Өчигдөр шөнийн 00 цагаас өмнө амжиж улс төрийн намууд УИХ-ын сонгуульд оролцох нэр дэвшигчдээ тодруулав. Ардчилсан намын хувьд маргаан, толхилцооноо нуудаггүй заншлаараа зарим залуучууд нь дотроосоо шууд дамжуулж, ҮБХ-ны хурлын уур амьсгал олон нийтэд ил мэдрэгджээ. Хэдий намын дарга, ҮБХ-ны дарга, УИХ дахь намын бүлгийн дарга нар нь хамгаалалт гаргаж тайзны урдуур хэрж байгаад тогтоолоо уншиж 48;78 аа баталсан ч жагсаалт хийгээд тойрогт нэр дэвшихээр уншигдсан нэрс дотроос санал нийлэхгүй хүмүүс олон гарч байгаа ажиглагдлаа. Тухайлбал жагсаалтын эхний 10-т багтсан хүмүүст С.Баярцогтыг багтсанд ҮБХ-ны гишүүд эсэргүүцэн оронд нь Хууль зүйн сайд Х. Тэмүүжин нэрээ оруулжээ.
8 жил хэт цөөнхөөр үлдсэн ардчилсан намын хувьд иймэрхүү өнгө аястай хурал болж өнгөрсөн бол эрх баригч МАН-ын хурал дотроо нэг ч хэвлэл мэдээлэл, олон нийтэд дэлгэх явцгүйгээр хуралдсан бөгөөд жагсаалтад багтаасан хүмүүст олон нийт эерэг хандлагатай байна. Харин нэр дэвшүүлэх, тойрог хуваарилалтад “Хууль хяналтын байгууллагаар шалгагдаж, авлига албан тушаалын хэрэгт нэр холбоостой хүмүүсийг нэр дэвшүүлэхгүй” гэх намын удирдлагуудын зүгээс тавьж байсан шаардлага биелсэнгүй.
Учир нь эл шаардлагаар хандвал эрх баригчид дотроос нүүрс, ЖДҮ, Хөгжлийн банк, сангуудын зээлд нэр холбогдсон олон хүн нэр дэвших эрхгүй үлдэх нь ээ. Мөн Х. Болорчулуун гишүүн хурал дотроос гарч ирээд “Хөрөнгө оруулалтын тухай хуулийг эсэргүүцсэн учир Ч. Хүрэлбаатар намайг нэр дэвшүүлэхгүй гэж загнаж байснаараа тойрог өгсөнгүй” хэмээн мэдэгдсэн.
Өчигдөрхөн Увс аймгийн оюутнуудад хууль зөрчиж мөнгө тараасан тухай нь аймгийн удирдлагуудаас хэвлэлийн хурал зарлаж мэдэгдээд байсан хэдий ч Ч. Хүрэлбаатар гишүүн өөрөө тойрог аваад зогсохгүй хүн хасах хэмжээнд нөлөөлж байгаагаас үзвэл эрх баригч намд түүний мөнгө, улс төрийн нөлөөлөл өндөр бололтой.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.