Монгол Улсын Засгийн газар 2015 онд Дэлхийн банктай “Цахим Эрүүл мэнд” төсөл хэрэгжүүлэх хэлэлцээрийн хүрээнд “НIEP” эрүүл мэндийн мэдээлэл солилцох платформ хөгжүүлэх, туршин нэвтрүүлэх олон улсын нээлттэй тендер зарласан аж. Сонгон шалгаруулалтыг хоёр үе шаттай явуулж, БНСУ-ын “Таёкун” компанийн БНСУ-ын KEB HANA банкны дансанд мөнгө шилжүүлжээ. Тиймээс Дэлхийн банк 2022 онд Монгол Улсын Засгийн газраас 1.7 сая ам.доллар буюу оройлцоогоор 5.5 тэрбум төгрөг нэхэмжилсэн аж. Ерөнхий сайдаас тухайн үед ХЗДХ-ийн сайд хийж байсан Х.Нямбаатарт үүрэг өгч, хэргийг тодруулах, АТГ-т газарт шалгуулж, хариуг яаралтай өгөхөөр ажилласан байна. Учир нь, төслийн хүрээнд эрүүл мэндийн салбар цахимжиж, эрүүл мэндийн мэдээллийг нэгдсэн санд бүртгэн, нийслэл, орон нутгийн аль ч эмнэлгийн эмч тухайн өвчтөний мэдээллийг үзэж, цаг алдалгүй тусламж үйлчилгээ үзүүлэх боломж бүрдэх байв. Гэвч төсөл бүрэн хэрэгжээгүй юм.
АТГ-аас Дэлхийн банкны Мөрдөн шалгах хороотой хамтран ажилласны үр дүнд төслийг хэрэгжүүлэх эрх авсан “Таёкун” компани Дэлхийн банкнаас мөнгө шилжсэний дараа 200 мянга орчим ам.долларыг өөртөө авч, үлдсэн мөнгийг туслан гүйцэтгэгч “АКС” гэх ХХК руу буюу Монгол руу шилжүүлснийг тогтоожээ. Энэ нь залилах буюу авлигын хэрэг гэж үзэн хохирлыг 100 хувь БНСУ-ын "Таёкун” компаниас шилжүүлэн авахаар болсон байна. Өөрөөр хэлбэл, “5Ш ажиллагаа”-ны хүрээнд Дэлхийн Банктай Settlement буюу тохиролцоо хийж хохирлыг буруутай этгээдээр нөхөн төлүүлэхээр болжээ.
Сануулахад, 2015 онд мөн л Азийн хөгжлийн банкнаас эрүүл мэндийн салбарт төсөл хэрэгжүүлэхээр авсан 4,7 сая ам.долларыг Засгийн газраас нэхэмжилж, нөөц сангаас олгосон тухай мэдээлэл гарч байсан.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.