Шог зургийг С.Цогтбаяр
Сүүлийн нэг жилийн хугацаанд нийслэлчүүдэд сүрхий “сюрприз”-тэй өдрүүдтэй болоод байгаа. Өчигдрийн гэнэтийн “сюрприз”-ийн балгаар нийслэлийн Хан-Уул дүүргийнхэн өдөр бүр тулгардаг түгжрэл нь бүүр тэг зогсолт болж, автобус машиндаа хэдэн цагийг барав.
"Цагдаагийн ерөнхий газрын хэвлэл мэдээллийн төв" гэсэн сошиал хаягаар “Замын хөдөлгөөн зохион байгуулалтыг түр хугацаагаар өөрчлөн зохицуулна” гэх мэдээлэл өчигдөр /2024.03.12/ цацсан. Мэдээлэлд дөрвөн эгнээ замыг цагийн хязгаартайгаар 3 болгох тухай дурдсан ч хэзээнээс энэ зохицуулалтыг хийх тухай, хаанаас ийм шийдвэр гарсан талаар огт дурдаагүй байв. Ид оргил ачааллын үед буюу өглөө 07:00-10:00 цагт, орой 17:00-20:00 цагт л зорчих хөдөлгөөний түр өөрчлөх тухай л дурдаж. Гэтэл мэдээлэл гарсан даруйдаа шахуу хэрэгжиж эхлэхийг өчигдөр Хан-Уулчууд жинхэнэ утгаар нь мэдэрч, тэг зогсолтод өртөв. Ажлаа тараад 18:30 цагт талбайгаас гарсан хүн Яармагийн гүүр даваад гэртээ иртлээ 3:30 цаг зарцуулав.
Ер нь, Сөүлээс онгоцонд суусан хүн Чингис хаан нисэх онгоцны буудалд бууж байхад Улаанбаатарчууд 10 хүрэхгүй км зам туулж байгаа нь бодит байдал болоод удлаа.
Хачирхалтай нь, нийслэл энэ зохицуулалтыг хийж байгаа юм уу, тээврийн цагдаагийн газраас дур мэдээд хийчихсэн юм уу огт ойлгогдсонгүй. Бас ямар судалгаанд тулгуурлаад ямар гаргалгаа, гарцыг олж хараад яагаад ийн зохицуулалт хийх болсон талаар ч мэдээлэл өгсөнгүй.
Өнөө өглөө Нийслэлийн Засаг дарга Х.Нямбаатар "НЗДТГ-аас автозамын хөдөлгөөн зохицуулалттай холбоотой ямар нэгэн шийдвэр гаргаагүй болно. Уг асуудлаар Тээврийн цагдаагаас тодруулна уу. Хэвлэл мэдээллийн зарим байгууллага, нийтлэгчид мэдээллээ нягталж байхыг хүсье" хэмээн жиргэжээ. Тэгэхээр нийслэлийнхээ засаг захиргаатай огт зөвлөлгүй гаргасан шийдвэр ийн хэрэгжиж буй аж.
Ерөнхий сайд өчигдөр нийслэлийг бүсчилж хөгжүүлэх асуудлаар Яармагт уулзалт хийснийг эс тооцвол Яармагийн түгжрэлд гэнэт яагаад санаа тавих болов, зорчих хөдөлгөөнийг өөрчлөх шийдвэр хэн гаргасныг одоогоор мэдээлсэн зүйл алга.
Яг үнэндээ, тэрхүү шийдвэрийг нь уншаад ойлгосон хүн ч цөөн байсан. Өнөөдөр өглөө ч байдал давтагдав. Хан-Уулаас даваад Төв шуудангийн уулзварт хүрсэн түгжрэл иргэдийг ажлын байранд нь бухимдалтай чирээд оруулав. Хүүхдүүд сургуулиасаа, иргэд ажлаасаа хоцров.
Харин манай дарга нарын хувьд 09:00 цагаас хойш ажилдаа гардаг болохоор тэр бүр мэдрээгүй байж болох. Түгжрэлийг бууруулах гэж Засгийн газар, нийслэлийн зүгээс багагүй санаачлага гаргаж байгаа ч харамсалтай нь “нуухыг нь авах гээд нүдийг нь сохлов” гэгчээр түгжрэлийн бухимдлыг улам өрдөхөөс цаашгүй байна.
Манай шийдвэр гаргагчдын тархины түгжээ мултарч, хамтарч ажилладаг, хамтын шийдвэр гаргадаг болсон цагт л хотын түгжрэлийг зохицуулах гарц гаргалгааны талаар ярих нь бололтой.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.