Сонгуулийн Ерөнхий хороонд намууд нэр дэвшигчдээ бүртгүүлэхээр баримт бичгийг нь хуулийн дагуу энэ сарын 25-нд /2024.05.25/ хүлээлгэж өгсөн. СЕХ-ны мэдээлснээр 19 нам, 2 эвслээс УИХ-ын 2024 оны ээлжит сонгуулийн тойрогт нэр дэвшүүлэх 985, жагсаалтаар нэр дэвшүүлэх 385, нийт 1370 нэр дэвшигчийн баримт бичгийг хүргүүлсэн байна. Гэвч АН-аас нэр дэвшигчдийн хоёр ч лист ирүүлсэн гэх мэдээлэл гараад буй. Энэ талаар АН-аас өнөөдөр мэдээлэл өглөө.
АН-ын дарга Л.Гантөмөр: АН нь “Бүтэн Монгол-Бүрэн Ардчилал” үндэсний хөтөлбөрөө гаргахын тулд Монгол орноо 2-3 удаа бүтэн тойрсон. Тойрох хугацаандаа Монголын болохгүй бүтэхгүй байгаа асуудал нь юунд байна вэ гэдгийг маш тодорхой гаргасан. Энэ асуудлыг шийдэх парламентыг сонгох гэж байна. Монголын хамгийн том асуудал бол авлига. Авлигыг шийдэж чадах тэр бүрэлдэхүүнийг сонгоно. Хоёрт, ажилгүйдэл, үнийн өсөлтийн дарамтыг арилгах тэр баг бүрэлдэхүүнийг УИХ-ын сонгуульд илгээх нь нийт ард түмний хүсэл юм. Дээр нь монголчуудын хамгийн том зовлон бол өр. Өрийн дарамтад, өрийн эргүүлэгт бүхэлдээ бид орсон байна. Энэ өрийн эргүүлгээс монголчуудыг чөлөөлөх нь манай 126 нэр дэвшигчийн гол хийх ажил. Тийм учраас 126 хүнийг тодруулах процесст хамгийн чухлаар тавигдсан зүйл бол энэ. Эхлээд бид намын гишүүдээсээ, дараа нь намын хороодоос асуугаад сонгон шалгаруулах хороогоор нэр дэвшигчдээ тодруулсан. 78 тойрогт нэр дэвшигч нарыг гаргаж ирэхдээ 4 удаа судалгаа хийсэн. Тойрогт танигдсан байдал, тодорхой асуудлыг шийдэх шийдэл, ард түмний хүлээж байгаа байдал зэргээр нь асуудлыг шийдэж чадах хүнийг явуулж байна. Дээр нь ард түмний хүлээлт. Хулгай, дээрэм, тонуул, авлига, шударга бус байдал гэх мэт 10 гаруй асуудлыг өнгөрсөн 8 жилд шийдэж чадсангүй. Үүнийг шийдэх хүмүүсийг бидэн рүү явуулаарай гэдгийг бүх түвшинд хэлж байна. Тийм учраас ялагдаагүй Ерөнхийлөгч гэж бидний үзэж байгаа Монгол Улсын Ерөнхийлөгч асан Х.Баттулгыг дэвшүүлж байна. Монголд үйлдвэрлэл бий болохгүй бол болохгүй шүү гэдэг утгаар нь үйлдвэрлэгчид, инженерүүдийг дэвшүүлж байна. Үнэхээр хэлмэгдсэн Ерөнхий сайд гэж хэлдэг Н.Алтанхуягийг тойрогт явуулж байна. Иргэд нэр цэвэр улс төрч явуулаач гэж хүсч, хүлээж байгаа учраас бид хуучин улс төрчид, засаг төрд ажиллаж байсан хүмүүсээ ихэнхийг нь хойш нь суулгасан. Та хэд маань энэ удаагийн сонгуульд АН-аа, ардчиллаа дэмжээч гэсэн хүсэлт тавьж байна. Одхүү, Ганхуяг, Батбаяр, Ламбаа гишүүн та бүхэн монголын төрд ажиллаж байсан нэр цэвэр хүмүүсээ мэдэж байгаа. Гэхдээшинэ залуу нэр дэвшигчийг хүлээж байгаа хүлээлтэд хариулахгүй бол болохгүй ээ гэдэг утгаар энэ нэр дэвшилт явагдсан.Манай 126 нэр дэвшигчээс 102 нь цоо шинэ хүн бий. Ард түмэн сонгогчдын итгэлийг тээж, дэмжлэг авч чадах шонхоруудыг талбайд нь илгээсэн шүү. Намын жагсаалтын 48 нэр дэвшигчид салбар салбарын төлөөлөл орсон. 4-5 нь туршлагатай улс төрч бий. Бид тавдугаар сарын 20-нд намын даргын гарын үсэгтэй тогтоолыг баталсан. АН-ын шийдвэр бол нэг л байгаа. Намын шийдвэр, намын даргын явуулсан нэрс нэг байгаа” хэмээн ярилаа.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.