ХБ сонсгол: Бэрэн группийн Б.Мөнхтөрийн хувийн дансанд 1,5 сая доллар орж, Макао, Сингапурын казиногийн АТМ-ээс их хэмжээний бэлэн мөнгө гарчээ

Хөгжлийн банкны хулгай, тус банкнаас зээл авч зориулалтын дагуу ашигласан эсэх талаар нээлттэй сонсгол төрийн ордонд болж байна. Тус нээлттэй сонсголд Хөгжлийн банкны удирдлага, удирдлагаар ажиллаж байсан хүмүүс, тус банкнаас зээл авсан аж ахуй нэгжүүдийн төлөөллүүд, УИХ-ын гишүүд, АТГ зэрэг холбогдох албаны хүмүүс оролцож байна.

УИХ-ын гишүүн Б.Энхбаяр: Бэрэн групп ХХК-ийн хувьцаа эзэмшигч Б.Мөнхтөрийн дансанд шилжүүлж хувийн хэрэгцээнд ашигласан 1,5 сая доллар, нийт 7,2 сая долларыг зориулалтын бусаар ашигласан гэсэн шинжээчийн дүгнэлт гарсан байна. Тухайлбал зузаатгал нэрээр 50 мянган ам доллар удаа дараа оржээ. Та үүнийг тайлбарлана уу? Өөрөөр хэлбэл Бэрэнгээс Бэрэн трэйд рүү Бэрэн трэйдээс Мөнхтөр таны хувийн данс руу шилжжээ.

Бэрэн группийн хувьцаа эзэмшигч Б.Мөнхтөр: Гангийн үйлдвэр бариад явж байхад гүйцэтгэгч компаниудтайгаа маш олон удаагийн уулзалт хийдэг. Зураг төсөл хийдэг. Томилолтоор явдаг. Энэ мөнгө миний картны зузаатгалд орж байгаа боловч төсөлдөө зарцуулагдаж байгаа гэж ойлгож болно. Гангийн үйлдвэр өөрөө их үнэтэй байдаг. Монголд барьж байгаа үйлдвэрийг аль болох хямдруулахыг оролдож байгаа. Тиймээс зарим эд ангийг захиалга хийж авахдаа бэлнээр тооцоо хийх, ТЭЗҮ-г хямдруулахын тулд гэрээ хийдэг. Тиймээс зарим төлбөрийг хямдруулахын тулд бэлнээр төлөх асуудал байдаг. Нарийн юм ярьж болохгүй байна. Тэгэхээр зузаатгал ч юм уу бүх мөнгө төсөлдөө орсон.

УИХ-ын гишүүн Б.Энхбаяр: Та мөрийтэй тоглоом тоглодог уу?

Бэрэн группийн хувьцаа эзэмшигч Б.Мөнхтөр: Би мөрийтэй тоглодоггүй

УИХ-ын гишүүн Б.Энхбаяр: Макао чөлөөт бүсэд казиногийн АТМ машинаас маш их хэмжээний бэлэн мөнгөний гүйлгээ гараад байгаа. 2018 оны 1 сарын 31-нээс эхлээд казиногийн атм-ээс бэлэн мөнгө гарсан байна. Сингапурт мөн гарчээ. Тийм учраас энэ асуултыг асууж байна. 

Бэрэн группийн хувьцаа эзэмшигч Б.Мөнхтөр: Шинжээчийн дүгнэлттэй санал нийлэхгүй байна. Би шүүх дээр баримтаар нотлох болно

УИХ-ын гишүүн Б.Энхбаяр: Бэлнээр авсан гүйлгээг та авсан юм уу. Үгүй юу. Таны данснаас гараад байгаа мөнгө шүү дээ.

Бэрэн группийн хувьцаа эзэмшигч Б.Мөнхтөр: Энэ асуудлыг АТГ-аас шалгаж байгаа. Тэгээд шүүх рүү шилжиж байгаа. Тиймээс нууцын баталгаа гаргасан учраас хариулах боломжгүй байна.

УИХ-ын гишүүн Б.Энхбаяр: Танд энэ зээлийг авахад нөлөөлсөн, улстөрийн өндөр албан тушаал хашиж байсан хүмүүстэй уулзаж ярилцсан хүн байна уу.

Бэрэн группийн хувьцаа эзэмшигч Б.Мөнхтөр: Манай энэ төслийг хаана ч яваад танилцуулахад бүх хүн дэмждэг. Надад бол улстөрийн том дэмжлэг байхгүй. Би энэ төсөл, үйлдвэрээ харуулаад л Монгол Улсад ашигтай гэдгээр надад зээл олгогдож явдаг. Улстөрийн нөлөөлөл манай Бэрэн групп-т байхгүй

УИХ-ын гишүүн Б.Энхбаяр: Та тухайн үед ҮХАА-н сайдаар ажиллаж байсан Бадамжунай гэж хүнийг таних уу.

Бэрэн группийн хувьцаа эзэмшигч Б.Мөнхтөр: Танина

УИХ-ын гишүүн Б.Энхбаяр: Яаж таних уу

Бэрэн группийн хувьцаа эзэмшигч Б.Мөнхтөр: Манай Архангай аймгаас сонгогдож байсан. Улстөрд орсон хүн. Тийм учраас манай Архангай аймгийнхан бүгд танина. Манай нутгийн улстөрч.

УИХ-ын гишүүн Б.Энхбаяр: Та Макао болон Сингапурт энэ хүнтэй уулзаж байсан уу

Бэрэн группийн хувьцаа эзэмшигч Б.Мөнхтөр: Сингапурт бол тааралдаж байсан.

Бэрэн групп ХХК-ийн тухайд Хөгжлийн банкнаас 2014 онд 22,7 сая доллар, 2018 онд 4,5 сая доллар, 2017 онд 11,7 сая долларыг тус тус зээл авсан ч чанаргүй зээлийн ангилалд ороод байгаа. Харин Б.Мөнхтөр нь Хөгжлийн банкнаас зээл аваад буцаан төлж чадаагүй Бэрэн группийн 31,76 хувийн хувьцаа эзэмшигч юм.