Баянзүрх дүүргийн 16 дугаар хорооны 53 дугаар сургуулийн зүүн талд иргэдийн зорчиход хүндрэлтэй байсан хэсгийг явган зам, авто зогсоол, ногоон байгууламжтай болгон тохижуулж эхэлжээ. Санаачлагч нь, Баянзүрх дүүргээс УИХ-д сонгогдсон шинэ гишүүн Э.Бат-Амгалан, дүүргийн Засаг дарга Н.Баярмөнх, ИТХ-ын дарга А.Баяр нар юм байх. Харин гүйцэтгэгч нь, Баянзүрх дүүргийн хөрөнгө оруулалт бүтээн байгуулалтын төв гэжээ. Засч тохижуулж байгаа ажлыг дэмжилгүй л яахав. Гэвч “Иргэндээ ээлтэй хот” гэдгээ эрхэм санаачлагч нар мартчихсан бололтой. Баянзүрх дүүргийн Засаг дарга Н.Баярмөнх “Алга дарам олдсон газраа барилга бариулахгүй. Аль болох иргэндээ ээлтэй тохижилтын ажлыг хийнэ.” хэмээн амласан байдаг.
Гэтэл явган хүний зам талбайн тохижилт хийж байна гээд нүхтэй хавтан буюу барилгынхны хэлдгээр эко хавтанг жирийтэл нь өрсөн зураг тавьсныг харвал иргэндээ яавч ээлтэй тохижилт биш байна Засаг дарга аа. Хүүхдүүд, өсгийтэй гуталтай эмэгтэйчүүд, таягтай хөгшид энэ хавтангийн зовлонг хамгийн сайн мэднэ.
Энэ бол явган хүний зам тавьдаг хавтан лав биш гэдгийг амьдрал дээр бэлхнээ баталчихсан. Далан болон хэвгий газарт зүлэг, цэцэг тарих зориулалтаар байрлуулдаг хэмээн иргэд сануулж, анхааруулсаар байтал явган хүний зам биш машины зогсоол хэмээн гүйцэтгэгчид зөвтгөжээ.
Эхлээд та бүхний баталсан хотын стандартад нийцэх эсэхийг судалж үзсэн үү, Засаг дарга аа. Өнгөрсөн гуравдугаар сард НИТХ-аас 9 бүлгийн 38 стандартыг баталж, Улаанбаатар хот стандарттай боллоо хэмээн олон нийтэд мэдээлэл өгсөн. Хот нэгдсэн стандарттай болж түүнд хяналт тавихын тулд 2019 оны тавдугаар сард Хотын стандарт, хяналтын газар гэдгийг байгуулжээ.
Тус газрын орлогч дарга О.Оджаргалын ярилцлагад дурдсанаар Явган хүний замын стандартыг 2020 онд баталжээ. Тэрбээр, явган хүний зам хамгийн аюулгүй орчин байх ёстой гэсэн үүднээс явган зорчиж байгаад гэмтэж, бэртэх тохиолдол гаргахгүйн тулд аюулгүйн шаардлагыг хамгийн түрүүнд тавьсан гэж байв.
Тэгвэл Явган хүний зам талбайн төлөвлөлт, хучилт, угсралтад тавигдах ерөнхий шаардлага буюу стандартад явган хүний замд тавигдах шаардлагыг доорх байдлаар тодорхойлсон байна.
-Явган хүний зам төлөвлөхөд дараах нийтлэг зарчмуудыг баримтална.
Үүнд:
-явган хүний зорчих өргөнийг (барилга байгууламжийн нүүрэн хэсэг, явган хүний зам, ногоон байгууламж) иж бүрэн төлөвлөх ба явган зорчигчдын хөдөлгөөний орон зай хангалттай байна;
-явган хүний замын сүлжээ буюу явган хүний зам нь тасралтгүй үргэлжилсэн байна;
-явган хүний замыг бие даан хөдөлгөөнд оролцох чадвартай явган зорчигчдоос гадна бусдын тусламж, хараа хяналтад явдаг хүүхэд, өндөр настан, хөгжлийн бэрхшээлтэй хүн зорчиход саадгүй буюу хүртээмжтэй байна;
-явган зорчигчдын аюулгүй, ая тухтай орчныг бүрдүүлсэн байна;
-чанартай гадаргуутай байна;
-тэмдэг тэмдэглэгээ бүрэн бүтэн, маршрутын самбар ойлгомжтой байна.
Эндээс нүхтэй хавтан бол явган хүний замын батлагдсан стандартад яагаад ч нийцэхгүй гэдгийг харж болох юм.
Ажлыг гүйцэтгэгчийн зөвтгөлөөр бол нүхтэй хавтангаар машины зогсоол тавьж байгаа гэсэн. Тэгвэл энэ зогсоолд эмэгтэй жолооч машин тавихгүй гэх хориглох тэмдэг тавих уу. Эсвэл гутлаа тайлаад явах уу гэх сонголт гарах нь.
Харин Тээврийн хэрэгслийн ил зогсоолыг төлөвлөх байгуулахад тавигдах шаардлагын “Иж бүрэн гудамж” стандартыг баталсан байна.
Энэ стандартад зогсоолын хучилт нь,
-Авто зогсоолын талбайн хучилтыг бетон хавтан, байгалийн чулуу, асфальтаар хийж болно. -Хучилтын материал нь MNS 4699:2016, MNS 1592:2009 стандартыг хангасан байна.
-Гадаргуугийн элэгдэл, эвдрэлийг тухай бүрд төлбөртэй зогсоолын үйл ажиллагаа эрхлэгч стандартын дагуу засварлана гэж тусгасан. Стандартаас харвал нүхтэй хавтангаар хийх боломжгүй мэт.
Төлбөртэй зогсоолын тэмдэглэлийг шар өнгөөр, төлбөргүй зогсоолын тэмдэглэлийг цагаан өнгөөр хийнэ гэх зэргээр стандартад нэг бүрчлэн тусгасныг уншиж үзвэл автомашины зогсоолын стандартад ч энэ хавтан нийцэхгүй юм байна.
Тиймээс Баянзүрх дүүргийн Засаг дарга та, санаачилсан ажлынхаа гүйцэтгэлд анхаарал тавьж, хотын стандартаа мөрдөнө үү.
Сэтгэгдэл (2)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.
АН-ын үед хөгжөөгүй МАН-ын засаглаад ч ялгаа алга манай дүүргийнхэн азгүй улс пязда
Идье гэж бодохоос иргэнээ боддоггүй байх наандаж хүн явахад ямар вэ гэдгээ бодолцмоор юм