ОХУ-ын Гадаад хэргийн яам ОХУ-ын удирдагч Владимир Путиныг "Их 20"-ийн уулзалтад оролцох хүсэлтэй байгаа талаар Индонезид урьдчилан мэдэгдсэн байна. Энэ тухай ГХЯ-ны хэвлэлийн алба мэдээлэв.
ОХУ-ын Ерөнхийлөгч В.Путин дээд хэмжээний уулзалтад өөрийн биеэр оролцох бодолтой байгааг Кремль өмнө нь мэдээлж байсан. Мөн Москва хуралдаанд оролцохоо аль хэдийн баталгаажуулсан.
Гэхдээ төрийн тэргүүний оролцоо ямар хэлбэртэй байх нь Зүүн Өмнөд Азийн бүс нутгийн эрүүл ахуй-эпидемиологийн нөхцөл байдал болон дэлхийн үйл явдлын өрнөлөөс хамаарна гэж дээрх мэдээнд онцолжээ.
Сануулахад, “Их 20”-ийн дээд хэмжээний уулзалт арваннэгдүгээр сарын 15-16-нд Индонезийн Бали аралд болно. Зохион байгуулагч тал зөвхөн Владимир Путиныг төдийгүй Украины удирдагч Владимир Зеленскийг ч мөн урьсан байна.
Дээд хэмжээний уулзалтын хэлэлцэх асуудлын жагсаалтад цаг уурын асуудал, коронавирусын тахлын дараах дэлхийн сэргэлт, хамтын ажиллагаа, "Украины хүчин зүйлийн нөлөөг харгалзсан" бусад олон улсын асуудлууд багтсан болно.
Европын Комиссын тэргүүн Урсула фон дер Лейен “Их 20”-ийн дээд хэмжээний уулзалтад Оросын удирдагч оролцох гэж байгаатай холбоотойгоор уулзалтыг бойкотлохгүй байхыг уриалав. Учир нь ингэх нь G20-ийн үйл ажиллагааг саатуулж болзошгүй юм. Улстөрчийн үзэж байгаагаар эдийн засаг, зах зээлийн динамик сул улс орнуудын хувьд дээд хэмжээний энэ уулзалт маш чухал юм гэдгийг тэмдэглэв.
Харин Их Британи, Итали улсын эрх баригчид Путиныг энэ арга хэмжээнд өөрийн биеэр оролцоно гэдэгт эргэлзэж байна.
Үүнээс урьд ОХУ-ын Ерөнхийлөгчийн хэвлэлийн нарийн бичгийн дарга Дмитрий Песков "Орос улс G20-ийн гишүүн хэвээр байгаа бөгөөд дээд хэмжээний уулзалтад оролцоно" хэмээн мэдэгдсэн юм.
Эх сурвалж: АиФ
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.