Герман улсад болох дэлхийн Хуванцарын яармагт манай улсын үйлдвэрлэгчид оролцоно

"AMI Plastics World Expo" зургаадугаар сарын 14-15-ны хооронд Германы Эссэн хотод гурав дахь удаагаа зохион байгуулагдах гэж байна. Энэ нь хуванцрын салбарын мэргэжилтнүүд хуран чуулж, хамгийн сүүлийн үеийн инновац, шинэ технологи, салбарын хөгжил, зах зээлийн чиг хандлагыг судалж, хамтын ажиллагаагаа өргөжүүлдэг дэлхийн хамгийн том арга хэмжээ билээ.

Олон нийтэд нээлттэй уг үзэсгэлэн нь Хуванцрын нийлмэл бүтээгдэхүүний дэлхийн яармаг, Хуванцар дахин боловсруулах дэлхийн яармаг, полимер туршилтын дэлхийн яармаг гэх гурван томоохон хэсгээс бүрдэнэ. Тус үеэр оролцогчидтой уулзах хэлэлцүүлэг, технологийн танилцуулга, сургалт семинар зэрэг арга хэмжээ ч давхар зохион байгуулагддаг. Мөн үйлдвэрлэл үйлчилгээндээ нэвтрүүлэх шинэ бүтээгдэхүүн, материал хайж яваа худалдан авагчид ч уг экспог олноор зорьдог ажээ.

2021 оны үзэсгэлэнд 200 орчим байгууллага оролцсон ба 3000 орчим хүн зочилж танилцжээ. Харин 2023 онд Хуванцар дахин боловсруулах дэлхийн яармагт Монголын хуванцар дахин боловсруулах чиглэлээр тэргүүлэгч зургаан компани оролцохоор бүртгүүлжээ. Эдгээр компани нь Европын холбооны "SWITCH-Asia" хөтөлбөрийн санхүүжилтээр хэрэгжиж буй “Монгол Улс дахь хуванцрын дахин боловсруулалтын тогтвортой байдлыг хангах төслийн (SPRIM) үйл ажиллагаанд идэвхтэй хамрагдаж, Европт туршлага солилцох хөтөлбөрийн шалгаруулалтад тэнцсэн байгууллагууд юм. Хуванцар дахин боловсруулах бичил, жижиг, дунд үйлдвэрүүдийг (ЖДҮ) байгаль орчинд ээлтэй практикт шилжихэд нь дэмжлэг үзүүлэх замаар тогтвортой үйлдвэрлэл, хэрэглээний хэв маягийг дэмжих зорилготой юм.

"SPRIM" төслийг Каритас Чех Репаблик, Байгаль орчин, аюулгүй байдлын төв, Экосум, Монголын тогтвортой хөгжлийн гүүр байгууллагууд хамтран 2020 оноос хойш хэрэгжүүлжээ. Уг төслийн хүрээнд Хуванцар дахин боловсруулах дэлхийн яармагт Монгол Улсаа төлөөлөн, үйл ажиллагаа бүтээгдэхүүнээ танилцуулж, шинэ түншлэл, олон улсын зах зээлийн мэдлэг мэдээлэл цуглуулах болсон дотоодын хуванцар дахин боловсруулах компаниудыг танилцуулъя,

"Цэцүүх трейд" ХХК: 2018 онд химийн аюултай бодисын хуванцар савлагааг дахин боловсруулах чиглэлээр үйл ажиллагаа эхлүүлж, мөн дээрээс нь дахин боловсруулсан хуванцраар PE&PP бүтээгдэхүүн амжилттай үйлдвэрлэж байна.

"Мультипак" ХХК: 2010 онд байгуулагдсан энэхүү LDPE дахин боловсруулах компани нь хуванцар хальс болон баглаа боодол үйлдвэрлэдэг.

"Метропласт ХХК": 2011 онд үүсгэн байгуулагдсан Метропласт нь цонх, тагтны хаалтын PVC материал, өндөр даралтын HDPE ус дамжуулах хоолой, РР хоолой, хоолойд PU хөөсөн тусгаарлагч үйлдвэрлэдэг хуванцар үйлдвэрлэгч юм.

"Хэв Хашмал Пластик ХХК": HDPE, PP дахин боловсруулах уг компани нь 2014 онд үүсгэн байгуулагдсан бөгөөд барилгын бетон бүтээцийн хуванцар хэв хийх чиглэлээр мэргэшсэн.

"TML ХХК": 2018 онд үүсгэн байгуулагдсан тус компани нь Монголын анхны хэрэглээний дараах PET боловсруулдаг анхдагч дахин боловсруулдаг ба дээд зэргийн чанарын үзүүлэлтийг хангасан дахин боловсруулсан хуванцар үртэс үйлдвэрлэдэг компани билээ.

"Пластик Центр ХХК": 2016 онд үүсгэн байгуулагдсан Пластик төв нь LDPE дахин боловсруулсан хуванцраар эко жорлон, суваг шуудууны доторлогоо үйлдвэрлэдэг.