Монгол Улсын Ерөнхий сайд Л.Оюун-Эрдэнэ тусгай сангуудын үйл ажиллагаа, бүх мэдээллийг ил тод, шилэн болгохыг үүрэг болгож, албан даалгавар өгсөн. Тиймээс 25 сангийн мэдээллийг олон нийтэд нээлттэй болгох ажлыг хийж хэрэгжүүлж байна.
Мөн Нийтийн мэдээллийн ил тод байдлын тухай хуульд заасан 68 төрлийн мэдээллийг олон нийтэд нээлттэй ил тод болгож шилэн байдлаар иргэдийн хяналтад авчрах ажил хийгдэж байна.
Үе үеийн хотын дарга нарын 2000-2020 он хүртэлх 20 жилийн газар олгосон талаарх мэдээллийг ил тод, шилэн байршуулсан бол өнөөдөр 2021-2023 оны газар ашиглах, эзэмших эрхийг олгосон мэдээллийг нийтэд ил болголоо. Өөрөөр хэлбэл, Нийслэлийн Засаг дарга Д.Сумъяабазарын газар олгосон мэдээлэл шилэн болж байгаа юм.
Шилэн сайтаас харахад Нийслэлийн Засаг даргын захирамжаар 2021-2023 онд газар эзэмших, ашиглах эрх бүхий 2303 гэрчилгээг олгожээ. Тодруулбал, 2021 онд 436, 2022 онд 1190, 2023 онд 677 гэрчилгээнд Нийслэлийн Засаг дарга Д.Сумъяабазар гарын үсэг зурж тус тус олгосон байна.
Шинээр газар олгох 122 захирамж гарчээ
Хамгийн их хэмжээний газар эзэмшиж байгаа нь “Эмээлт эко аж үйлдвэрийн парк” бөгөөд нийт 2.355.124 ам.метр талбай эзэмшдэг. Тэгвэл хоёрт нь, Нийслэлийн Засаг даргын Тамгын газар жагссан харагдав. Нийт 1.523.930 ам.метр талбайтай. Араас Хорихоос өөр төрлийн ял эдлүүлэх алба 1.5 мянган ам.метр талбай эзэмшдэг.
Гэхдээ газрын ангиллаар нь харвал нийт олгосон газрын 30.74 хувь нь 700 ам.метраас бага амины орон сууц, зуслангийн газар бол 17 хувь нь төрийн байгууллагуудынх, 12.72 хувь нь ДЗД-НЗД буюу дүүрэг, нийслэлийн Засаг дарга гэсэн ангиллаар олгосон байгаа юм.
Харин шинээр газар олгох 122 захирамж гарснаас дийлэнх нь амины орон сууц гэх зориулалтаар гарсан харагдаж байна. Мөн амралт сувилал, мод үржүүлэг, цэцэрлэгжүүлэлт гэсэн зориулалтаар нэг компанид олгосон газар ч байна. Мөн орон сууц барих зориулалтаар олгосон газрууд ч байна Жишээ нь, 2022 онд иргэн Батдоржийн Байгалмаад Баянзүрх дүүрэгт үйлчилгээтэй орон сууц барих зориулалтаар 3257 ам.метр талбай ч олгожээ.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.