М.Ганбаатарын өчигдрийн үнэн, өнөөдрийн гамшигийг авчирлаа

Улаанбаатарын утааны гол бурууг иргэдэд тохдог хурган дарга нарын нэг нь М.Ганбаатар. Сайжруулсан түлшний үйлдвэрт бүх зүйл “ОК” байгаа гэж хуруу гараа гозойлгохоос наахнуур ярьж, бурууг бусдаас хайсаар ирсэн М.Ганбаатар Улаанбаатарыг утаанаас салгана гэвэл ёстой зангууны үлгэр л юм байна. Хэрэв чаддаг, хийдэг байсан бол түүнд хангалттай цаг хугацаа, хөрөнгө мөнгө, энэ хүрээнийх нь эрх мэдэл байлаа. Гэвч чадсангүй, бүр дордуулчихлаа. 

Яг үнэндээ, мөн чанар нь тэрбээр аж ахуйн ажлын сайн зохион байгуулагч ч биш, бас улс төрч ч биш. М.Ганбаатарт эхлүүлсэн ажлаа амжилттай дуусгаж байсан түүх бараг л үгүй гэлцэх юм билээ. Зүгээр, нам дагаж далдагнаж хоолоо залгуулдаг тэр л хүмүүсийн төлөөлөл. Гэхдээ тэр дарга нарын нүдэнд байнга өртөж, хойно урд нь гүйж, эв гавыг нь олчихдог, амин хувь, ажил албаныхаа амбицыг мэдрүүлчихэж чаддаг гүйлгээ ухаантай, шалихгүй овжин нэгэн.  Үүнийхээ хүчинд өдий хүртэл хурган дарга гэгдээд явж байна.

Түүнийг хотын фракцийн хүн гэдэг. 60 тэрбумын автор Ц.Сандуйгийн итгэлт нөхөр явсан М.Ганбаатар нийслэлийн МАН-ын хорооны дэд дарга хүртэл хийж явсан. Яагаав мөнөөх алдарт 60 тэрбумынхан гэсэн үг. Тэрбээр НИТХ-ын төлөөлөгч байхдаа намынхаа бодлогын эсрэг улс төр хийж, С.Баярыг элдвээр хэлж М.Энхболдод үнэнч гэдгээ харуулж чадсаны хүчинд  сонгууль бүрийн дараа хэр чинээндээ таарсан бялуу хүртсээр ирсэн байдаг.  Тодруулбал, 2016 оны сонгуулийн дараа  Нийслэлийн гэр хорооллын дэд бүтцийн даргаар томилогдож байв. Тэр тэнд  дахин төлөвлөлтийн улмаас хохирсон иргэдийн нэрийг барьж улс төр хийж, гэр хорооллыг орон сууцжуулахад шаардагдах төсвийг царцааж байв.

Мөн гэр хорооллын дахин төлөвлөлтийн ажлыг унагасан. Хэрэв урьдын төлөвлөлтийг нь хэвээр үргэлжлүүлсэн бол хотын яндан өдийд тодорхой тоогоор цөөрч, Улаанбаатарын утаа тэр хэмжээгээр багасах байсан нь тодорхой. Ногоон нуур орчмын намаг ихтэй газрыг нэг мкв-ын 100 мянган төгрөгөөр үнэлэн худалдан авч төсвийн мөнгийг үр ашиггүй зарцуулсан гэгддэг.  Түүний ийнхүү худалдаж авсан газарт ямар ч барилга байгууламж баригдаагүй хэвээр байна. Ж.Эрдэнэбат ерөнхий сайд байхдаа М.Энхболдын Ерөнхийлөгчийн сонгуулийн пиар болгож Ногоон нуурт 1080 айлын орон сууцны шав тавьсан ч тэгээд орхигдсон байдаг. Энэ газарт ганц гайгүй амбар ч баригдалгүй өдийг хүрснийг бодоход ямар нэгэн шалтгаан байгаа л байх.

Тэр яггүй ярьчихдаг, попрохдоо бол  барагтай хүний ард ороод байх нэгэн биш. Дэд бүтцийн газрын дарга байхдаа дэд төв байгуулж, Гандангийн дэнжийн Орхоны 1, 2-р гудамжийг аялал жуулчлалын гудамж болгоно гэж баахан иргэдийг бужигнуулж байсан ч гавьтай ажил тэнд хийгдээгүй. Тэр үед Э.Бат-Үүлийн эхлүүлсэн гэр хорооллыг орон сууцжуулах ажлыг үргэлжлүүлэх боломж М.Ганбаатарт хоёр ч удаа тохиосон боловч тэр хийж чадаагүй юм.

Ийм ажил хэргийн маруухан түүхтэй нэгнийг  2018 онд Тавантолгой түлш компанийн захирлаар томилсон нь ард талд нь асаалттай байдаг фракцийнх нь ач тус байсан биз . Шинэ үйдвэриийн засаглалаа сайжруулж, БНХАУ, БНСУ зэрэг ойрын хөршүүдийнхээ жишгээр утаагүй түлшний менежментийг нэвтрүүлж Улаанбаатарын утааг бууруулж чадсан бол тэр аль фракц, хэний хүн байх нь огтхон ч хамаагүй.

М.Ганбаатар Улаанбаатарын утааг үнэ хямд байгаатай холбон тайлбарлаж, албат ажилтнуудаараа сайжруулсан түлшний чанарт ямар ч асуудал байхгүй, техник технологи зөрчөөгүй гэсэн мессэжийг хэвлэл мэдээллээр залхтал яриулж бичсэн.  

Гэтэл Ерөнхий сайд өчигдөр УИХ дээр “Сайжруулсан түлшний үйлдвэрт технологийн горим алдагдсан” гэсэн мэдээллийг өглөө. Бурууг бусдаас идэвхтэй хайж байсан М.Ганбаатар үнэнд ийнхүү гүйцэгдэв.

Ажил амьдрал, хийсэн бүтээснээрээ нийгэмд танигдаж чадаагүй хэрнээ намын буян, эрх мэдэлтний тус дэмээр  дарга даамал болсон энэ мэт чадваргүй нөхдүүдээс ажлын үр дүн хүлээх нь улс орны амьдралд ямар хор уршигтай болохыг Улаанбаатарын утаанаас  харж болно. Тодорхой байгаа үнэн гэвэл М.Ганбаатарыг Улаанбаатарыг утаанаас салгана гэж хүлээвэл “ бухын доодохыг харж үнэг турж үхэхтэй яг адилхан л юм байна .

Г.Учрал