Арав хоногийн дараа буюу 2024 оны 4 дүгээр сарын 20-ны өдөр С.Зориг 62 нас хүрэх байлаа. Тэр бусдын гарт амь үрэгдээд 26 жил болж байна. Түүний бие цогцос газар шороондоо шингэсэн ч Монголын улс төр, улс төрчид өнөөдөр ч " ухсаар”.
1.
УИХ-ын сонгууль болохоор С.Зориг агсны ясыг өндөлзүүлдэг “ээлжит үзэгдэл” ч давтагдсаар. Монголын төрийн эрхийг ээлжлэн барьж буй хоёр намын лидерүүд өнөөдөр ч “Зоригийг хэн алсан бэ” хэмээн талцан хэрэлдэж байна. Түүгээр зогсохгүй хүрэл хөшөөнд нь өчүүхэн ч газар олдохгүй нь. Улс төрчид, ардчиллагчид “Би Монгол хүний саруул ухаанд итгэдэг” гэх үгээр нь “гангарсаар” 26 жилтэй золголоо.
“С.Зоригийн амь насыг бүрэлгэсэн хэрэг илэрсэн бас илрээгүй” гэх мэдээлэлд иргэд төөрсөн хэвээр байна. Харин улс төрчид “Зориггүй, Зоригтой” хэмээн түүний нэрээр улстөр хийсээр...
Өнгөрсөн долоо хоногт Ерөнхий сайд Л.Оюун-Эрдэнэ “Улаанбаатараас ярьж байна” нэвтрүүлэгт Ерөнхийлөгч асан Ц.Элбэгдорж Ерөнхийлөгч Х.Баттулгатай тамга солилцохдоо “Ганцхан С.Зоригийг хөнөөсөн хэргийг л битгий сөхөөрэй, бусад нь надтай хамаагүй” гэж хэлсэн байдаг” гэж ярьсан нь олон нийтийн анхаарлыг татсан. Мөн тэрээр “энэ бол улс төрийн аллага” гэв. Хариуд нь, Ерөнхийлөгч асан Ц.Элбэгдорж “Зоригийн алуурчдыг мөрдөгчид илрүүлсэн. Хууль шүүх тогтоосон. Тэр алуурчид одоо ч сэжигтэн хэвээр” хэмээн өчигдөр ярив. Аль аль мэдээлэл нь Монголын нийгэмд улс төрчдөд, хууль шүүхэд итгэж болохгүй гэх мэссэжийг өгсөөр байна. Хамгийн аймшигтай нь, хариуцлага хүлээх эзэн алга. Явган хэрүүлээс хэтрэхгүй байна.
Сүүлийн хэдэн өдөр хэвлэлээр Ц.Элбэгдоржийн талаар хангалттай мэдээлэл гарлаа. МАН-ынхан ч ярилаа, АН-ынхан ч ярилаа. Тэр үнэхээр шүүхийг атгасан хэвээр байна уу, тэр С.Зоригийн амь насыг бүрэлгэсэн гэх хэргийг илрүүлсэн гэх зохиолыг бичсэн үү, тэр Тавантолгойг зарахыг санаархсан уу, Эрдэнэтийн 49 хувийг авахад хуйвалдсан уу гээд эцэслээгүй асуултууд нийгэмд үүссээр...
2.
Нийслэлийн Засаг дарга Х.Нямбаатар өчигдөр өөрийн твиттер хуудсанд “Бид “Зоригтой”-гоо үлдэнэ” гэжээ. Тэрээр “Зоригийн хөшөөний газрыг заржээ! Зараад зогсохгүй хөшөөг нүүлгэн шилжүүлж газар дээр нь цамхаг барихаар санаархаж байна” гэх зэргээр бичсэн байна.
Учир нь, АН-ын одоогийн байрлаж байгаа С.Зоригийн хөшөөтэй хуучны цэнхэр байшингийн хууль ёсны өмчлөгч “Шинэ дэвшил” холбооноос эзэмшлийн 3000 ам.метр талбайд “Ардчиллын өргөө” ХХК-ийн нэрээр 52 давхар үйлчилгээний зориулалттай барилга бариулахаар 2014 онд Архитектур төлөвлөлтийн даалгавраа тухайн үеийн хотын ерөнхий архитектор Н.Нацагдоржоор батлуулжээ. Гэхдээ Шинэ дэвшил холбооны гүйцэтгэх захирал Н.Цэнгэл “С.Зориг сан”-д хаяглан С.Зоригийн хөшөөг тус санд шилжүүлэх зөвшөөрөл хүссэн байгаа юм.
Өмнө нь, тус газрыг “Голомт” –ын ТУЗ-ийн дарга Д.Баясгаланд 400 мянган ам.доллараар зарсан гэх мэдээлэл гарч байсан бөгөөд АН-ын дарга асан С.Эрдэнэ “ Д.Баясгалан 41 давхар үйлчилгээний зориулалттай барилга босгох санал тавьсан” гэдгийг баталж байсан. Гол нь С.Зоригийн хөшөөг шилжүүлэхийг АН зөвшөөрөхгүй гэж ярьсан байдаг.
Төр нийгмийн нэрт зүтгэлтэн С.Зориг арав хоногийн дараа 62 хүрэх байлаа... Түүний зүрх зогсоод 26 жил боллоо...
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.