Даваа гарагт намын бүлгүүдийн хурлын дараа олонхын бүлгийн дарга Д.Тогтохсүрэн мэдээлэл хийх үерээ сар бүр авдаг шатахууны зардал 500 мянган төгрөгийг таван төгрөгтэй зүйрлэснийг долоо хоногийн онцлох ишлэлээр нэрлэвал хэтрүүлэг болохгүй биз.
Тэрээр “-УИХ-ын дарга, Байнгын хорооны дарга, дэд дарга нар л албаны унаа унаж байгаа. Өөр нэг ч албаны унаатай гишүүн байхгүй. Одоо сардаа бензиний лимит таван төгрөг аваад, хувийнхаа машинд хийгээд явж байна” хэмээсэн нь олны дүргүйцлийг хүргэв.
Эрх баригч намын бүлгийн дарга энэ үгээрээ үндэсний мөнгөн тэмдэгтээ доош нь хийн үнэгүйдүүлж, 500 мянган төгрөгийн цалин орлоготой хүмүүсийг басан доромжилж, бас өөрийгөө ийм хэмжээний мөнгийг таван төгрөгт тооцох өндөр орлоготой гэдгээ гайхуулаад авав.
Долоо хоногийн онцлох үйл явдал гэвэл УИХ-аар Засгийн газраас УИХ-д өргөн мэдүүлсэн Олон улсын хямралт нөхцөл байдлаас үүдэлтэй гол нэр төрлийн бараа, бүтээгдэхүүний үнийн өсөлт, хомсдолоос сэргийлэх, нөлөөллийг бууруулах тухай хуулийн төслийг УИХ-аар баталсан явдал байлаа.
Үүнийг зөв буруу гэсэн байр суурь, талцал нэлээд байх шиг. Гэхдээ асуудалд хоёр талаас хандаж байна. Жамаараа яваа эдийн засгийг захиргаадалтын журмаар зохицуулах гэлээ гэсэн шүүмжлэл түлхүү дуулдаж байна.
Харин үнэ тогтворжуулах явдал бол чухал. Ялангуяа ийм эрсэлдтэй цаг үеэр. Одоогийн энэ хуулиар бензин шатахуун, мах гурил гэсэн топ гурван бүтээгдэхүүний үнэд л зохицуулалт хийж байгаа учраас хавтгайрсан захиргаадалт биш гэж тодотгож байна. Энэ гурваас илүү гаргаж үнийн зохицуулалт хийх гэвэл мэдээж төсөв даахгүй.
Дээрх хуулийг УИХ баасан гарагийн хуралдаанаараа хэлэлцэж баталсан. Зарим гишүүдийн хэлж байгаагаар УИХ түүхэндээ анх удаа үнэ тогтворжуулах хөтөлбөр хэлэлцэж баталж байгаа нь энэ ажээ.
Улирч буй долоо хоногийн улс төр дэх содон үйл явдлын нэг нь Засгийн газар ээлжит бусаар хуралдаж жагсагч залуучуудын шаардлагыг хангах асуудлыг хэлэлцлээ. Энэ хуралдаанаас хэд хэдэн шийдвэр гарсны нэг нь ажилтны нийгмийн даатгалын шимтгэлийг он дуустал 50 хувиар хөнгөлөх тухай шийдвэр байлаа.
Ташрамд тодотгоход, үнийн өсөлтийн эсрэг жагссан залуус 15 шаардлага ирүүлсэн. Уг асуудлаар ажлын хэсэг байгуулж судалгааны байгууллагуудтай хамтран ажиллаж байгаа юм.
Залуусын тавьсан шаардлагын 74 хувь нь үнийн өсөлтийг хязгаарлах, 15 хувь нь төсвийн үргүй зардлыг хэмнэх, 12 хувь нь авилгал тэгш бус байдалтай тэмцэх, 12 хувь нь цалин, нийгмийн даатгалын шинэчлэлтэй холбоотой асуудал байсан юм.
Ээлжит бус хурлаар өрийн өмчит компаниудын удирдлагын бүтэц дээр дэд захирал болон шаардлагагүй албан тушаалуудыг хуулиар хязгаарлаахаар шийдвэрлэв. Мөн ТӨХК-ийн захирал бие дааж шийдвэр гаргах боломжгүй болно. Төрийн өмчит 39 ААН-ийг олон нийтийн хяналт дор оруулахаар 34 хувийн IPO гаргах асуудлыг УИХ-д оруулахаар тогтов.
Түүнчлэн 10 орчим компанийг нэгтгэж, 10 компанийг татан буулгана
Г.Хан
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.