Хятад улс Тайвань руу 21 нисэх онгоц, таван хөлөг онгоц илгээлээ

Хятадын Ардын Чөлөөлөх Арми Тайванийн арал руу  21 нисэх онгоц,  байлдааны таван хөлөг онгоц илгээсэн гэж арлын Батлан ​​хамгаалах яам мэдэгдэв.

Тэд "8-р сарын 17-ны өдрийн 17:00 цагийн байдлаар Тайваний зэвсэгт хүчин өөрсдийн ойролцоох тэнгис, агаарын орон зайд 21 нисэх онгоц, таван хөлөг онгоцны үйл ажиллагааг бүртгэсэн" гэжээ.
Түүнчлэн эдгээрээс Су-30 сөнөөгч хоёр, J-11 хоёр, цахим тагнуулын нэг Y-8 онгоц зэрэг таван онгоц Тайваний хоолойн "дундын шугам"-ыг давсан гэж тэмдэглэжээ.

Тайвань нөхцөл байдлыг хянахын тулд агаарын эргүүл илгээж, радиогоор сэрэмжлүүлэг өгч, зенитийн пуужингийн систем байршуулсан гэж мэдээлэв.
Үүний өмнө сенатор Эд Марки тэргүүтэй АНУ-ын конгрессын гишүүдийн төлөөлөгчид Тайваньд хүрэлцэн ирсэн юм. Төлөөлөгчид Тайваний өндөр албан тушаалтнуудтай уулзаж, Америк, Тайванийн харилцаа, бүс нутгийн аюулгүй байдал, худалдаа хөрөнгө оруулалт, дэлхийн ханган нийлүүлэлтийн сүлжээ, уур амьсгалын өөрчлөлт болон харилцан сонирхсон бусад чухал асуудлаар санал солилцоно гэж мэдээлж байсан юм. 

Үүний дараа Хятадын Батлан ​​хамгаалах яамны хэвлэлийн төлөөлөгч Ву Цянь хэлэхдээ, Тайбэй, Вашингтоны тохиролцооны хариуд Хятадын арми Тайванийн эргэн тойронд дахин цэргийн сургуулилт, эргүүл хийж байна.

Америкийн улс төрчдийн айлчлал Тайванийг тойрсон хурцадмал байдлыг улам хурцатгаж, АНУ-ын Төлөөлөгчдийн танхимын дарга Нэнси Пелоси саяхан тус аралд хийсэн айлчлалтай холбоотойгоор аль хэдийн хурцадсан. Тэрбээр сүүлийн 25 жилийн хугацаанд Тайваньд айлчилсан АНУ-ын хамгийн өндөр албан тушаалтан болжээ.

Бээжин Вашингтоныг эсэргүүцэж, арлын эрэг орчимд сургуулилт хийж, Пелоси, түүний төрөл төрөгсөд болон Тайваний хоёр сангийн эсрэг хориг арга хэмжээ авахаа зарлаж, худалдааны хязгаарлалт тогтоогоод байгаа. Пелосигийн айлчлалаас гарч болзошгүй бүх сөрөг үр дагаврыг Хятадын ГХЯ Вашингтон, Тайбэй хоёрт хүлээлгэсэн юм.
Хятад улс Тайванийн бүрэн эрхт байдлыг хүлээн зөвшөөрөхгүй, түүнийг өөрийн муж гэж үздэг бөгөөд Тайбэй болон бусад орны албаны хүмүүс, цэргийнхэнтэй харилцахыг эрс эсэргүүцэж байна.

Эх сурвалж: РИА новости