Барууныхан Орос-Украины хэлэлцээг хүлээж байна

Францын Ерөнхийлөгч Эммануэль Макроны АНУ-д хийсэн айлчлал нь  Украины мөргөлдөөний асуудлаар  барууны орнуудад хоёр хандлага байгааг харуулсан. Энэ хоёр хандлагын тухайд гэвэл Барууныхан Москва, Киевийн хооронд хэлэлцээр хийнэ гэж найдаж байгаа ч тэд хэлэлцээрийг эхлүүлэх гэж яарахгүй байна. Энэ тухай "Коммерсант" мэдээлэв.

Нийтлэлд бичсэнээр, Украины талын бүх холбоотон ямар нэг байдлаар Киевийг "....хүртэл хугацаанд" дэмжихэд бэлэн байгаагаа илэрхийлжээ. Нөгөөтэйгүүр, зарим улс, тэр дундаа Франц  улс  Орос, Украины хооронд ямар ч үед хэлэлцээ хийхэд бэлэн байх ёстой, хэдий чинээ эрт эхлэх тусам сайн гэж үзэж байна.

ОХУ-ын Ерөнхийлөгч Владимир Путинтэй харилцаа холбоо тогтоох ёстой, харин үүний тулд тодорхой нөхцөл бүрдүүлэх хэрэгтэй гэж Жо Байден үзэж байна. 

Макрон: Цэрэг дайны замаар мөргөлдөөнийг шийдвэрлэх сонголт надад харагдахгүй байна
Макрон Украины мөргөлдөөнийг шийдвэрлэх цорын ганц арга зам нь хэлэлцээр байх болно. Харин Украйнчууд энэ шийдвэрээ өөрсдөө  гаргах ёстой гэж тэр тэмдэглэв.

Гэхдээ тэрбээр Москватай хэлэлцээ хийх асуудлаар Киевт шахалт үзүүлэхгүй гэж амласан. Ирэх долоо хоног, саруудад Украины нөхцөл байдлын өрнөл, мөн украинчуудын сонголт нь Оростой хэлэлцээ хийх мөчийг тодорхойлно гэж тэр хэллээ.

Тэр мөн Путинтэй шууд харилцаатай, үүнийгээ хадгалж үлдэх шаардлагатай гэж үзэж байгаагаа онцолсон юм.

"Би ерөнхийлөгч Путинтэй байнга ярилцаж, шууд харилцдаг. Учир нь харилцаагаа сэргээх хамгийн сайн арга бол энэхүү шууд сувгийг хадгалах явдал гэж би үзэж байна"  гэжээ.

Арванхоёрдугаар сарын 3-нд тэр ойрын хугацаанд Путинтэй ярилцахаар төлөвлөж байгаагаа мэдэгдсэн. Тодруулбал, тэрээр ОХУ-ын Ерөнхийлөгчтэй Запорожье атомын цахилгаан станцын эргэн тойрон дахь нөхцөл байдлын талаар ярилцах бодолтой байгаа гэв.

Оросын байр суурь
Аравдугаар сарын сүүлчээр ОХУ-ын Гадаад хэргийн сайд Сергей Лавров Украины асуудлаар хэлэлцээ хийхэд Москва бэлэн байна гэж мэдэгджээ.

"Бид хурцадмал байдлыг бууруулах талаар барууны түншүүдийн тавьж байгаа саналыг сонсоход үргэлж бэлэн байна. Тиймээс бодитой саналтай хандвал бид авч хэлэлцэхэд бэлэн байна" гэдгээ  ОХУ-ын Гадаад хэргийн тэргүүн  дурдаад бу. 

Үүнээс гадна ОХУ-ын Ерөнхийлөгч В.Путин Украинтай хэлэлцээр хийхэд бэлэн байгаагаа мэдэгдсан нь анхаарал татах зүйл.  

Тэрээр хэлэлцээг үргэлжлүүлэхийн тулд Киевийн "сайн санааны хүсэл" төлөвших хүртэл хүлээх болж байна гэдгийг онцолсон. 
Украин одоохондоо Оростой ярих хүсэлгүй байгааг Оросын удирдагч тэмдэглэсэн байна. Үүний зэрэгцээ энэ асуудлаарх Оросын талын байр суурь тодорхой байгаа гэдгийг ч мөн сануулахаа мартаагүй. "Нөгөө тал нь бидэнтэй ярихыг ч хүсэхгүй байгаа бол одоо бид боломжит хэлэлцээрүүдийг яаж хийх билээ. Ямартай ч  бид хүлээж байя" хэмээн Ерөнхийлөгч Путин хэлсэн юм.

Эх сурвалж: Лента.ру