O.Z: Миний хамгийн анхны бүтэн дуулалттай дуу бол “Falling love”

“Бидний нэг” контентын энэ удаагийн дугаарт “Тоонот” рекордсын артист Э.Золбоо буюу O.Z оролцлоо. Түүний хувьд тун удахгүй “Чамруу” дуугаараа нэрлэсэн анхны бие даасан цомгоо гаргах гэж байгаа юм.

-Сайн байна уу. Өөрийн чинь хувьд анх реп дуу голцуу хийдэг байсан. Харин сүүлийн үед огт өөр өнгө аястай уран бүтээлүүд гаргаж энэ нь ч хүмүүст таалагдаж байна. Энэ сэдвээс ярилцлагаа эхэлье?

- Би анх “Тоонот”-д репперийн үүрэгтэй байсан. “Тoonot volume”-1,2,3 гэсэн цомгуудад хип хоп дууны хамтралууд маань орсон байдаг. Миний хамгийн анхны бүтэн дуулалттай реп биш дуу бол “Falling love” байсан. “Falling love” дуугаа хүмүүст тэгж сайн хүрнэ гэж бодоогүй. Тест дуу байсан гэх юм уу даа. Хүмүүс маш гоё хүлээж авсан. Багагүй амжилтад хүрсэн нь надад урам өгсөн.

-Цомгоо гаргаж гэж байгаа гэж сонссон?

- Тийм ээ. “Чамруу” дуугаараа нэрлэсэн цомог гаргах гэж байгаа. Цомог маань 15 дуунаас бүрдсэн. Таван дуу нь цацагдсан, клипжүүлсэн дуунууд байгаа. Харин 10 дуу нь цоо шинэ хүмүүс сонсоогүй дуунууд. Дөрвөн сарын сүүлээр хэвлэлтээс гарч гар дээр хүрч ирнэ. н.Тэмүүжин гэдэг продюсер найзтайгаа хөгжмийн найруулга, санаа оноогоо ярилцаад цомгийнхоо уран бүтээлүүдийг хийсэн.

-“Тоонот” бол нэг гэр бүл гэж дуундаа илэрхийлдэг. Танай студийн хамт олны тухай ярилцъя. “Тоонот”-ын уран бүтээлчдийг нэг үгээр тодорхойл гэвэл юу гэж тодорхойлох вэ? 

-Манайхан бол миний мэдэх хамгийн гоё хамт олон. Бид нэг гэр бүл шиг байж чаддаг. Нэг нь зураг авалттай байлаа гэхэд бид нар бөөнөөрөө очоод тусалдаг. Артист болгон өөрийн гэсэн өнгө аястай, авьяаслаг залуучууд цугласан гэж боддог. “Тоонот”-оос хамгийн хөгжилтэй нь Jason, хамгийн дайчин нь Тhunder. Харин хамгийн түшигтэй, нөмөртэй хүн бол Desant. Хамгийн цагаахан гэнэн хүн бол Bilgang. Манай Эрка ах бол хамгийн сайн зөвлөгч. Манай Degi бол “Тоонот”-ын багана. Харин би байгаа үгүй нь мэдэгддэггүй тийм л хүн /инээв/.

-Багаасаа дуу хөгжимд дуртай байсан уу. Хэзээнээс хип хоп урлагийг сонирхох болов?

-Ер нь багаасаа урлагт дуртай байсан л даа. Манай нэг найз “Snoop Dogg”-ийн нэрийг нь мартжээ дууных нь аяыг авч ирээд “Чи энэ дээр үг биччих нэг студи олсон. Дуу хийж болох юм шиг байна” гэсэн. Тэгээд би аяын сонсож байгаад үг бичээд, найзууддаа хуваарилж тараагаад дөрөв, тавуулаа бичлэгт анх орж үзсэн юм. Ерөнхийдөө тэр нь хобби болоод тэгээд одоо бараг ажлын маань нэг хэсэг болоод хувирчихсан байна.

- Хип хоп урлагийн үнэ цэнэ, утга учир өөрийн чинь бодлоор юу вэ?

