Уран хатгамал нь торгон мэдрэмж, гарын нандин ураар бүтдэг

Үйлчин хүн учиг шаглах бүрийд ухаан нь цэгцэрч, угалз хатгах бүрийд ур нь гүйцдэг. Эрээн даавууны эн, эмжээр тааруулах тоолонд, эвийг нь олдог ухаанд суралцдаг юм гэнэ лээ. Дондогдулам, Гэнэнпил гээд Монголын алдар цуутай их хатад төрсөн Хан Хэнтий нутгийн хүүхнүүд гарын ур, ухааны цараагаар хэнээс ч дутахгүй. Хан Хэнтий нутгийн үйлчин бүсгүй уран хатгамалч Ж.Эрдэнэсувд 10 гаруй жил учиг хатгаж, үйл урлаж байна.

Хүн ардынхаа эрүүл мэндийн төлөө тангараг өргөсөн эмч бүсгүй Ж.Эрдэнэсувд үндэсний биет бус соёлын өвийн нэг болох зүү ороох оёдлоор урлаж, зоосон ширээгээр даруулж, загасан нуруугаар битүүлж, боржигон эмжээрээр эмжсэн даалин урлалыг судлан хөгжүүлэх, түгээн дэлгэрүүлэх, хадгалан авч үлдэх чин зорилготой.

Уран хатгамалч Ж.Эрдэнэсувд Зүү ороох оёдлоор даалин, хавтага, малгайн залаа, оймсны хараа, дээлийн гоёл чимэглэл, аяганы уут, даллагын уут зэрэг олон төрлийн үндэсний гэх зүйлүүдийг урлаж шагладаг бөгөөд нийтдээ 15 төрлийн 118 эд зүйл урласан байна.Тэрээр 700 гаруй шавьтай, 2019 оноос эхлэн “Нандин өв соёл” урланг нээж, уран хатгамлын ур ухааныг олонд түгээж явна.

Оёдол урлалын охь манлай уран хатгамал нь ажиллагаа ихтэй, цаг хугацаа, хүч хөдөлмөр, тэсвэр тэвчээр шалгадаг урлал. Энэ гайхамшигт соёлын биет бус өв хүнээс хүнд дамжин олон зуун жилийн нүүдэлд гээгдэлгүй өдий хүрчээ.

Эх сурвалж: Соёлын яам