрэлсүхийн дүү У.Отгонбаяр, Хөрөнгийн биржийн дарга асан Х.Алтай, Монголбанкны дэд ерөнхийлөгч асан Г.Дөлгөөн гэх залуусыг илгээхээр шийдсэн бол АН-ын хувьд УИХ-ын гишүүн Ж.Батсуурь, Н.Ганибал нараар ахлуулан хуульч Т.Пүрэвхатан нарын залууст итгэл хүлээлгэх аж.

7-р тойрог: Дорноговь, Говьсүмбэр, Өмнөговь, Дундговь

МАН-аас УИХ, Засгийн газрын гишүүн Б.Дэлгэрсайхан, УИХ-ын гишүүн Т.Энхтүвшин,Б.Саранчимэг, УУХҮ-ын дэд сайд Б.Уянга мөн Ерөнхийлөгчийн зөвлөх Ө.Золбаяр нарын нэр яригдсан бол  АН-аас УИХ-ын гишүүн асан О.Баасанхүү, Р.Эрдэнэбүрэн, Говьсүмбэр аймгийн Засаг дарга асан Л.Одсэр, Өмнөговь аймгийн Засаг дарга Р.Сэддорж нар тэргүүлэн Б.Энхмөнх, Л.Мөнхбаясгалан нарын сэтгүүлчдийн нэр тодорхой болсон байна.