Д.Амарбаясгалан: Хөдөлмөр эрхлэлтийг дэмжих сангаас малчин өрхөд 5-8 сая төгрөгийн хүүгүй зээл олгоно

Засгийн газрын өнөөдрийн хуралдаанаар хэлэлцэж, шийдсэн асуудлын талаар ЗГХЭГ-ын дарга Д.Амарбаясгалан мэдээлэл өглөө.

ЗГХЭГ-ын дарга Д.Амарбаясгалан “Зах зээл дээр үйлдвэрийн аргаар нядалсан мах экспортод гарах боломжтой байдаг. Нөөцийн маханд мөн үйлдвэрийн аргаар бэлтгэсэн мах нийлүүлэх болзолтой байдаг. Тэгвэл малчдын гар дээр байгаа махыг зах зээлд нийлүүлэх боломж хомс байна, үнэ хямд байна гэх гомдол гардаг. Учир нь, ченжүүд л малчдын гар дээрээс мах авдаг. Тиймээс Засгийн газрын зүгээс гар аргаар нядалсан махыг эрүүл ахуйн шаардлага хангасан шинжилгээнд тулгуурлаж, мах бэлтгэлийн компаниуд ХАА-н биржээр дамжуулан худалдан авч нийслэлчүүдийн хэрэглээнд нэвтрүүлэх чиглэл оны дараахан өгсөн. Энэ дагуу мах бэлтгэлийн компаниудтай хамтран ажиллаж, нийлүүлэлтийг нэмэгдүүлэх ажлыг зохион байгуулж байна. Улаанбаатар хотын хэмжээнд нөөцийн 6000 тонн мах бий. Компаниуд дээр 2000 орчим тонн мах бий гэсэн мэдээлэл өгсөн. Тиймээс 4,5,6 дугаар сард нийлүүлэлт нэмэгдүүлэхэд анхаарч ажиллана.

Хоёрт,  Монгол Улсын Баялгийн сангийн тухай хуулийг УИХ-д өргөн барих асуудлыг хэлэлцлээ. Хэд хэдэн удаа буцсан энэ хуулийн танилцуулгыг хийсний дараа ирэх 7 хоногийн Засгийн газрын хурлаар хуулийн төслийг эцэслэн УИХ-д өргөн барих үүрэг чиглэлийг Ерөнхий сайдын зүгээс өгсөн. Баялгийн сангийн тухай хуулийн төслийг боловсруулах ажлын хэсгийг Эрдэнэс Монгол компанийн захирал Наранцогт ахалж байна.

Баялгийн сан нь дотроо 3 сантай байх зохицуулалт хийж байна. Нэгт, Ирээдүйн өв сан, хоёрт Хуримтлалын нэгдсэн сан / иргэн бүрт орон сууцны хөтөлбөр хэрэгжүүлэх, боловсрол, эрүүл мэндийн чиглэлээр захиран зарцуулах хязгаарлагдмал сан/, гуравт Хөгжлийн сан /Бүс нутгийн хөгжлийн сан/ байхаар зохицуулжээ. Орлогын эх үүсвэрийг  2023 оны татварын эх үүсвэрээр тооцож үзэхэд АМНАТ-ын 65 хувь Ирээдүйн өв санд, Төрийн өмчит компаниудын ноогдол ашгийн 35 хувь нь Хуримтлалын нэгдсэн сан дээр үлдэнэ. “Эрдэнэс Монгол” нэгдлийн хуримтлалын нэгдсэн сангаар тооцоход 1.1 их наяд төгрөг Хуримтлалын нэгдсэн санд төвлөрөх боломжтой. Мөн Оюутолгой, Эрдэнэт үйлдвэрийн ногдол ашгийн 34 хувь нь Хуримтлалын санг бүрдүүлэх юм.

Тогтворжуулалтын буюу Хөгжлийн сангийн хувьд төсвийн давсан орлогын 50 хувь нь тус санд төвлөрнө.

Гуравт, 2024 оны цас зудын нөхцөл байдалтай холбогдуулан Засгийн газрын зүгээс малжуулах хөтөлбөрийг бодлогоор хэрэгжүүлнэ.

Өнөөдрийн байдлаар 6 орчим сая мал хорогдсон дүн мэдээ байгаа бол ОБЕГ-ын дэргэдэх Эрсдэлийн газраас 20 орчим сая мал хорогдох дүгнэлт гаргасан. Эндээс үзвэл 20 орчим мянган малчин өрхийн амьжиргаанд шууд нөлөөлнө.

Малжуулах хөтөлбөрийг хоёр үе шаттай хэрэгжүүлнэ. Нэгт, ХНХЯ-ны дэргэдэх Хөдөлмөр эрхлэлтийг дэмжих санд 107 орчим тэрбум төгрөгийн эх үүсвэр бий. Үүнээс малчин өрхийг малжуулах зорилгоор 5-8 сая төгрөгийн хүүгүй зээл олгох нөхцөл хуулиараа зохицуулагдсан байдаг. Хоёрт, УИХ-д нэн яаралтай горимоор хуулийн төслийг өргөн барина. Нэг удаагийн шинжтэй хууль байна. Үүнд, бодлогын 7 асуудлыг тусгаж хэрэгжүүлэхээр тусгаад байгаа юм. Хуулиар хоршоодын хөгжлийн эрхзүйн орчинг хангах боломжийг бий болгоно гэлээ