Путин, Зеленский нар хэзээ уулзах вэ

Владимир Путин мягмар гарагт НҮБ-ын Ерөнхий нарийн бичгийн дарга Антонио Гутерриштэй уулзахдаа: “Орос улс хэлэлцээ хийхээс татгалзахгүй бөгөөд Украинтай дипломат түвшинд тохиролцоонд хүрч чадна гэж найдаж байна” гэж мэдэгджээ.

Харин Москва, Киевийн эх сурвалжууд зүүн фронт дахь дайны идэвхтэй үе дуусах хүртэл хэлэлцээрийн явцад мэдэгдэхүйц ахиц дэвшил гарна гэж найдах хэрэггүй гэдэгтэй санал нэг байна.

Цэргийн амжилт, ялагдал нь хэлэлцээрийн ширээний ард суугаа талуудын ярианд шууд нөлөөлдөг. Хэлэлцэн тохирогч талууд Украин, ОХУ-ын тохиролцох дараагийн баримт бичигт илүү хүчтэй байр суурьтай байхын тулд  өөрсдийн ялалтаа тогтоохыг хүсэж байна гэж Михайл Подоляк үзэж байна.

Мөн урд өдөр нь энэ санааг Оросын Гадаад хэргийн сайд Сергей Лавров шууд бусаар баталж, Украин, Оросын хоорондох дайн хэлэлцээрт гарын үсэг зурснаар дуусна. Энэ гэрээ бодит байдал болох параметрүүд нь дайсагналын үе шатаар тодорхойлогдоно" гэж илэн далангүй мэдэгдээд байгаа юм.

"Эдгээр нь хоёр тусдаа үйл явц юм. Дайн дайныхаа замаар, хэлэлцээр бол хэлэлцээ. Хэлэлцээрт оролцогч төлөөлөгчид одоо энх тайван байдал ирэх үед гарын үсэг зурах баримт бичгийн агуулгыг тохиролцохыг хичээж байна. Харин тэр цаг хэзээ ирэхийг хэлэлцээрт оролцогчид ч  мэдэхгүй байна” гэж Оросын төлөөлөгчдийн ойрын ярилцагч хэлэв.

Тэрээр “Эв найрамдлын түлхүүр одоо Оросын талд байна. Орос цэргийн зорилгодоо хүрсэн гэж үзвэл энхийн хэлэлцээ эрчимжинэ гэж эх сурвалж тайлбарлав. Гэхдээ яг юу болохыг хэлэхэд хэцүү. Яагаад гэвэл хувилбарууд үргэлж өөрчлөгддөг.

Өнгөрсөн долоо хоногт Оросын цэргийн төв тойргийн командлагчийн орлогч Рустам Миннекаев Оросын ажиллагааны хоёр дахь шатны зорилго нь Донбассыг эзлэн авах төдийгүй, Украины өмнөд хэсгийг бүхэлд нь эзэлж тус улсыг Хар тэнгист нэвтрэх эрхгүй болгох явдал гэж мэдэгдсэн нь хэвлэл мэдээллийн хэрэгслээр шуугиан тариад байгаа юм.

Ийм хяналт нь Миннекаевын хэлснээр Крым, Приднестровийн бүс рүү хуурай замын коридор бий болгох боломжийг Орос улсад олгоно гэжээ.

Батлан ​​хамгаалах яам, Кремлийн удирдлага энэ мэдэгдлийн талаар тайлбар хийгээгүй тул Миннекаевын үгийг Украин дахь дайны шинэ үзэл баримтлал гэж үзэх үү, эсвэл зүгээр л нэг генералын үзэл бодол гэж үзэх үү эдэг нь тодорхойгүй байна. Үүнээс өмнө Батлан ​​хамгаалах яам дайны хоёр дахь шатны зорилго нь Донбассыг "чөлөөлөх" буюу Луганск, Донецк мужуудын засаг захиргааны хилийн доторх нутаг дэвсгэрийг бүрэн чөлөөлөх явдал гэж үзэж байгаагаа мэдэгдэж байсан юм.

Гэсэн хэдий ч Киевт Миннекаевын хэлсэн үгийг нухацтай авч үзэж байна. Ерөнхийлөгчийн Тамгын газрын дарга Андрей Ермак "Бидэнд Украиныг хамгаалах өөрийн гэсэн хувилбар бий. Мөн манай арми, ард түмний тэмцжл зүтгэлээр Кремлийн олон төлөвлөгөө аль хэдийн устгагдсан гэдгийг сануулмаар байна" гэж тайлбарлав.

Украйны дайны дараах хил хязгаар зэрэг асуудал яриа хэлэлцээ хаалтанд орсон гэж Оросын төлөөлөгчдөд ойр  эх сурвалж хэлсэн бөгөөд тулалдаан үргэлжилж байхад үүнийг хэлэлцэх нь бараг утгагүй юм. Украины хэлэлцээнд оролцогчид өөрсдийн улсын нутаг дэвсгэрийн бүрэн бүтэн байдлын асуудлыг (өөрөөр хэлбэл Крым, Донбассыг Украины нэг хэсэг байх) ямар ч тохиолдолд давж гадна нь гишгэж болохгүй тодорхой заасан "улаан шугам" гэж үзэж байна.

Истанбулын мэдэгдэлд Донбассын ирээдүйн асуудлыг Украин, Оросын ерөнхийлөгч нарын хувийн уулзалтаар хэлэлцэхийг санал болгож байна. Дайтагч орнуудын ерөнхийлөгч нарын биечлэн уулзах нь мөргөлдөөнийг таслан зогсоох алхам болно гэж үзэж байна.

Владимир Зеленский саяхан Киевийн метронд болсон хэвлэлийн бага хурлын үеэр "Би хүсэхгүй байна, гэхдээ хэрэв Украины нутаг дэвсгэрийн бүрэн бүтэн байдлын асуудлыг дипломат аргаар шийдвэрлэхээр төлөвлөж байгаа бол ОХУ-ын Ерөнхийлөгчтэй уулзах ёстой" гэж мэдэгдсэн юм.

Владимир Путин Украины ерөнхийлөгчтэй хийх уулзалтын талаар ямар байр суурьтай байгаа талаар мэдээлэл  бага байна.

Financial Times сонинд бичсэнээр одоо Владимир Путин мөргөлдөөнийг дипломат аргаар зохицуулах сонирхолгүй байгаа бөгөөд газар нутгийг булаан авах цэргийн зорилгод анхаарлаа хандуулж байна гэжээ.

Михаил Подоляк Путин, Зеленский нарын уулзалт одоогоор боломжгүй мэт харагдаж байгаатай санал нийлж байна. "Оросын Холбооны Улс бодит байдлыг бодитойгоор харж байгаа гэдэгт би эргэлзэж байна. Миний бодлоор тэд өөрсдийн хуурмаг ертөнцөд маш  гүн гүнзгий орсон тул энэ хүр хорхойн үүрээ эвдэхийн тулд тэдэнд цаг хугацаа хэрэгтэй хэвээр байна" гэжээ.

Эх сурвалж: ВВС