Цар тахлын үеэс эмч, онцгой байдал, цагдаагийн албан хаагчид маш өндөр ачаалал дунд ажилласаар даруй хоёр жилийг үдсэн байна. Энэ хооронд эдийн засаг элгээрээ мөлхөж, өргөн хэрэглээний бараа бүтээгдэхүүний үнэ тэнгэрт хадсаар иргэдийн худалдан авах чадвар огцом буурч, инфляци хоёр оронтой тоонд шилжив.
Харин энэ бүх зүйлс өсөж байх хооронд ганцхан ард иргэдийн болоод цар тахлын хүнд хэцүүд хоёргүй сэтгэлээр ажиллаж ирсэн эмч, цагдаа, багш, онцгой байдлын алба хаагчдын цалин өссөнгүй.
Монгол Улсад одоогоор хөдөлмөрийн хөлсний доод хэмжээ 420.000 төгрөг. Иргэдийн дундаж цалин 2021 оны байдлаар 1.335.000 төгрөг гэсэн өндөр тоо гарсан хэдий ч нийт хүн амын 12.1 хувь нь сард хөдөлмөрийн хөлсний доод хэмжээ буюу 420.000 хүртэлх цалингаар амьдралаа залгуулдаг. Харин 19 хувь нь 420.001 - 700.000 төгрөгөөр амьдарч байна. Эдгээр цалин хөлсний дүнг дэлхийн өндөр хөгжилтэй улс орнуудын дундажтай харьцуулаад үзвэл Монгол улсын нийт хүн амын 30 гаруй хувийн сард авдаг 700.000 хүртэлх цалинг Өмнөд Солонгос болон АНУ-д 1-3 өдрийн дотор өлхөн олохоор харагдаж буй нь нүдэнд илхнээ.
Бид гадаадад ажиллаж амьдарлаа босгох гэж хичээж буй олон мянган ажиллах хүчний залуусаа хүний нутагт боолын хөдөлмөр эрхлэгчид хэмээн нэрийдэх боловч тэр залуус эх орондоо эзэмшсэн мэргэжлээрээ ажиллаад үнийн хөөрөгдөлд автсан, өнөө маргаашаа арай ядан залгуулснаас хүний хөдөлмөрийг бодитоор нь үнэлдэг газарт амрах гэдгийг үл мартан хичээж ажиллах гэж хошуурах нь арга ч үгүй биз. Энэ бүхнийг зурсхан бодоод өнгөрөхөд "Хаана бид боолчлогдсон бэ"?
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.