Гадаад харилцааны сайд Б.Батцэцэг, яамныхаа газрын дарга нарын хамт сэтгүүлчдэд өнөөдөр мэдээлэл өглөө.
Тэрбээр “Дэлхийн 87 улс оронд Монгол улсын 167 мянган иргэн ажиллаж амьдарч байна. Цар тахлаас өмнө энэ тоо 200 гаруй мянган байсан. 125 мянган хүн хууль ёсоор амьдарч байгаа бол эдний 20 мянга нь хүүхэд байна.
Хилийн чанадад байгаа Монгол Улсын иргэдэд туслах сангийн зарцуулалтыг Гадаад харилцааны яам хариуцдаг. Жилд 200 гаруй сая төгрөгийн төсөвтэй. Гадаад улс орнуудад маш хүнд нөхцөл байдалд орсон, эх орондоо эргэж ирж чадахгүй байгаа иргэдэд зарцуулдаг. Өнгөрсөн оны зарцуулалтыг харвал дийлэнх нь гадаад оронд нас барсан иргэдийг шарилыг зөөж авчрахад зарцуулагдсан байдаг. 2022 онд 55 иргэнд 206 сая төгрөг зарцуулсан. 2020, 2021 онд энэ сангийн мөнгө хаанаа ч хүрэлцэхгүй байсан учраас гадны хүмүүнлэгийн байгууллагаас 3 тэрбум орчим төгрөгийн дэмжлэг авсан байдаг.
Манай улсын иргэд гадны улс орнуудад гэмт хэрэгт их холбогддог, амь насаа алддаг, янз бүрийн хүнд байдалд ордог. Долоо хоногт 2-5 иргэн нас бардаг гэсэн статистик байдаг. Тиймээс эдгээр иргэдээ эх оронд нь авчрах вэ, хэрхэн эдлэх ялыг нь хөнгөвчлөх вэ гэдэг талаас нь консулын газрууд байнга ажилладаг. 2022 онд хилийн чанадад ял эдэлж байгаа 132 иргэнийг эргэж дэмжлэг туслалцаа үзүүлэхэд 42,8 сая төгрөг зарцуулсан. Энэ бол мэдээж маш хангалтгүй дүн” гэлээ.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.