Парисын загварын тод өнгө болсон Мари-Луиз, Рене Глемарек нар Unisex/ хүйс харгалзахгүй/ брэнд болох “Egon Lab”-ийн албан бус нүүр царай. Өдгөө 85,86 настай тэднийг “Vogue” сэтгүүл онцолжээ.
Ач хүү Флорентин Глемарек нь хамтрагч Кевин Номпейстэй өөрийн гэсэн хувцас загварын брэндийг бүтээхэд хамгийн их түлхэц өгч, эхний өдрөөс нь шүтэн бишрэгч болжээ. Хосууд залуусын хийсэн хувцасны эхний загварыг өмсч, олон нийтэд танилцуулахдаа маш баяртай байсан гэнэ. Ингээд залуус өвөө, эмээдээ загварын тайзнаа гарах хүсэлт тавьж, талбайн шоунд оролцуулснаар тэднийг Парис даяар мэддэг болжээ.
“Энэ бол бидний хувьд төдийгүй тэдний хувьд шинэ туршлага байсан” хэмээн Кевин ярьсан бөгөөд гэрэл зурагчид, сошиал одуудаас маш сайхан эерэг сэтгэгдэл авсан байна. Ингээд Парисын долоо хоногт гудамжны шинэхэн хэв маяг бүхий “Egon Lab” брэндийг хосууд тайзнаа амилуулсан байна. Глемарекийн гэр бүлийг загварын тайзнаа рок одууд шиг угтан авдаг болсон гэдгийг Кевин онцолжээ. Гэрэл зурагчдаас урьтаж, гудамжаар зөрөх хүн бүр тэдэнтэй сельфи хийх гэж зүтгэх болсон гэнэ. Харин Рене эмээд үзэгч, шүтэн бишрэгчид нь төдийлэн саад болдоггүй. Эелдгээр мэндлэн зураг авхуулдаг бөгөөд олны өмнө байх дуртай болсон аж.
"Vogue" сэтгүүлд савхин хувцастай хосуудын зураг нийтлэгдсэний дараа дэлхий даяар цахим ертөнцөд шуугиан тарьж, эерэг сэтгэгдэлд “булуулжээ”.
Хатагтай Глемарек өмнө нь шуудангийн салбарт ажиллаж байсан бол ноён Глемарек тэнгисийн цэргийн хүчинд алба хаадаг байжээ. Одоо тэд загварын ертөнцийн шинэ дүр төрх болсон учраас ач хүүгийнхээ шинэ гарсан загвар бүрийг өмсөөд гудамжаар зугаалдаг. “ Бид од болчихсон юм шиг санагддаг. Гэхдээ хэзээ ч бидний толгойд загварын ертөнцөд хөл тавина гэсэн бодол байсангүй” хэмээн хатагтай Глемарек “TODAY Style” сэтгүүлд өгсөн ярилцлагадаа дурджээ. Харин брэндийг бүтээгч Кевин “Үнэндээ бид тэднийг ийм алдартай болж, бидний брэндийн нүүр царай болно гэж төсөөлөөгүй. Бидний ажлыг маш их дэмжиж, байнга урам өгч байсан учраас манай брэндийн түүхийн нэг хэсэг нь байгаасай л гэж хүссэн. Өнөөдөр энэ брэндийг бүтээхэд тэдний оруулсан хувь нэмэрт бид хангалттай талархал илэрхийлж чадахгүй байна” хэмээн ярьсан байна.
Сэтгэгдэл (1)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.
муухай юм байнааа