Голомт банк Хөгжлийн банкнаас 269,3 тэрбум төгрөгийн санхүүжилт 5 хувийн хүүтэй авч, 8 хувийн хүүтэй аж ахуйн нэгжүүдэд олгожээ

Хөгжлийн банкнаас санхүүжүүлсэн төсөл, хөтөлбөрийн хэрэгжилт, үр дүн, зээл олголт, эргэн төлөлтийн явц, байдлыг хянан шалгах түр хорооноос Нотлох баримтыг шинжлэн судлах сонсголын гурав дахь шат Төрийн ордноо  өнөөдөр /2023.03.17/ тав дахь өдрөө үргэлжилж байна.

 Хөгжлийн банкны санхүүжилтээр 2013 онд  “Хөдөө аж ахуй, хөнгөн үйлдвэрийн салбарын ноос, ноолуур, сүү, хүлэмж болон оёдлын салбарын төсөл”-ийн зээлийг дамжуулан зээлдүүлэгчээр “Голомт” банк ажиллаж, Хөгжлийн банкнаас 5 хувийн хүүтэйгээр нийт 269.3 тэрбум төгрөгийн шилжүүлэн авсан байна.

Ингээд нийт 168 зээлдэгчид 214.36 тэрбум төгрөгийн зээлийг 8 хувийн хүүтэй дамжуулан олгосон бөгөөд 2023 оны 1 дүгээр сарын 31-ний өдрийн байдлаар 21 дэд зээлдэгчийн 3.5 тэрбум төгрөг төлөгдөж дуусаагүй байгаа аж.

Голомт банкнаас зээлдэгчид олгоогүй санхүүжилтээс 2014 онд  54.67 тэрбум төгрөгийг Хөгжлийн банк буцаан татсан.

Гэвч Голомт банкийг яагаад дамжуулан зээлдэгчээр сонгосон тухай ямар ч баримт Хөдөө аж ахуйн яам болон Хөгжлийн банкин дээр алга.

ҮАБЗ болон Засгийн газрын тогтоолд салбарын тоног төхөөрөмжийг шинэчлэх санхүүжилтийн эх үүсвэрийн 1/3-тай тэнцэх урьдчилгаа төлбөрт зориулж олгох болон шаардагдах зардлыг санхүүгийн байгууллагатай байгуулах ажлыг ЭЗХЯ болон ҮХААЯ зохион байгуулахаар заасан байгаа юм. ҮХААЯ-ны Төрийн нарийн бичгийн тушаалаар тавн нэгжийн захирлуудыг томилж, доорх зээлийг олгожээ.

Сүү, сүүн бүтээгдэхүүн үйлдвэрлэлийн төсөлд зориулж 44 зээлдэгчид, 52,7 тэрбум төгрөгийн санхүүжилт олгосноос 11 зээлдэгчийн 2.4 тэрбум төгрөгийн зээл төлөгдөөгүй байна. 2013 онд Голомт банк нь төсөл санхүүжүүлэх гэрээний шаардлагыг хангаагүй буюу Х тайлантай 4 зээлдэгчид санхүүжилт олгожээ.Зээлийг зориулалтын дагуу зарцуулсан эсэхэд хяналт тавихад 5 зээлдэгч сураггүй алга болсон байна.

Ноос ноосон бүтээгдэхүүн үйлдвэрлэлийн төсөлд зориулж 17 зээлдэгчид, 46 тэрбум төгрөгийн санхүүжилт олгосноос 2 зээлдэгчийн 318,5 сая төгрөгийн зээл төлөгдөөгүй байна.Зээлдэгч тус бүрээр хяналт тавихад 3 зээлдэгч сураггүй алга болсон төлөвтэй бүртгэлтэй байгаа аж.

Ноолууран бүтээгдэхүүн үйлдвэрлэлийн төсөлд зориулж 54 төслийн зээлд 100.4 тэрбум төгрөгийн санхүүжилт олгосноос 3 зээлдэгчийн 656 сая төгрөгийн зээл төлөгдөөгүй байна. Голомт банкнаас Х тайлантай “Анар ганган” ХХК-д төслийн зээл олгосон байна. Хоёр зээлдэгч сураггүй алга болсон, нэг зээлдэгч дампуурсан хэмээн бүртгүүлжээ.

Хүлэмжийн аж ахуйн байгуулах төсөлд 32 зээлдэгчид 25,9 тэрбум төгрөгийн санхүүжилт олгосноос 2 зээлдэгчийн 49,6 сая төгрөг төлөгдөөгүй байна. Төслийн шаардлага хангаагүй “Ногоон сар” ХХК-д зээл олгосон бөгөөд нэг зээлдэгч сураггүй болжээ.

Оёдол, оёмол бүтээгдэхүүн үйлдвэрлэлд зориулж, 17 зээлдэгчийн 3,6 тэрбум төгрөгийн санхүүжилт олгогдсоноос 2 зээлдэгчийн 47,5 сая төгрөгийн зээл төлөгдөөгүй байна. Голомт банк нь төслийн шаардлага хангаагүй буюу шинээр байгуулагдсан 3 зээлдэгчид 660.0 сая төгрөгийн санхүүжилт олгосон байгаа юм.

Тус төслөөс 3 зээлдэгч сураггүй алга болсон гэх төлөвт бүртгэгдсэн байна.

Дээрх таван төслийн нэгжийн ажлын гүйцэтгэлийн баримт материалтай танилцахыг хүссэн ажлын хэсгийнхэн нэгжүүд татан буугдсан яамд хооронд салж, нийлэх явцад баримт материал хаана архивлагдсан мэдээлэлгүй гэсэн шалтгаанаар хянах боломжгүй болжээ.

Шинжээчийн зүгээс авсан зээлийнхээ дүнгээр өсөлт гарсан компани цөөхөн, “Голомт банк” төсөл санхүүжүүлэх гэрээг зөрчсөн, зээлийн хэрэгжилтэд хяналт тавьж ажиллахыг ҮХААЯ-нд даалгасан чхэрэгжилт нотлогдоогүй зэрэг зөрчилтэй байсныг онцлов.