Үндсэн хуульд орсон өөрчлөлттэй холбоотойгоор Сонгуулийн тухай хуульд нэмэлт өөрчлөлт оруулах асуудлыг хэлэлцэж байна.
Энэ үеэр УИХ-ын дарга Г.Занданшатар ард түмний хүсэмжлээд байгаа УИХ-ын гишүүнд тавигдах шаардлага шалгуурыг жагсаав. Тэрээр “ Үндсэн хуулийн өөрчлөлт батлагдсантай холбогдуулаад иргэд олон нийтээс олон санал ирсэн. Үндсэн хуулийн өөрчлөлт бол төлөөллийн ардчиллыг бэхжүүлэх, төр ард түмний итгэлцлийг сайжруулах, төр бизнесийн харилцааны тэнцвэрийг зохистой болгох, эцсийн дүндээ төрийн лигитив чанар, төрийн багана суурийг батжуулахад чиглэгдсэн. Бас үндэсний аюулгүй байдлыг хангаж, хүний эрхийг дээдлэх зарчимд нийцүүлэх гэж чармайсан. Гэхдээ Үндсэн хуулийн өөрчлөлт нь Улс төрийн намуудын тухай хууль, УИХ-ын сонгуулийн тухай хуулиар бодит ажил хэрэг болно. Цогц өөрчлөлт болж байж амьдралд хэрэгжинэ. Ирэх сонгуулиас эхлээд Үндсэн хуулийн өөрчлөлт бодит үр дүнгээ өгч эхлэх ёстой. Аливаа шинэчлэлт өөрчлөлт нь боломж эрсдэлийг аль алиныг нь дагуулдаг. Сорилт бэрхшээл ч бий болно. Тиймээс УИХ-ын сонгуульд нэр дэвшигчдэд нарийн сайн анхаарч, шаардлага, шалгуурыг өндөрсгөхийг ард иргэд хэлж байна. Гишүүдийн зүгээс ч нам наймааны хэрэгсэл болж болохгүй ээ гэдгийг хөндөж хэлж байгаа. Үндсэн хуулийн өөрчлөлт бол стратегийн өөрчлөлт хийж байгаа боловч, яг энэ органик, процессын хуулиуд дээрээ маш сайн анхаарч байж, бодитойгоор хэрэгжүүлж чадна. Монголчууд бид аливаа асуудлын жижиг детальд хайнга ханддаг. Том тогтолцооны өөрчлөлт ярьдаг. Сүүлдээ хүндээ биш тогтолцоондоо гэдэг. Тогтолцоо болохгүй бол хүндээ гэдэг. Одоо хуучин хүний тухай ярьж байна. Энэ бүхэн маань УИХ-ын гишүүдийн сайн шаардлага шалгуурыг өндөрсгөөрэй гэсэн үг. Ахмадуудаас зөвлөгөө ирүүлж, УИХ-ын Сонгуулийн хуулийг иргэдийн ашиг сонирхолд нийцүүлж, нэр дэвшигчдэд дараах шалгуурыг хангахыг анхааруулсан.
-Юуны өмнө юу ярьж, хийж явсан хүн бэ гэдэг нь маш чухал. Олон улсад ч энэ шалгуурыг тавьдаг. Өөрийгөө удаан хугацаанд шалгуулж, шалгарсан мэдүүлсэн хүн байх ёстой.
-Ард түмнийхээ дунд амьдарч хийсэн хэлсэн нь ил байж танигдсан хүн байх ёстой. Хаана ч хэлсэн бай, хэлсэн үгнийхээ төлөө хариуцлага хүлээдэг хүн байх ёстой.
-Ёс суртахууны өндөр төлөвшилтэй, ямар ч тохиолдолд авлига, албан тушаалын гэмт хэрэг хийхгүй хүн байх ёстой.
-Ард иргэдийнхээ амьдрал ахуй, нийгмийн амьдралыг сайн ойлгож, илүү сайжруулах ёстой гэдгийг ухамсарласан хүн байх ёстой.
-Дарга болохыг эрмэлзсэн биш ард түмнээ төлөөлж тэмцэгч байхаар хүсэл зорилгоо илэрхийлсэн хүн байх ёстой.
-Өөрийнхөө хүсэл зорилгыг ард түмнийх мэтээр ойлгож яваа хүн төрд ард түмнийг төлөөлөх эрхгүй.
-Би би гэсэн үзэлтэй хүн бол болохгүй. Бид гэж ярьдаг, ард түмнээ төлөөлөх хүн байх ёстой.
-Цогц мэдлэгтэй асуудлыг бүхлээр нь харж чаддаг хүн байх ёстой. Иргэдтэйгээ байнга холбоотой байж тэдний юу хүсч байгааг мэдэрдэг, түүнийгээ төрийн бодлогод тусгуулдаг хүн байх ёстой.
-Ард түмний амьдралыг мэддэг, төрд ажилласан туршлагатай, салбар салбартаа ажиллаж үзсэн хүн байвал зохимжтой.
-Ийм учраас иргэд сонгогчдын улстөрийн мэдлэг ч чухал. Энэ бүхнийг харгалзан үзэж улстөрийн сонгуулийн тухай хуульд тусгах хэрэгтэй.
-Улс төрийн намуудын тухай хуультай ч энэ бүхэн салшгүй холбоотой. Улс төрийн намын шинэчлэл дотоод ардчилалтай байх, санхүүжилт ил тод байх тухай 2019 оны Үндсэн хуульд тусгасан. Улс төрийн тогтолцооны суурь нь улс төрийн намууд.
Намууд зарагдаж байна, наймааны хэрэгсэл боллоо гэх шүүмжлэл байна. Үүнийг л УИХ-ын сонгуулийн тухай хуулиар хааж байна гэдгээ зарлан тунхаглаж бодитойгоор хэрэгжүүлэх хэрэгтэй” хэмээн хэлэв.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.