АНХААР: “Слава” брэндийн өттэй будаа зарагдаж байна

Төрийн соёрхолт дуучин Д.Болдоор нүүр царайгаа хийж “Генийн өөрчлөлтгүй” брэнд хэмээх сурталчилгаагаар Монголчуудад танигдсан “Слава” брэндийн шар будаанаас өт гарч иржээ. Өт дотор нь үржсэн 650 граммын савлагаатай шар будаа нь 2022 оны 07-р сард савлагдаж худалдаанд гарсан баталгаат хугацаа нь 2023 оны 3-р сард дуусна гэж савлагаа нь дээр нь бичжээ. Чанарын шаардлагагүй хангахгүй өттэй будааг ОХУ-аас “Грийн групп” импортоор оруулж ирсэн бөгөөд борлуулж буй шар будаа нь өтсөн байгааг худалдан авсан иргэн тухайн компанид мэдэгдэж, гомдол гаргасан ч үл тоосон байдалтай хандсан байна.

Хүнсний аюулгүй байдлыг ноцтой зөрчиж шавжтай будааг хүнсний хэрэгцээнд нийлүүлсэн уг группийн хувьцааг О.Наранхүү, М.Сүхбаатар гэдэг хоёр хүн эзэмшдэг байна. О.Наранхүү нь УИХ-ын гишүүн Одонгийн Цогтгэрэлийн дүү аж.

-Монголчуудын хүнсэнд өттэй будаа нийлүүлсэн “Грийн групп”-ийг шалгая-

Худалдан авсан будаа нь дотор өт байхыг олж харсан иргэн уутыг нь задлалгүй “Грийн групп”-д гомдол гаргаж зах зээлээс бүтээгдэхүүнээ татан авч “Слава” брэндийг сонгон хэрэглэдэг хэрэглэгчдэд анхааруулахыг хүссэн ч тоймтой хариу өгөөгүй гэнэ. “Хэрэглэгчийн сэтгэл ханамжийг хангасан бүтээгдэхүүн зах зээлд нийлүүлнэ. Энэ бол бидний нийгмийн хариуцлага” гэх утгатай үсгийг компанийнхаа сайтад нийтэлсэн “Грийн групп” өттэй будаагаа хэрэглэгчийн сэтгэл ханамжид нийцсэн бүтээгдэхүүн гэж тодорхойлсон бололтой.

Хүнс эрүүл бол хүн эрүүл гэдэг. Өттэй будаа хүнсний хэрэгцээнд нийлүүлсэн “Грийн групп”-ийг мэргэжлийн байгууллагууд шалгаж, зохих хариуцлагын хүлээлгэхгүй бол жирийн иргэний гомдлыг үл тоон дээрэнгүй ханддаг байгууллага болох нь энэ үйл явдлаас харагдаж байна. “Слава” брэндийн будаанаас өт илэрсэн анхны тохиолдол энэ биш. Өмнө нь энэ брэндийн будаанаас өт гарч ирлээ гэсэн иргэдийн гомдол мэдээлэл цахим орчинд цөөнгүй гарч, хэвлэл мэдээллийн хэрэгслээр цацагдаж байсан. Харамсалтай нь өнөөдрийг хүртэл бүтээгдэхүүний чанартаа анхааралгүй өттэй будааг Монголчуудад зориулан савласаар байна.