Оросын эдийн засагт сөргөөр нөлөөлөх зорилгоор өрнөдийн орнууд хориг арга хэмжээ авсан ч Оросын газрын тос, байгалийн хийн экспортын орлого үнэмлэхүй нэмэгдлээ гэж шинжээч Роберт Рапиер нийтлэлдээ дурджээ.
Тэрбээр Германы Олон улсын харилцаа, аюулгүй байдлын хүрээлэнгийн шинжээч Янис Клюгегийн мэдээллээс иш татан, эрчим хүчний нөөцийн борлуулалтаас Евразийн улс руу орох мөнгөний урсгал хоёр дахин өссөн гэсэн дүгнэлт хийжээ.
Тодруулбал, Оросын газрын тос, байгалийн хийн орлого дөрөвдүгээр сард дахин нэг дээд амжилт тогтоов. Гуравдугаар сард 1,2 их наяд байсан энэ салбарын орлого дөрөвдүгээр сард 1,8 их наяд рубль болсон. Ингэснээр эхний дөрвөн сарын дотор 2022 оны холбооны төсөвт газрын тос, байгалийн хийн нийлүүлэлтээс төлөвлөсөн орлогынхоо тал хувийг (9,5 их наяд рубль) олсон гэдгийг газрын тосны үнийн шинжээч иш татав.
Хэрвээ ОХУ хориг арга хэмжээг дэмжихээс татгалзсан орнуудад эрчим хүчээ үргэлжлүүлэн борлуулж чадвал сайн үр дүнд хүрнэ гэж тэр урьд нь хэлж байсан юм.
"Оросын нефтийн үнийг баррель нь 200 доллар хүртэл өсгөхгүйгээр зах зээлээс бүрмөсөн гаргах боломжгүй. Үүнээс гадна үнэ өсөхийн хэрээр Оросын нефтийг сонирхох сонирхол нэмэгдсээр байна. Тухайлбал, яг одоо Хятад, Энэтхэгт хөнгөлттэй үнээр худалдаж авах маш том хөшүүрэг бий" гэж шинжээч тайлбарлав.
Эх сурвалж: Риа новости
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.