Шинэ Зеландын Ерөнхий сайд COVID-19 дэгдэлтийн улмаас хуримаа цуцаллаа

 Шинэ Зеландын Ерөнхий сайд Жасинда Ардерн омикрон хувилбарын дэгдэлтээс шалтгаалан улс орондоо шинэ  хязгаарлалт тогтоосон тухай зарласныхаа дараа өөрийн хуримаа цуцалжээ.

Шинэ журмын дагуу аливаа бүх нийтийн арга хэмжээнд бүгд вакцин хийлгэсэн бол 100-аас илүүгүй, харин вакцинжуулалтын гэрчилгээгүй бол 25-аас олонгүй хүн цугларах боломжтой. Үүнээс гадна дэлгүүр, сургууль, нийтийн тээвэрт амны хаалт заавал зүүх болж байна.

Одоогийн байдлаар Шинэ Зеландад ковид-19-ийн халдварын 15,104 тохиолдол бүртгэгдэж, коронавирусын улмаас 52 хүн нас баржээ.

Ерөнхий сайд хатагтай  Жакинда Ардерн  телевизийн хөтлөгч Кларк Гэйфордтой гэрлэх товоо түр хойшлуулж байгаагаа Ням гарагт хэвлэлийнхэнд  мэдэгджээ.

"Халдварт тахлын таагүй үр нөлөөг амсч байгаа мянга мянган  Шинэ Зеландчуудаас ялгарах зүйл надад огтхон ч үгүй гэж хэлэхээс айхгүй байна. Хамгийн гол нь хайртай хүмүүсээ хүнд өвчтэй байхад нь тэдэнтэй хамт байх боломжгүй байгаа нь энэ цаг үед надад  тохиолдож байгаа зүйлүүдээс хамгийн гунигтай нь байна." гэж  Ерөнхий сайд хэлжээ. 

Хязгаарлалтын шинэ журам орон нутгийн цагаар ням гарагийн шөнө дундаас хэрэгжиж эхэлсэн бөгөөд  энэ нь омикрон хувилбараар нэг дор халдварласан есөн тохиолдлоос үүдэлтэй. Цар тахлын эхэн үеэс Шинэ Зеландын эрх баригчид тус улсыг гадаад ертөнцөөс тусгаарлахыг хичээж, тухайлбал Европын орнуудаас хамаагүй цөөн тооны халдварын эсрэг хатуу хариу арга хэмжээ авч байгаа нь энэ.

Окландад болсон хуриманд оролцсон гэр бүл Саут-Айлендад буцаж ирэхдээ гэр бүлээрээ омирконоор өвчилсөн нь тодорхой болж, шинжилгээ эерэг гарсан байна. Тэдний нисч явсан онгоцны багийн гишүүд мөн халдвар авсан байна. Албаны хүмүүсийн үзэж байгаагаар энэ тохиолдолд халдварын түвшин маш өндөр байх магадлалтай гэж байна.

Одоо танхимд зохион байгуулагдах бүх арга хэмжээнд 100 хүн бүрэн вакцин хийлгэсэн байх хязгаар тогтоогоод байгаа бөгөөд хэрэв оролцогчид вакцинжуулалтын паспортоо биедээ авч явахгүй бол 25 болж буурна. Энэ нь биеийн тамирын заал, хуриманд ч хамаатай.

Шинэ Зеланд улс тахал эхэлснээс хойш нас барагсдын тоог хамгийн бага хэмжээнд байлгахын тулд хатуу хязгаарлалт хийж байна. Тус улс хилээ хаасан дэлхийн хамгийн анхны улсуудын нэг бөгөөд үүнийхээ ачаар өвчний эхэн үеийн дэгдэлтийг дарж чадсан юм. 

Зарим мэдээллээр Шинэ Зеландын 12-аас дээш насны хүн амын 94 орчим хувь нь бүрэн вакцинд хамрагдсан бөгөөд нэмэлт вакцин хийлгэх эрхтэй хүмүүсийн 56 хувь нь мөн вакциндаа  хамрагджээ.

Өнгөрсөн жил Шинэ Зеланд улс хилээ үе шаттайгаар нээхээр төлөвлөж байгаагаа зарласан. Дөрөвдүгээр сарын 30-нд эхлэх сүүлчийн шатанд гадаадын иргэдийг тус улсад нэвтрүүлэхээр төлөвлөж байгаа юм.

Дашрамд тодотгоход тус улсын  Лейборист намын тэргүүн хатагтай Жасинда Ардерн  2017 оноос тус улсын Ерөнхий сайдаар ажиллаж байна.  Тэрбээр 1980 онд төрсөн. Харин 2018 онд  Ерөнхий сайд байхдаа охин  төрүүлсэн бөгөөд үүнийг Ерөнхий сайдаар ажиллаж байхдаа хүүхэд төрүүлсэн хоёр дахь тохиолдол хэмээн онцолж байв. Үүний өмнө Беназир Бхутто Пакистаны Ерөнхий сайдаар ажиллаж байхдаа хүүхэд төрүүлж байжээ. 

Эх сурвалж: ВВС болон бусад