-Нийгмийн хамгийн том дуу хоолойг гаргаж болох урлаг бол хип хоп гэж ойлгодог. Ямар ч фильтр байхгүйгээр хамгийн том агуулгыг нэг дуун дээр гурван минутад багтаах боломжтой урсгал бол хип хоп урсгал гэж боддог.

-O.Z хувь хүний хувьд ямар хүн бэ?

 -Би ер нь дуугүй, хаалттай төрлийн хүн. Сайн тал гэх юм уу, муу тал гэх юм уу. Би ямар нэгэн юмыг өөрөө харж байгаад, гардаж дуусгах гээд байдаг. Хүмүүс над руу “Ядаргаатай юм бэ чи, хийчихнэ шүү дээ, би мэдэж байна” гэж хэлдэг. Тэгэхээр нь “Хоёулаа хамт сууж байгаад хийчихье ээ” гэдэг. Ажилд нэг тиймэрхүү зантай. Зарим хүмүүс дургүй байдаг байх.

-Уран бүтээлийн хажуугаар хийдэг ажил бий юу. Ямар ажил эрхэлдэг вэ?

-Хувиараа 5-6 жил үйлчилгээний бизнес эрхэлж байна.

-Бизнес хийхэд хүндрэлтэй зүйл учирч байна уу?

-Ажлын шугамаар төрийн байгууллагуудтай харьцаж эхэлнэ л дээ. Тэнд маш их стресс байдаг. Ер нь нэг газар очоод шууд бүтдэг ажил гэж байхгүй дээ. Ийм бичиг баримт хэрэгтэй байна, ингэмээр байна гээд явахад “За тэгье” гээд бүтээгээд өгдөг газар нэг ч удаа орж байсангүй. Жил болгон л ажлын шаардлагаар төрийн байгууллагаар орно. Хүн нь солигдчихсон нөгөө харилцаа нь адилхан байдаг байхгүй юу. Ерөөсөө өөрчлөгддөггүй.

-Уран бүтээлчдийн дууны үг, аян дээр ажилладаг гэж сонссон. Сүүлийн үед ямар дуунууд дээр ажиллаж байна?

-Сүүлийн үед бол дандаа хайрын дуунууд над дээр ирж байна /инээв/. Дуучид өөрсдөө аялгуугаа гаргачихсан ирдэг. Тэгээд сонсож үзээд үнэхээр гоё аялгуутай дуу байвал үг бичихэд урамтай байдаг. Өөрийгөө мундаг үг бичдэг гэж хэлэхгүй. Манай Монголын репперүүд ямар ч дууны үгийг гаргаад өг гэвэл бүгд аятайхан үг бичээд өгчих байх. Би тэд нарын л нэг.

-Сүүлийн үед сонирхож хийж байгаа зүйл юу байна. Уран бүтээлээс гадна?

-Би сүүлийн үед боксын клубд явж байгаа. Надад их таалагдсан. Гоё спорт байна лээ. Өмнө нь ерөөсөө сонирхож байгаагүй. Манай Тhunder аягүй олон жил явж байгаа. “Хамт яваад үзээч” гээд түрүү жилийн зунаас явж эхэлсэн. Олон жил явчихсан тамирчдыг хараад байхад аягүй хүндлэл, дэг жаягтай. Орж гарахдаа багштайгаа ёсолдог. Нэгнээ хүндэлдэг. Хүнийг төлөвшүүлдэг гоё спорт.

-Монголын нийгэм бухимдал ихтэй байна. Саяхан залуус Засгийн газарт шаардлага хүргүүлж жагсаал хийлээ. Амьдарч байгаа нийгмийнхээ талаар ямар бодолтой явдаг вэ?

-Нийгмийн хувьд хэт хоёр талтай болчихсон гэж боддог. Нэг хэсэг нь бүр тасарчихсан. Хүмүүс хоногийн хоолоо яаж аргацаах вэ гэж байхад зарим нь усаа гаднаас захиалж авч ууж байх жишээтэй. Ийм ялгаа нүдэн дээр ил харагдаж байна гэж би бодож байгаа. Маш том өөрчлөлт хэрэгтэй байх. Жижиг биш маш том өөрчлөлт хэрэгтэй гэж боддог.

Ярилцсанд баярлалаа.

Г.Лхагва